1Ngke E ruo Iesu man te maunga, ao a iria aomata aika rangi ni m'aiti.
2Ao noria, e roko temanna ae rebera ao e katorobubua ni bobaraaki i matana ni karinea, ao e taku, “Te Uea, ngkana nanom, ao Ko kona ni kaitiakai.”
3E arora baina Iesu ao E riingnga, ao E taku, “Bon nanou; Ko na itiaki!” Ao e a rina naba n toki reberana.
4E taku Iesu nako ina, “Taraia b'a ko na aki tuanga temanna taekan te baei; ma naako moa kaotiko nakon te ibonga, ao anga te karea n ai aron are e tua Moote, b'a te b'ai ni kakoaua nakoia aomata.”
E a Kamaiuaki ana Toro Mataniwin te Taanga ni Buaka(Ruka 7.1-10; Ioa 4.43-54)5Ngke E roko Iesu i Kaberenaum, ao e nako Ina mataniwin te taanga ni buaka ae tebubua m'aitini kaaina, ni butiia,
6ao e taku, “Te Uea, e wene n aoraki au toro n au auti. E aki kona ni kakam'akuri, ao e korakora marakina.”
7Ao E taku Iesu nako ina, “N na nako ni kamaiua.”
8Ma e kaeka mataniwin te taanga ni buaka are tebubua kaaina, ao e taku, “Te Uea, I aki tau b'a Ko na rin i nanon au auti: ma an taetae naba, ao e a marurung naba au toro.
9B'a te aomata ngai ae I mena i aaia ake a kakannato riki nako iu, ao iai tautia aika I mataniwi i aoia: ngkana I kangai nakon temanna, ‘Naako!’ ao e nako; ao nakon temanna, ‘Nako mai!’ ao e roko; ao nakon au toro, ‘Karaoa aei!’ ao e karaoia.”
10Ngke E ongo taeka aikai Iesu, ao E mimi iai; ao E taku nakoia ake a iria, “E koaua ae I a tuangngkami b'a akea i buakoia Iteraera ae I kunea b'a iai ana onimaki ae korakora n aron aei.
11 ike a na tang ma n tenai riaia iai b'a kaotan ae a rotaki n te maraki ae korakora.”
13E taku ngkanne Iesu nakoni mataniwin te taanga ni buaka are tebubua kaaina, “Ko na nako; ao e na karaoaki nako im n ai aron am onimaki.”
Ao e a kamaiuaki ana toro n te aoa naba arei.
Kamaiuaia Aomata aika Bati(Mareko 1.29-34; Ruka 4.38-41)14Ngke E rin Iesu n ana auti Betero, ao E nora tinani buuni Betero b'a e wene n aoraki n te kabuebue ae korakora.
15E riinga baina Iesu, ao e toki kabuebuena; ao neierei e tei rake ao e touati i bukina.
16Ngke e a tairiki, ao a uotaki nako Ina aomata aika bati aika taniaki irouia taimonio; ao E kanakoia anti aika buakaka akekei ni m'aakan ana taeka, ao E kamaiuia ni kabaneia aomata ake aoraki.
17B'a e na kakoroaki bukin are e atongaki iroun Itaia are te burabeti ngke e kangai,
“E kamaiura mani mamarara
ao e uoti nako aorakira.”
A Kataaki Uoman ake a kan Ira Iesu(Ruka 9.57-62)18Ngke E noriia aomata aika rangi ni bati Iesu i rarikina, ao E tua b'a a na nako tanimainikun te nama.
19E roko te tia koroboki temanna, ao e taku nakon Iesu, “Te Tia Reirei, N na iririko nakon te tabo are Ko na nako iai.”
20E taku Iesu nako ina, “Iai nneia ni maeka kameaanti ao ngaoia manin aan-nang, ma akea nnen Natin te Aomata ae E na kawenea iai atuna.”
21Ao e taku ana reirei temanna nako Ina, “Te Uea, kariaia b'a N na nako n tauna moa tamau.”
22Ma E taku Iesu nako ina, “Ko na irai, ao katikuia maate b'a a na bon tauniia aia mate.”
E a Katokaki Buakan te Nama(Mareko 4.35-41; Ruka 8.22-25)23Ngke E toka n te booti, ao a iria ana reirei.
24Ao noria, e roko te buaka ae korakora n te nama, ao a b'aroa nanon te booti naao; ao E matu Iesu.
25Ao a nako Ina ana reirei ni kautia, ao a taku, “Te Uea, kamaiura; ti mate!”
26Ao Ngaia E kangai nako ia, “Kam aera ngkai kam maaku? Ngkami aika a karako ami onimaki!” Ao E tei rake, ao E takua te ang ma naao, ao e a bati naba te ariki.
27Ao a mimi aomata akekei, ao a taku, “Te aeka n aomata tera Teuaei? Ngkae a ongo i Rouna te ang ma naao!”
A Kamaiuaki Uoman Aomata aika I-Katara aika a Taniaki n te Taimonio(Mareko 5.1-20; Ruka 8.26-39)28Ao ngke E roko i tanimainikun te nama i abaia I-Katara ao E aitara ma uoman aomata aika oti nako mani nneia maate. A taniaki uaakai irouia taimonio, ao a rangi n unun n te aro ae akea ae kona n rikekei.
29Ao noria, a takarua ni kangai, “Tera am b'ai i roura, Ngkoe, ae Natin te Atua? Ko nako mai ni kamarakira ngkae e tuai n roko te Bongi ni Motiki-taeka?”
30Iai te nanai ni beeki ae bati, aika kume n am'arake n te tabo ae aki raroa mai rouia.
31Ao taimonio akekei a butiia ni kangai, “Ngkana Ko kaotinakoira, ao kanakoira nako nanoia te nanai ni beeki.”
32Ao Ngaia E taku nako ia, “Naako.” Ma ngaia are a oti nako, ao a nako n rin i nanoia beeki; ao noria, a bane ni biri nako beeki n toua are e rangi ni karabee nako nanon te nama, ao a mate n te ran.
33A biri nako uake a tararuaia beeki, ao ngke a roko n te kawa, ao a karakini b'aai ni kabane ma b'aai ake a riki nakoia uake a taniaki irouia taimonio.
34Ao noria, a bane n oti nako kaain te kawa arei b'a a na kawara Iesu; ao ngke a noria, ao a butiia b'a E na nako mai abaia.
Who We AreWhat We EelieveWhat We Do
2025 by iamachristian.org,Inc All rights reserved.
