Ieremia 36 - Kiribati New Version Bible

Kabuokakin Ana Niira ni boki Ieremia Iroun Te Uea Are Ieoiakim

1I nanon ana kaua n ririki Ieoiakim are natin Iotia te mm'aane ni uea i aon Iuta, ao E taetae te UEA nako iu ni kaangai, “Ieremia,

2I a kaman taetae nakoim i bukin Iteraera, ma Iuta, ao botannaomata ake tabeua man ana tai Iotia ni uea. Ngkai ko na anaa te niira ni boki ao koroi i aona b'aai ni kabane aika I tuangko,

3ao warekia nako ia kaain Iuta. Tao e na toki iai karaoan te bure ngkana a ongo Au babaaire aika N nang karaoia nako ia. Ao ngkana a oki nako iu, N na kab'araa aia bure.”

4I kanaanako weteakin B'aruka are natin Neria te mm'aane ao I butiia b'a e na buokai. I a manga taekin nakoina b'aai ni kabane ake E a tia n tuangai te UEA, ao e koroi B'aruka ni kabane i aon te niira ni boki.

5Ao i mwiina, I taku,

B'aruka, a aki kariaia mataniwi b'a n na rin n Ana Tembora te UEA,

6ma ngaia are, ko na onea mwiiu n nako. Ko na taningaa te bong ae e tabu are i mwiina are a na bane n roko iai kaain Iuta n tataro ma n aki am'aam'arake. Ao i mwiina, ko uota te niira ni boki aei nakon te Tembora ni warekia ni kaom'akaa b'anaam.

7E bono nanon te UEA, ao ngkana a ongo aomata arona ni katuaaia, ao tao a na bae ni buubuti kab'araan aia bure.

8Ma ngaia are, e wareka Ana taeka te UEA n te Tembora n aron raoi ake I a tia n tuangnga b'a e na karaoia.

9N te karuaiwa n nam'akaina n ana kanimaua n ririki ni uea Ieoiakim i aon Iuta, ao a aki am'aam'arake aomata i bukin anaakin nanon te UEA. E karaoaki te aki am'aam'arake irouia ake a maeka i Ierutarem ao irouia aomata ni kabane ake a roko ikekei man kaawan nako Iuta.

10Ao i mwiina, ngke a bane n ongora aomata, ao e a wareki b'aai ni kabane ake I a tia n taekin B'aruka man te niira ni boki. E karaoa aei i nanon te Tembora, man ana ruu Kemaraia are natin Tiaban te mm'aane, are te tia koroboki n bowi ni kaburebure. E mena ana ruu n te katawanang are ieta i rarikin te tabo n rin nakon Mataroan te Tembora are e Boou.

Warekakin Te Niira ni boki Nakoia Mataniwi

11Ao e mena ikekei Kemaria are natin Mikaia te mm'aane ao e ongo ana taeka B'aruka ngke e wareka te b'ai are e taekinna te UEA.

12Ngke e bane ana taeka B'aruka, ao e a ruorikaaki Mikaia nakon te bareti. E mena tamana are Kemaria n aia ruu mataniwi, b'a e bowi ma ana mataniwi nako te uea, n reitaki ma Eritiama, Teraia, Erenatan, ao Tetekia.

13Ao Mikaia e tuangiia te b'ai are e warekia B'aruka nako ia aomata.

14Ao i mwiina, a kanakoa te mataniwi are Ieuri ma Teremia b'a a na taetae nakon B'aruka ni kaangai, “Uotaamai te niira ni boki nakoira.”

Ao ngke e roko B'aruka ma te niira ni boki,

15ao a taku mataniwi, Taiaoka ma tekateka ni warekia nakoira,” ao e karaoa arei.

16Ao ngke a tia n ongo te b'ai are e koreaki i nanon te niira ni boki, ao a raraoma ao a taku bon irouia, “E na bae n tangiria te uea n ongora te b'ai aei!” Ao a rairaki nakon B'aruka, ao a titirakinna ni kaangai,

17“Iai ae e tuangko b'a ko na korei baikai i aon te niira ni boki?”

18Ao e kaeka B'aruka ni kaangai, “Eng, bon Ieremia. I korei ni kabane baike e taekin nako iu.”

19A taku mataniwi akekei, “Ko na riai n nako ma Ieremia ni karabaingkami, ao akea temanna ae kam na kaota nnemi nakoina.”

20A kaaki te niira ni boki arei mataniwi akekei i nanon ana ruu Eritiama, are te tia koroboki n te bowi ni kaburebure, ao i mwiina, a nakon ana katawanang te uea, ike a ribootin iai b'aai ni kabane nakon te uea.

21Ao i mwiina, e kanakoa Ieuri te uea n anaa te niira ni boki. E anaia man ana ruu Eritiama ao e warekia nakon te uea ao ana mataniwi ni kabane ake a teitei i rarikina.

22Bon tain te kam'aitoro te tai arei, ao e tekateka te uea n ana bareti are baretin te kam'aitoro i rarikin te ai.

23Ngke e a bon tib'a bane warekan tenua ke aua te raain i roun Ieuri, ao e a korouaia naba te uea n ana biti ae e uarereke ao e karenakoa nako nanon te ai. E karaoa anne ni karokoa e bon bane raoi ni bue te niira ni boki arei.

24Ma e aki maaku te uea ao a aki maaku naba ana mataniwi ni b'aai ni kabane ake a ongo ao a bon aki kaota naba te mata n nanokawaki.

25E ngae ngke e butiaki te uea irouia Erenatan, Teraia, ao Kemaria b'a e na aki kabuoka te niira ni boki ma e aki kani kubariia.

26Ao te uea e tuanga natina te mm'aane are Ierameera b'a e na kaira Teraia ao Teremia ma n nako ni katika B'aruka ma ngai. Ma e karabaira te UEA b'a ti na aki reke irouia.

Ana Kauoua Niira ni boki Ieremia

27I tuanga ngkoa B'aruka b'a e na koroi i aon te niira ni boki ma e a tia ni kabuoki te uea are Ieoiakim. Ma ngaia are, e a manga tuangai te UEA

28b'a N na manga anaa te niira ni boki teuana ma ni koroi i nanona b'aai ni kabane ake a tia ni koreaki n are te moan niira ni boki.

29Ao i mwiina, e tuangai b'a N na taetae ni kaangai nakon te uea are Ieoiakim:

Ko aki ti kabuoka ana niira ni boki Ieremia, ma iai naba iroum te kan ataia b'a e aera ngkai e koreaki b'a e na roko uean B'aburon ni buakana ma n urua te aba, tiringiia aomata ni kabane ao ai uana naba ma taiani man.

30Ma ngaia are, boni Ngai ae te UEA ae I berita b'a ko na tiringaki ao e na karenakoaki rab'atam i aon te tano. E na ruonna kabuebuen taai n te ngaina, ao te kam'aitoro n te tairiki. Ao akea mai buakoia am kariki ae a na manga uea i aon Iuta.

31Ko buakaka ngkoe ma natim, ao am taani m'akuri, ao N na katuaaingkami ni kabane. I kauringkami ma kaain Iuta ao kaain Ierutarem ngkoa b'a N nang karokoa te kabuanib'ai, ma bon akea mairoumi ae e kan ongo. Ma ngaia ae ngkai kam a reke n te kaangaanga!

32Ao i mwiin banen ana taetae te UEA nako iu, ao I a manga anaa te niira ni boki teuana ao I angan B'aruka. Ao I a tuangnga b'aai ake e na koroi i aona, ma ngaia are, kanoan te kauoua n niira ni boki aei bon ti te bo raoi ma are e kabuokia Ieoiakim.