Etekiera 8 - Kiribati New Version Bible

Noorakin ana bure Ierutarem aika a rangi ni kakamaaku Iroun Etekiera

1Onoua te ririki i mwiin rikin Ieoiakin b'a te uea ao nikirara ti a kairaki nako b'a taenikai nakon B'aburon, ao I kaboowi ma taani kairiiri i Iuta n au auti. N kanimauani bongin te kaonoua n nam'akaina, E a manga niniai te UEA ae te Atua,

2ao I noora te b'ai ae kaanga tein te aomata. Te b'ai aei kaanga ai aron te ai man koreana rikaaki, ao e raneanea kaanga te biti mani koreana ni waerake.

3E kaaenakoa te b'ai ae kaanga ai aron bain te aomata n taua irau. Ao i nanon miiu arei E a uotai rake Tamnein te UEA nako karawa ma ni uotai nako Ierutarem.

E uotai te Tamnei nakon mataroan katawanangin te Tembora are i meaang ike e mena iai te bouannanti are e rangi n ribaia te UEA ao e rangi ni un iai.

4Ao i mwiina, I noora raneanean mimitongin Atuaia Iteraera, n aron are I a tia n nooria i rarikin te Karaanga are Keeb'ara.

5E taku te Atua nako iu, “Etekiera, ae natin te aomata, taraa meaang.” Ngke I taraia, ao I noora te bouannanti ae e rangi n ribaaki i rarikin te baonikarea i rarikin te mataroa.

6Ao e a manga taku te Atua, “Kam noora aia bure Iteraera ae moan te kakamaaku? Aikai buure aika a karika au Tembora b'a te tabo ae e aki tau i bukin taromauriau. Ma e ngae n anne, ao kam na noori riki b'aai riki aika a buakaka nakon aei.”

7I mwiin anne, I a manga uotaki nakon mataroan te katawanang, ike I a noora iai b'angab'angan te oo.

8E taku te Atua, “Ko na kabuubura riki te b'angab'anga aei.” Ao ngke I tia ni karaoa arei, ao I a tib'a ataia ae ngaia te mataroa n oti nako.

9Ao E taku te Atua, Riin. Noori aron kakamaakun ma buakakan aia m'akuri aomata.”

10I rinnako nanona, ao I noori taian oo aika a onrake n taamnein taiani beru ao maan aika a aki itiaki, aika maan aika a baareka, n reitaki ma taian bouannanti ake a taromauri Iteraera.

11A tei ikekei itingaun taani kairiiri mai Iteraera, n reitaki ma Iaatania are natin Tiaban te m'aane. A bane taani kairiiri n taui b'ain kabuokan taiani b'ai ni kaboiarara n tatabemaniia nako, ao e onrake nanon te ruu arei n te boiarara.

12E taku te Atua, Etekiera, ko na noori b'aai aika a kakamaaku aika a karabai ni karaoi taani kairiiri mai Iteraera? A kaona nanon te ruu n taiani bouannanti. Ao a taku b'a I aki konaa nooriia, i bukina b'a a taku b'a I a tia ni kiitana Iteraera.

13Ma N na kaota nakoim te b'ai ae e rangi ni buakaka riki nakon aei.”

14Ao e uotai nakon mataroan te Tembora are i meaang, ngke I a nooriia aine aika a tang i bukin te anti are Tammuti.

15E titirakinai te Atua ni kaangai, “Ko konaa ni kakoauaa b'a tera te b'ai ae a karaoia aine aikai? Ma ngkai N na kaota nakoim te b'ai ae e rangi ni korakora riki buakakana.”

16Ao I a manga kairaki nakon katawanangin te Tembora, ike a noori uangaun ma niiman aika a tei i rarikin te mataroa n rin, i marenan te b'aranta ao te baonikarea. A akuuna ana Tembora te UEA, ao a boobaraaki nakon otin taai.

17E taku te Atua, Etekiera, e rangi ni buakaka ngkai a karaoi b'aai aika a rangi n ribaaki kaain Iuta. Ao a bon kabutanakoa naba te tiritiri ma te motibuaka i aon Iteraera ni kabane ao a rangi ni kaunai. A tia ni kamatauningaai ma ni kamamaaeai n aia m'akuri nako aika a rangi ni buakaka.

18Ma ngaia ae, N na katuaaia n uniu ae moan te korakora, ao N na bon aki manga nanoangaia ao N na rawa ni buokiia ngkana a tangira buokaia mai Rou.”