Itaia 7 - Kiribati New Version Bible

Reken Ana Kaantaninga Te Uea Are Aati Iroun Itaia

1Aati bon natin Iotam ao tibun Utia te m'aane, bon te uea i aon Iuta ngke a m'ananga uean Turia are Retin ao Bika are natin Remaria te m'aane are Uean Iteraera b'a a na buakana Ierutarem. Ma e aki koro bukin aia iango.

2Ngke e roko te rongorongo n ana bareti te uea ae a bootaki ana taanga ni buaka Turia ma Iteraera, ao e a rangi ni maaku te Uea are Aati ma aomata ni kabane i Iuta ao a ruru kaanga taian aroka n tain te angibuaka.

3Ao i mwiina, e taku te UEA nako iu:

Kaira natim te m'aane ane Teaiatuba ao naako kawara te Uea are Aati. E na reke iroum i aon te kawai i rarikin ana tabo te tia karao kunnikai are n tokin te kanare are e uota te ran man nnen te ran are i eta.

4Tuanga Aati b'a e na aki raraoma. Bon akea te b'ai ae e na maaka iai te uea are Retin ao Bika. E rangi ni kakamaaku uniia, ma bon akea aroia b'a ti kaanga te ai ngaiia ae a mate.

5E aki riai Aati ni maaka aia waaki ae e buakaka

6ngkai a na eekaanako man taua Iuta ao Ierutarem b'a a na karika natin Tabeera b'a e na manga uea i mwiina.

7Bon te UEA Ngai, ao I berita b'a e na aki manga riki aei.

8Bon ana kaawa n tautaeka Turia Tamateko, ao e tautaeka te Uea are Retin i Tamateko. Bon ana kaawa n tautaeka Iteraera Taamaria.

9Ma i mwiin ae e aki raka riki nakon onobwi ma nimaua te ririki, ao e na mauna Iteraera. Ao a na konaaki Aati ma ana mataniwi ngkana a aki onimakinai.

Te Nati Te Mm'ane Ae Arana Emmanuera

10Ao e a manga taetae riki te UEA ae te Atua nakon te uea are Aati. Ma e a taetae ni kaangai n te tai aei,

11“Buubutiai kanikinaean ae e na bon koro bukin au berita. Buubuti b'a N na anganiko te kanikina mai nano n aia aonnaba maate ke i eta n taiani karawa.”

12Ao e kaeka Aati, “I aki kataiko!”

13Ao i mwiina, I taku:

Ongora, ngkami ni kabane aika ana utu ni uea Tawita. Kam a tia ni kataa au taotaonaki n nano. Ngkai kam a tia ni kataa ana taotaonaki n nano te Atua ngkai kam rawa n buubutii te b'ai ni kakoaua.

14Ma e na bon teimatoa naba te UEA n anganingkami te b'ai ni kakoaua. E na bikoukou te ataeinaine E na bungiia natina te m'aane ao e na aranna b'a Emmanuera.

15Ngke e taui n ikawai te teei n ataa ae e raoiroi ma ae e buakaka,

16ao e na kaakang miriki ao ana karewe te manibeeru, ao a na kamaunaaki abaia uea ake uoman ake ko maakuia.

17Ma e na karaoi riki taian kiriwe te UEA nakoia am aomata ao abanueam nakon aika a tia n ataaki man te tai are a raaure nako iai Iteraera man Iuta. E na manga kaoka uean Aturia b'a e na buakaniko.

Taekan Te Kataenikaiaki

18E na katang te UEA ngkana e roko te tai, ao a na roko taanga ni buaka mai Aikubita kaanga taian nango ao mai Aturia kaanga taiani manibeeru.

19A na tekateka n taabo nako—i nanon taiani m'arua aika a nano ao i marenan taiani b'a, i aon taiani buakoako ao i nanon taian aba n uteute.

20E na kabooa uean Aturia te UEA b'a e na uota te m'ariro ri aon te Karaanga are Euberetiti ao e na koromaraingkami ao n iman buraen rab'atami ni kabane, n reitaki ma te buai.

21Akea temanna ae e raka ana man i aon temanna te kao te teei ao uoman te tiibu,

22ma koraki akana a raka, e na konaa n reke aia miriki i bukin karaoan te miriki bua ao ana karewe te manibeeru.

23Taian nne n aroka ni kureebe aika teuana tengaa taiani kureebe i nanona aika booia teuana tengaa taiani m'akorokoro n tirewa a na manga bitaki nakon taian aroka aika a kateketeke.

24Ko na nako ikekei ni kaeman ma te kainikatebe ao te kanoanikatebe, i bukina b'a e na onrake te aba ni kabane n taiani buakoako aika a kateketeke.

25E na kaonaki aon te tabuki are ko uniki iai ngkoa arokam n taian aroka aika a kateketeke aika a kakang. Ko na bon maaku n nako ikekei, ao a na bua am nanai ni kao, tiibu, ao taiani kooti i aon te tabuki anne.