Taian Areru 40 - Kiribati New Version Bible

(Te areru mairoun Tawita i bukin te tia kaira te katangitang.)Te Tataro i bukin te Buobuoki

1I kakantaninga ana buobuoki te UEA: E kakauongo nako iu, ao E ongo au weewete;

2E katikai rake man te kinono ae kamaamate,

mai nanon te bokaboka ae nimnim.

E kateai raoi i aon te b'a,

Ao E kanakonakoai raoi.

3E reireiai b'a N na anenea te kuna ae boou,

i bukini karaoiroan Atuara.

A na nora aio aomata aika bati,

ao a na karinea ma n onimakina te UEA.

4A kab'aia akana onimakina te UEA,

ake aki rairaki nakon bouannanti

ke n raoniia akana taromaurii anti aika kewe.

5Te UEA ae Atuara, a bati am M'akuri aika kamimii aika Ko karaoi i bukira:

bon akea n ai arom!

A bati am Iango aika kamimii i bukira;

I aki konai n taekin ni kabane:

A m'aiti riki nakon aika konaaki ni warekaki!

6Ko aki tangiri karea ma angakarea;

Ko aki tua maan aika ana kabuokaki ni kab'aninaki i aon te baonikarea

ke karea i bukin kab'araan buure;

Ma Ko anganai te kona n ongo am Taeka, ao n ongeaba nako iai,

7Ao I taku, Aio ngai!

am kaetieti ibuku a bane ni koreaki ni bokin te tua.

8Ai kukurei ra ngai ni karaoa ae Ko tangiria, Atuau!

I kawakina am Tua i nanou.

9Te UEA, n aia tai ni bootaki am Aomata,

Ao I taekina te rongorongo ae raoiroi, ae taekani kamaiuara iroum.

Ko ataai b'a N na aki toki n taekinna.

10I aki karaba taekan am Kamaiu ni kainna i nanou;

I tataekina am Kakaonimaki ma kamaiuan te aba iroum.

I aki karaba taekan am Kakaonimaki ma am Atataiaomata

nakoia am Aomata n aia tai ni bootaki.

11Te UEA, I ataia e na bon aki kona

n toki am nanoanga nako iu;

N na kawakinaki raoi iroum,

B'a Ko tangirai ao Ko kakaonimaki nako iu.

12A bati kaangaanga aika otab'aniniai,

a riao m'aitiia!

A taonai nako au bure aika bati,

ao akea te bae I kona n noria;

a m'aiti riki nakon iran atuu,

ao e a b'ara nanou.

13Te UEA, taiaoka ma bareiko ni kamaiuai!

14A na bane ni mamaa ma n aki reke

aroia akana kataia ni kani kamateai.

A na rairaki n oki rikaaki ma te

b'ainrang akana tangira kaikoakau!

15A na kuba ma ni mimi ni konaakiia

akana b'ainingareai n aia taeka.

16A na bane ni kakatonga

ma ni kukurei akana nakoim.

A na aki toki akana kainanoa am Kamaiu

ni kaangai, E na neboaki te UEA!

17Ao ngai, I a kaawa, ao e kai nanou;

Ma E ururingai te UEA:

Bon te tia buobuokai ao au tia kamaiu Ngkoe, Atuau!

Bareiko ni buokai.