Otea 2 - Kiribati New Version Bible

1Ma ngaia are, a na aranaki tarim b'a “Au aomata” ao m'anem a na aranaki b'a “Akoan te Tangira”.Ana Berita Te UEA

E Na Katuaaea Iteraera

2Bukinna! Bukina tinam!

Ai tiaaki buu,

ao ai tiaki buuna

Ngai ae te UEA.

Butiia b'a e na katoka arona n riki b'a ainen matawa

ma ana aki kakaonimaki nakon buuna,

3b'a I kaawa ni buuta kunnikaina ni kabebekanna

kaanga te bong are e moan bungiaki iai.

N na karikia b'a e na kanoabo

kaanga te rereua,

ao e na mate n te taka.

4A riki natim man uaan

ana aki kakaonimaki,

ao N na aki nanoangaiko.

5E aki kakaonimaki tinam.

E rangi ni b'ainrang ao e taku,

“N na biri n rimwiia au tangira

A bane n roko b'aai mairouia

kanau ma nimau,

kunnikaiu te riinen ao te burae n tiibu,

au b'a n oriwa ao te wain.”

6Ngai ae te UEA, N na karaoa

te oo ae kateketeke

ni kaina kawaina.

7E na biri rimwiia ana tangira,

ma a na aki reke i rouna;

E na ukoriia

ma a na aki reke.

Ao ane e na kaangai, “N na okira

moan buu.

N na bon oi n aomata riki iai.”

8E bon aki ataia b'a

bon taiani b'aintangira mairou

ana uita, te wain ao b'aan te oriwa,

kaanga taian koora ma tirewa

ake e kamanenai n taromaurian B'aara.

9N na taua taian

te uita ao te kureebe.

N na kaoki

au buraentiibu ao au kunnikai te riinen

are e rabuna iai rab'atana.

10N na buuta kunnikaina ni kabebekanna

i mataia ana tangira nako,

ao bon akea temanna ae e na konaa ni kamaiua.

11N na katoki ana bukamaru Iteraera

akea riki manga te Toa ae Moan Otin Nam'akaina,

Taian Taabati, ke taian toa ake tabeua.

12E taku, “A anganai au tangira

taian nnenikureebe ao taian aroka ake taiani biiku

b'a boou i bukin te wene ni bure.”

Ngkai, Ngai ae te UEA, N na urui

ana nnenikureebe ao arokana taian biku;

a na riki b'a taian b'ariko n uita uteute

aika a kanaki irouia maan aika a aki manana.

13N na katuaaea i bukin boong

ake e taromauria iai B'aara

ao e kabuoki taiani b'ai ni kaboiarara nakoina.

N na katuaaea i bukin boong

ake e m'aninga iai taekau

ma ni karin taiani b'ai ni katamaroa ao taian m'am'a

i bukin kab'akaia ana tangira nako.

Bon aei Au taeka Ngai ae te UEA!

E Na Buoka Iteraera Te UEA

14Iteraera, bon te UEA Ngai,

N na kam'aneingkami nakon te rereua

ma n taetae ni kamaraurau nakoim.

15N na kaoka am nnenaroka ni kureebe,

ao i mwiina te M'arua are Kangaanga

are e na riki b'a M'aruan te Kantaninga.

Ane ko na kaangai “Eng” nako iu

n aron are ko karaoia ngkoa ngke ko kairake,

ngke ko kiitana Aikubita.

16I berita b'a man te tai anne, ko na aranai b'a buum n onea mwiin te toka.

17N na bon kariaia naba b'a ko na atong araia antiia beekan aikai aika ko araniia b'a “Tooka”.

18N na kariaia b'a ko na maeka ma te rau-ko na aki manga buakanaki irouia maan aika a aki manana ao mannikiba ke ana b'ai ni kamaamate man te buaka.

19N na kariaia b'a ko na riki b'a buu n aki toki, ao tiaki te buu ae e kaboaki N na anganiko te motiki taeka ae riai, te eti, te tangira, te akoi,

20ao te kakaonimaki. Ao ane ko na ataai raoi iai b'a antai Ngai.

21N na tuanga karawa b'a e na karokoa te karau i aon te aba,

22ao e na karikirakei taian uita, taiani kureebe, ao taian oriwa n te M'arua are Ietireera.

23N na kaamae n uniki taian ati ao ni kaota te nanoanga nakon Roo-Ruam'a. N na kaangai nakon Roo-Ammi, “Bon Au aomata ngkami,” ao a kaeka ni kaangai, “Atuara Ngkoe.”