1Te Atua, kamaiuai!
Ae N nangi b'ab'a.
2Ae I a tabe n inako,
n te tabo ae akea iai te tabo n tei;
I mena n te tabo ae marawa,
ao I a kani kab'ab'aai n naao.
3I a kua ni weewete i bukini buokau,
ao e a b'aka buau.
A kai matau n taratara nako
ni kakantaninga buokau mairoum.
4Te koraki ake a ribaai n akea bukina
a m'aiti riki nakoni m'aitin iran atuu.
A tabeki taeka ni kewe n eekainako iai;
A korakora ake a kani kamateai.
A tauai ma te matoa b'a N na kaoki b'aai ake I aki I raei.
5Te Atua, Ko ataa roon nanou;
ao a aki raba au bure mairoum;
6Te Uea ae te UEA are Moan te M'aaka,
I bia aki riki b'a te b'ai ni kamamaa nakoia ake a onimakiniko!
Atuaia Iteraera,
I bia aki riki b'a te b'ai ni kab'ainrang nakoia ake a taromauriko.
7A tia ni mwemwe taeka ni kamaraki nano nako iu i bukim,
Ao I taonaki n angin te mamaa ae bati.
8Ai aron ae te iruwa ngai nakoia tariu,
ao te Ianena nakoia kaain au utu.
9Ai aron te ai ae ura tangiran am Tembora i nanou;
A b'akarai taeka i bukim, aika taeka aika bubuaka.
10Ngke I aki mamatam ni kaota iai kananorinanoau
Ao a taetae n un iai aomata nako iu;
11Ngke I kunnikaiai ni kunnikaiu are b'ain te nanokawaki,
Ao a ngareakinai iai.
12A tataekinai i nanoni kawain te kaawa,
Ao a karioaki anene aika iai taekau iai irouia taani moi manging.
13Ma ngai, N na tataro nakoim, te UEA;
Ko na kaekaai, te Atua, n am Tai are Ko taku.
Ko na kaekaai ni m'aitin am Tangira,
ngkai ko kawakina am berita ni koauan am Kamaiu.
14Ko na kamaiuai b'a N na aki i nako i nanon te riburibu,
Kawakinai ao kamaiuai mairouia ake a riribaai
ao mai nanoni marawa.
15Ko na tai kariaia b'a e na taonai nako te ieka;
Ko na tai kariaia b'a N na b'ab'a n te tabo ae marawa,
Ke ni kaiiaki nako nanon te ruanimate.
16Te UEA, Ko na ongo irou, n raoiroin am Tangira ae teimatoa;
Ko na tanimai nako iu ni m'aitin am Nanoanga!
17Tai karabako mairoun am Toro;
Bareiko, buokai, b'a I taonaki n te kaangaanga ae korakora.
18Ko na nako iu, ao kamaiuai;
Kamaiuai mairouia taan ribaai.
19Ko ataa arou n taetaebuakaki,
ao arou naba ni kamangoraki ma ni kamatauningaaki;
Ko noriia taan ribaai.
20A riki aia taetae n iowawa nako iu
b'a uruan nanou, ao I rawaawata iai.
I kaantaninga nanoangakiu, ma akea ae e reke;
Ao akea naba ae e reke i bukini karauan nanou.
21Ngke I baki, ao a anganai te am'arake ae kanga e kaboitinaki;
Ngke I taka, ao a anganai te moi ae mao ae kamangingi.
22Ngkana a am'arake n tain te baka n am'arake, ao a bia m'aane n ai aroia
mannikiba aika m'ane n te b'ai ni kam'am'ane.
23Ko na kamataki mataia!
Kamamaarai korakoran riin nukaia n taai nako!
24Kaota unim nakoia;
Kakioia ngkana e korakora unim ao a na reke iroum.
25E bia kitanaki aia tabo ni maeka, n
akea naba temanna ae maiu ae na tiku ni mwengana.
26A b'ainikiriniia te koraki ake Ko a tia ni karawawataia;
A tataekin kainanoia te koraki ake Ko a tia ni kamarakiia.
27Ko na tau mwin aia bure ni kabane;
Ko na aki kamaiuia.
28A bia kamaunaki araia mani bokin te maiu;
A bia aki karinaki araia i rarikin araia am Aomata.
29I maraki ao I rawaawata;
Te Atua, tabekai rake ao kamaiuai!
30N na anene ni kamoamoa te Atua;
N na neboia ma te nano ni katituaraoi.
31E na tangiraki riki aei iroun te UEA
nakon anganakina kaao-m'aane b'a taiani karea.
32Ane a na kukurei akana a b'ainikirinaki ngkana a nora kamaiuau;
A na kauungaki nanoia akana taromauriko.
33E ongo te UEA irouia akana kai nanoia,
Ao E aki m'anuokin taekaia ana aomata akana taenikai.
34Ke e kamoamoaa karawa ma aonnaba,
ma marawa, ma kanoana aika baika kakam'akuri.
35B'a E nang kamaiua Ierutarem,
Ao E na manga katei kawan nako Iuta.
A na maeka ana Aomata ikekei ao a na abana te aba;
36A na abanna naba aia kariki akana toro i rouna,
Ao a na maeka iai akana tangira te UEA.
Who We AreWhat We EelieveWhat We Do
2025 by iamachristian.org,Inc All rights reserved.
