Tekaria 9 - Kiribati New Version Bible

A Na Katuaeaki Aia Kairiribai Iteraera

1Aio te rongorongo

mairoun te UEA:

E mena matana i aoia aomata ni kabane,

ai moara ra riki barongan

Iteraera.

Ma ngaia are, e katanoataa te motikitaekaia

kaawa aika

Ateraka ao Tamateko.

2E na motikaki naba taekan te kaawa

ane i rarikina

ane Amata,

ao ai uana naba ma Turo ao Titon,

ake a wanawana kaaina.

3E a tia Turo ni karaoa te nono

ma ni kab'arikoirake taian tirewa ma koora,

b'a kaanga ai aron te maange

ke te bokaboka mani kawain nako nuukan te kaawa.

4Ao ngkai E nang katuaaea Turo te UEA

n te maiu ni kainano;

e na kaiinakoi ana kaibuke nako

ma ni kaurarakei.

5A na kaai n ruru ni maaku

Atikeron ao Kata.

E na b'ara nanon Ekeron.

E na tiringaki uean Kata,

ao e na akea kaain

Atikeron.

6Aomata aika bon aekaki tabeua,

a na tekateka i Atitota

ao bon te UEA n ti Ngaia

ae E na kimoa Biritia man kakatongana.

7A na aki manga kana te iriko ni man

kaain Biritia ae e raraa

ke am'arake aika a aki itiaki.

A na riki b'a raoia

Ana aomata Atuara

man te baronga are Iuta.

Ao te Atua E na butim'aia

kaain Ekeron,

n aron naba are e karaoia nakoia kaain Iebuti.

8E taku te UEA, “N na aki mamatu

ni kakaawakina au Tembora mairouia

aika a na roko ni buakanna.

I ataa te b'ai ae e riki,

ao bon akea temanna ae e na manga

karaoa riki ae e buakaka nakoia Au aomata.”

E Taekina Rokon Te King Te UEA

9Kukurei ao takaarua

aomata ni kabane i Ierutarem,

E a tia n tokanikai ami uea,

ao E a roko ni kawaringkami.

E nanorinano

ao E toka i aon te ati;

ao E roko i aon bunin

te aati.

10Boni Ngai ae te UEA ae N na uoti nako

kaani buaka ao taian aoti

mai i Iteraera ao Ierutarem.

A na uruaki taiani kainikatebe

ake a karaoaki i bukin te buaka.

N na karokoa te rau i aoia botannaomata nako,

ao e na tautaeka ami uea

man taari nakon taari.

E moa abanueana

man te Karaanga are Iuberetiti

ni kabuta te aonnaba.

E Berita Te UEA

B'a E na Kamaiuia Taenikai

11Ngke I karaoa te boraraoi are e tabu

ma ngkami, Au aomata,

ti kanikinaea n te raraa.

Ngkai tabeman maibuakomi bon taenikai

n taian kinono aika akea te ran i nanoia,

ma N na roko ni kamaiungkami

12ma n anganingkami te kaantaninga.

Okira ami nono,

b'a N na anganingkami kaniwangami

uoua okiokin ami b'ai akana a tia n reke iroumi.

13N na kamanenaa Iuta b'a Au kainikatebe

ao Iteraera b'a Au kanoanikatebe.

N na anaia kaain Tion

b'a Au kabaang

ma ni buakaniia kaain Kuriiti.

E Na Kaawakiniia Ana Aomata Te UEA

14E na kaoti te UEA ae te Atua

nakoia Ana aomata kaanga te nang,

ao E na iti n oota

Ana kanoanikatebe kaanga te iti.

E na katanga ana buu te Atua

ma ni buaka n te ukeukenanti

mai maiaki.

15E na kaawakiniia Ana Aomata

te UEA ae Moan te M'aaka,

ao a na kamanatuaia

taani bana aika a baiteke

ma aia bana.

A na mooi ma ni kaberoro;

a na riki b'a kaanga te boora ae e on

n tain te angakarea.

16E na kamaiuia te UEA ae te Atua

n te bong arei,

i bukina ngkai bon Ana aomata ngaiia,

ao a na raneanea i aon te aba

n ai aron taiani b'ai ni katamaroa n te baunuea.

17Ai tangirakira.

A na rikirake te roronrikirake ikekei

n ai aron te uita i nanon te rereua

ke te kureebe i nanon te nne n aroka ni kureebe.