2.Rongorongo 3 - Kiribati New Version Bible

Karaoan Te Tembora(1 Uea 6.1-38)

1A moana karaoan te Tembora are i Ierutarem ana taani m'akuri Toromon ni kauabongin te kauoua n nam'akaina, aua te ririki i m'aain rikin Toromon b'a te uea i aon Iteraera.

2E kateaki i aon te Maunga are Moria ike E kaoti iai te UEA ngkoa iai nakon Tawita n te tabo n kaaki kunni uita are ana b'ai Arauna are kaain Iebuti.

3Anaun nanon te Tembora bon 27 te miita ab'akina ao 9 te miita rababana, n aron te kainibaaire nikawai.

4I matan te Tembora bon te kaman ae 9 te miita rababana, ao 9 te miita rietana. Nanon taian kaman arei e kabiraki n te koora ni koaua.

5Ao Toromon e moan rabuna oon ruun te Tembora are e buubura n te kai ae te m'aiango, ao i mwiina n te koora, ao e a manga katamaroaa ni bannan taian baam ao tamnei aika ai aron taian tiein.

6E kamanenai taian atiibu aika a tamaroa ni katamaroaa te Tembora, ao e kabonganai taiani koora aika e kaoi mai Barewaim

7ni katamaroa iai kain te tiiring, taiani mataroa, kain taiani mataroa, ao taian oo. E tuangiia naba ana taani m'akuri Toromon b'a a na karaoa katotongan baika a maiu aika iai baiia ni kiba i aon te oo.

8Buburan te Tabo are Moan te Tabu bon 9 te miita ab'akina ao 9 te miita rababana, ao e kabiraki n te koora ae e raka i aon 20 te tan rawawatana.

9E kabaneaki e raka i aon 570 te kuraem te koora i bukin rabunan bukin taian neera. E kabiraki naba oon taian ruunib'ai aika a uarereke n te koora.

10E karaoi uoua katotongan baika a maiu ake iai baiia ni kiba Toromon ao e kaaki n te Tabo are Moan te Tabu, ao e kabiri n taiani koora.

11Baika a maiu ake iai baiia ni kiba akekei bon uaai baiia ni kiba ao aua ma te iterana te miita ab'akin bain temanna man taboni baina are teuana nakon taboni baina are teuana.

12E katikui Toromon ni kauoua i nanon te tabo are moan te tabu, ni kaaitaraa te mataroa.

13A taangaki nako baiia ni kabuta nanon te ru are ruaiwa te miita ab'akina arei.

14E karaoaki te roki man te rinen ae e raoiroi are e rarangaaki ma te karai ae e buru, beebo, ao e uraura, ao e katamaroaaki aona n taamnein baika a maiu ake iai baiia ni kiba.

Boua aika Uaai(1 Uea 7.15-22)

15A karaoaki uaai taiani boua i bukin mataroa n rin nakon te Tembora. Ab'akin teaina bon nimaua ao te iterana rietana, ao iai b'arana i taubukina ae rietana bon uoua te miita rietana.

16A katamaroaaki tabon taiani boua aikai n taiani koro tamnei aika ai aron taraan taian tiein ao tebubua katotoon taiani bamkuranete.

17E katuka te boua are teaina Toromon i maiakin mataroan te kawai nakon te Tembora. Ao e aranaki b'a Iakin. E katukaki are teaina i meangin te kawai n rin, ao e aranaki b'a Boati.