1Ao ngke a roko anera ake uoman i Tootom n te tairiki arei, ao e tekateka Roota i mataroan te kaawa are buubura arei. Ao ngke e nooriia uakekei, ao e teirake ni kawariia, ao e bobaraaki i mataia
2ao e taku, “Raou aika kam karineaki, I tauraoi ni buokingkami. Nako mai nakon ana auti ami toro. Kam kona n teboki waemi ma ni matu ikai nakon te tairiki. Ao ningabong, kam a manga uti n reitanako kawaimi.”
Ao a kaeka uakekei ni kaangai, “Ti aki, b'a ti a boni mena naba i tinaniku ikai ni karokoa te ngaina.”
3Ma e imanonoia Roota ni karokoa a iria nakon ana auti. Ao e tuanga ana toro Roota b'a e na kam'aa tabeua te kariki ma ni katauraoa te katairiki i bukiia ana iruwa akekei. Ao ngke e a tauraoi, ao a am'arake.
4Ao i m'ain matuia ana iruwa akekei, ao e a katobibiaki aia auti irouia m'anen Tootom, a bane n roko aika ikawai ma te roronrikirake,
5ao a takaarua nakon Roota n titirakinna ni kaangai, “A nga uake a na matu i rarikim nakon te tairiki? Kanakomaia nakoira.” A tangiria mm'aanen Tootom ni karaobure ma ngaia.
6Ao e otinako Roota, ao e a manga kaina te mataroa i akuuna,
7ao e taku nakoia, “I a butingkami tariu aikai, an tai karaoi m'akuri aika kammaira.
8Noria, iai uoman natiu aika bon ataeinaine, N na anganingkami, ao kam kona ni karaoa ane kam bon taku nakoia. Ma kam na aki karaoa te b'ai teuana nakoia mm'aane aikai, b'a bon au iruwa ngaiia n au auti, ao I riai ni kawakinia.”
9Ma a taku nakon Roota, “Kararoako b'a te iruwa naba ngkoe ikai. Tera am b'ai n tuangiira te b'ai ae ti na karaoia? Tai tukiira, b'a ti kaawa ni karaoa te b'ai ae buakaka riki nako im nakon are ti na karaoi nako ia.” A butuaanako Roota, ao a waakirake b'a a na urua te mataroa.
10Ma a kaotinakoi baiia mai nanon te auti uaake uoman ni katika Roota ni karinna, ao a kaina te mataroa.
11Ao i mwiina, a karokoa te matakii ae korakora irouia mm'aane ake i tinanikun te mataroa, n te aro are aki kona n reke te mataroa i rouia.
Kitanakin Tootom iroun Roota12Ao a taku uaake uoman nakon Roota, “Ngkana tao iai natim riki mm'aane, aine, buuia natim aine, ke am koraki riki tabeman aika maeka i nanon te kaawa ae buubura aei, ao kaotinakoia mai ikai,
13b'a ti nang kamaunaa te tabo aei. E a tia n ongo te UEA rongorongoia aomata aikai ae aki raoiroi, ao E kanakomaira b'a ti na kamaunaa Tootom.”
14Ao e nako Roota ni kawariia mm'aane ake a na iein ma natina aine, ao e taku, “Kawaekoaingkami otinako mai ikai; E nang kamaunaa te tabo aei te UEA.” Ma a taku b'a e manikangare.
15Ao a kataia ni kawaekoa Roota taian anera ngke e a karangaina, ao a taku, “Kawaekoako. Kaira buum ma natim aine ao otinako, b'a e kaawa ni bua maium ngkana e kamaunaaki te kaawa ae buubura aei.”
16Ma e n taninganinga Roota, ao E nanoangaia te UEA, ma ngaia are a taua baina anera akekei ma buuna ma natina aine ake uoman, ao a kanakoa man te kaawa are buubura arei.
17Ao e taku te anera are temanna, “Biiri iangoi maiumi. Tai tanrikaaki, ao tai tiku i nanon te m'arua ma biiri nakon taian tabuki, b'a kam aonga n aki mate.”
18Ma e kaeka Roota ao e taku, “Raou ae ko karineaki, tai karaoa anne nako ira.
19Kam a tia ni karaoa ae moan te korakora nako iu b'a kam a tia ni kamaiuai. Nooria, a rangi n raroa nako taian tabuki, ao ane na kauiaai kamaamaten kamaunaan Tootom i m'aain rokou n taian tabuki akekei.
20Ko noora te kaawa are uarereke arei? E kaan riki. Kanakoai ma au utu nakon te tabo ae uarereke, ma N na boni maiu iai.”
21Ao E taku, “E raoiroi, I kariaia anne, N na bon aki kamaunaa te kaawa are uarereke arei.
22Kawaekoaingkami! Biiri! Bon akea te b'ai ae N na karaoia ni karokoa rokomi raoi ikekei.”
I bukina ngke e atongnga Roota b'a te kaawa ae uarereke, ao e a aranaki b'a Tooa. Kamaunaakin Tootom ma Komora
23Ao e a oti taai ngke e roko Roota i Tooa.
24Ao e a kab'aka naba te karau te ai ao te atiibu te UEA mai karawa i aon Tootom ma Komora
25ni kamaunaia ma te m'arua ni kabane, n ikotaki naba ma aomata ni kabane ma b'aai ni kabane ake a maiu i aon te aba.
26Ma e tanrikaaki buun Roota, ao e riki b'a te boua te taoro.
27Ao e kawaekoa Aberaam n te karangaina are i mwiina ni kawara te tabo are e taetae iai ngkoa ma te UEA.
28E taraa aon Tootom ma Komora ma te m'arua ni kabutaa, ao e noora te bubu ae aetorake mai aon te aba, ae kaanga te bubu man te ai ae korakora.
29Ngke E kamaunai taian kaawa aika buubura te UEA, ake n te m'arua are e maeka ngkoa iai Roota, ao E bon uringa naba Ana berita ma Aberaam, ma ngaia are, E kabirinakoa Roota nakon te tabo ae na maiu iai.
Moan Rikiia kaain Moaaba ma Ammon30Ma e maaku Roota ni maeka i Tooa, ma ngaia are, e waerakei taian tabuki ma natina aine ake uoman, ao e maeka n taian nangananga ni b'a.
31Ao e taku natina te aine are te karimoa nakon tarina, “E a tabe ni kara tamara, ao akea taiani mm'aane n te aonnaba aei aika ti na iein ma ngaia b'a a aonga n riki natira, n aron ae e kaakaraoaki.
32Nako mai, ti na kamanginga tamara, b'a ti aonga ni kona ni wene ma ngaia b'a a aonga n riki natira i rouna.”
33Ao a anganna te wain b'a e na mooi iai n te tairiki arei, ao e a wene neiere te karimoa ma ngaia. E bon rangi ni koro ni manging Roota, ao e aki ataa te b'ai teuana.
34Ao n te bong are i mwiina, ao e taku neiere te karimoa nakon tarina, “I a tia ni wene ma ngaia ngke tairiki, ao ngkai ti na manga kamooia riki nakon te tairiki, ao ko na manga wene ma ngaia. Ao e na reke natira mairoun tamara.”
35Ao a manga kakoroa ni manging n te tairiki arei, ao e a manga wene ni bure neiere te bina ma ngaia. Ao e bon rangi ni manging naba Roota n te aro are e aki ataa te b'ai teuana.
36Ao a kaai ni bikoukou natin Roota aine ake uoman iroun tamaia n te aro anne.
37E karika natina te mm'aane neiere te karimoa, are e aranna b'a Moaaba: Boni ngaia aia bakatibu kaain Moaaba aika n taai aikai.
38Ao e riki naba natin neiere te bina ae te mm'aane, ao e aranna b'a Benammi: ao boni ngaia aia bakatibu kaain Ammon aika n taai aikai.
Who We AreWhat We EelieveWhat We Do
2025 by iamachristian.org,Inc All rights reserved.
