Ieremia 15 - Kiribati New Version Bible

A Na Mate Kaain Iuta

1E taku te UEA nako iu:

Ngkana arona b'a a mena ikai Moote ma Tamuera, ma n tataro i bukimi, ao N na bon aki bita naba nanou. Ma ngaia are, N na kanako ia kaain Iuta.

2Ao i mwiina, a na titiraki b'a a na kanakoaki nakea, ao tuangiia Au taeka Ngai ae te UEA ae e kaangai:

Tabeman maibuakomi a na mate

n te aoraki ae e kamaamate.

Ao tabeman, a na mate n te buaka

ke n te baki.

Ao nikiraia ana uotaki

nako abaia ianena.

3N na katuaaingkami

ni kawai aika aua aika a kakaokoro.

Ane kam na mate n te buaka

ao a na katitikaki nako

rab'atami irouia kamea,

a na kanaki irikomi irouia mannikiba,

ao a na kam'akeruaki riimi

irouia maan aika a aki manana.

4E na riki te rekenikai aei

i bukin b'aai aika a buakaka

ake e karaoi ami uea are Manate

Ao kam na ribaaki irouia

botannaomata ni kabane.

5Kaain Ierutarem,

antai ae e na nanoangaingkami?

Iai ae e na titirakiningkami

b'a kam uara?

6Au aomata, kam a tia ni katukai

ma ni kitanai.

I a kua ni kaotan te akoi.

ao bon anne bukina ngkai N na tiringkami

7ma ni kamaenakoingkami kaanga te uteute

ae e ukaki nako n te ang.

N na katuaaingkami n te nanokawaki

ao te mate

i bukina ngkai kam rawa

ni biti aromi.

8A m'aiti riki aine aika a mate buuia

i aon Iuta

nakon tanon te bike.

E na roko buakanakimi ae kamimii n te tawanou!

Ao tiina i Ierutarem ana tang i bukiia natiia.

9E rawaawata nanon te tina

ao e nikobuaka.

A tia n onikaki ana bong aika a oota

nakon te rootongitong

i bukin mateia natina mm'aane

aika a itiman.

N na tiringiia ni kabane taian nikira ni maiu.

Bon aei au taeka Ngai ae te UEA.

Ana Ngurengure Ieremia

10Tera ngke I aki bungiaki!

I aki toki n reke n te kangaanga

ma kaain Iuta ni kabane.

I aki taatangoa te m'ane ke n taarau.

ma a bane ni kamaraiaai aomata nako

n te aro ae ti te arona.

11Ao E kaeka UEA ni kaangai,

“I berita b'a N na kaawakiniko,

ngkana e roko te kabuanib'ai,

ao nako ia naba ami kairiribai ngkana a buubuti buokaia.” A Aki Konaa Ni Konaaki KairiribaiE taku te UEA nako iu:

12Kaain Iuta,

kam aki konaa ni konaia kairiribai

aika a na buaka

mai meang

n aron ae kam aki konaa n urua te biti

ae e renganaki ma te buraonti.

13N na anganiia ami b'ai ni kabane

i bukina b'a kam a tia ni bure

n taabo nako i aon abami.

14Bon te ai uniu

ae e aki konaa n tiringaki,

Ma ngaia ae, N na karikingkami b'a aia toro

ami kairiribai

i abaia ianena. Ngurenguren riki Ieremia

15Kam bon noora aron karawaawatakiu

n taeka aika a kamaraki aika a aki toki n rooroko,

ao I karaoi baikai ni kabane i bukim te UEA.

Ko na aki taotaona nanom

nako ia au kairiribai;

Ko na irataangau nako ia

i m'aain ae a tiringai.

16I rangi n ongotaeka,

ngke Ko taetae nako iu,

i bukina ngke bon Am b'ai ngai,

te UEA ae Moan te M'aaka.

17I aki kaei bootaki ni kukurei

ni kakukureiai iai.

Ma I kaawakinai,

i bukina ngke Ko a tia ni kaonai

n unim.

18I ikoaki kaakaiaki

ao e aki tootoki marakiu.

Ko nang kab'araa nanou

kaanga te raanga n ran ae e a m'auteretere

i nanon tain te aumaiaki ae e kabuebue?

Ana Kaeka Te UEA

19Ao E taku te UEA nako iu:

Ko na aki katoka taetaem kaanga te baba!

N na karikiko riki

b'a Au burabeti

ngkana ko okirai

ma n taetaekina au rongorongo.

I taku b'a a na kariaia

te b'ai ae ko taekinna kaain Iuta.

Ma ko konaa ni kaaitarai aia m'akuri nako aika a kamaraki,

20i bukina b'a I kakorakorako,

kaanga te oo te buraonti.

A buakaka ao a tiritiri,

ma N na mena i rarikim ikekei ni kamaiuko

21ngkana a buakaniko.

Bon aei au taeka Ngai ae te UEA.