Etekiera 34 - Kiribati New Version Bible

Taani Kairiri i Iteraera Aika Akea Manenaia

1E taku te UEA:

2Etekiera ae natin te aomata, ti te bo taan kairiiri i Iteraera ma taan kaawakin tiibu aika a kaawakiniia au tiibu, aika Iteraera. Ma I tangiriko b'a ko na kabuaakakaia taani kairiiri aikai ma ni kaangai nakoia:

Boni Ngai ae te UEA ae I kaangai, E a roko te kaangaanga i aomi taan kairiiri i Iteraera! Kam bon iangoi aromi i bon iroumi ao kam kaaki taekaia Au tiibu.

3Kam nim aia miriki ao kam kabonganai buraeia b'a ami kunnikai. Ao i mwiina, kam tiringiia ake kabanea n tamaroa b'a kanami. Ma kam bon aki tararuaia maan!

4Kam aki roko n te kaawakiniia aika a mamaara ke ni kamaiuia aika a aoraki ke ni bauti ikoakiia aika a ikoaki. Kam kairiia mani katiotionakoia ao kam aki roko n te kakaaia aika a m'arua. Kam iowawa ao kam aki raoiroi nakoia Au tiibu.

5Ai ngaia are, a maaenako nakon taabo nako, ao a buakanaki mani kanaki irouia maan aika a aki manana.

6Ma ngaia are, a maaenako au tiibu ni kabutaa te aonnaba. A tiotio nako i aon tabuki ma maunga, ao bon akea temanna ae e tabeakiniia ni kakaaia.

7Ngkai, kam na ongora ngkami aika taani kaawakin tiibu nakon te b'ai ae N na taekinna Ngai ae te UEA nakoimi.

8Ngkai I bon maiu Ngai ae te UEA ae te Atua, ao e raoiroi riki ngkana kam ongora Irou. A tia n aki karauaki Au tiibu irouia maan aika a aki manana ake a bon tiringiia ma ni kaniia i bukina b'a akea te tia kaawakin tiibu. A bon aki kani kakaaia tiibu Au tia kaawakin tiibu. A bon iangoi aroia i bon irouia ao tiaki tiibu.

9Ma ngaia ae kam na ongora Irou ngkami aika taani kaawakin tiibu.

10I katanoataa b'a ai Au kairiribai ngkami taani kaawakin tiibu Ngai ae te UEA. N na anaia Au tiibu mairoumi ao N na aki manga kariaingkami b'a kam na riki b'a aia taani kawakin tiibu; ao N na bon aki naba kariaia b'a kam na manga iangoi aromi i bon iroumi. N na kamaiuia Au tiibu mairoumi ma n aki kariaingkami b'a kam na kang.

Te Tia Kaawakin tiibu ae Raoiroi

11I tuangkami Ngai ae te UEA b'a N nang bon kaawakiniia Au tiibu ma n tararuaia

12n aroia taani kawakin tiibu ngkana a kaawakiniia aia tiibu ake a maae nako ma ni manga kaokiia. A tia ni bua Au tiibu man te bong are e rootongitong are e kananokawaki ngke a maae nako i buakoia botannaomata. Ma N na kamaiuia

13ma ni kaokiia man aia botannaomata ianena ake a maeka iai. N na riki b'a aia tia kawakin tiibu ao N na kaam'arakeia i aon aia maunga nako Iteraera ao i nanon taiani m'arua ao taawana aika a maiu reirei.

14A na manoraoi ngkana a am'arake n taabo ni uteute aika a maiu reirei ao tabuki aika a mawaawa.

15I berita b'a N na tararuaia ma ni kaawakiniia b'a a na aki reke n te kangaanga,

16ma ni kakaaia ake a bua ma ni kaokiia ake a tiotio nako, ma ni bauti ikoakiia ake a ikoaki, ao n tararuai maiuia aika a mamaara. N na boni kamateia naba aika a marikarika ao a korakora, i bukina b'a I kakaaraoa ae e raoiroi n taai nako.

Motikan taekaia Tiibu Aika A Korakora

17E taku te UEA ae te Atua nakoia Ana tiibu, aika Iteraera:

N na tararuai raoi ngkami n tatabemaningkami nako ni kakaaea b'a antai te tiibu ae e korakora ao aika a mamaara.

18Tabeman maibuakomi a kang uteute aika manguroroo, ao i mwiina, a toubekai nikiraia ngkana a ngae. Tabeman a mooi n te ran ae e itiaki, ao i mwiina, a nakonako i nanon te ran ni kamantoaa ao ni kabokaboka nikirana.

19Are nanona b'a e aki reke kanaia ke nimaia Au tiibu ake tekorakina.

20Ma ngaia ae N na kakaokoroia aika a korakora ma aika a mamaara Ngaia ae te UEA ae te Atua.

21Kam a tia ni kamanenai koromi aika a korakora ngkami aika kam korakora ni kakioia nako aika a mamaara,

22ma N na kamaiuia ao e na aki manga karaoaki ae e aki raoiroi nakoia. N na kaokoroia aika a raoiroi ma aika a buakaka.

23I mwiin anne, N na karekea ami tia kaawakin tiibu man te utu are ana toro te Uea are Tawita. A na kaai n reke ami tia kaawakin tiibu ae ti temanna ngkami aika kam korakora ma aika kam mamaara, ao e na kaawakiningkami raoi.

24E na riki b'a ami tia kairiiri, ao N na riki b'a Atuami. Bon aei au taeka Ngai ae te UEA.

Ana tiibu Te UEA

i bukin Bong Aika A Na Roko Aika A KakukureiE taku te UEA ae te Atua:

25Bon Au tiibu te botannaomata ae Iteraera, ao I karaoa Au berita ae e matoa b'a a na maeka ma te rau. N na kakionakoia maan aika a aki manana man te rereua ao te buakonikai, b'a aonga n aki maaku Au tiibu.

26A na maeka ni katobibia Au maunga are e tabu, ao N na kakab'aiaia ni karokoa te karau ae e korakora

27b'a e na buokiia ni karekei uaan arokaia ma ni karekei aia uita. N na kainaomataia man te tautoronaki ao N na karikiia b'a a na maeka n oin abaia n akea aia kangaanga. Ao i mwiina, a na ataia b'a bon te UEA Ngai.

28A na aki manga kimoaaki irouia botannaomata aika ianena, ao a na aki manga tiringaki ni kanaki irouia maan aika a aki manana.

29N na karika aia tawaana b'a a na kariki taiani uita aika a m'aiti, b'a a aonga n aki manga baki ke ni ngareakinaki irouia ianena.

30Ao ane a na bane n ataai aia aomata nako b'a I kaawakiniia Au aomata aika Iteraera. Bon aei Au berita Ngai ae te UEA.

31Bon Au tiibu ngaiia; ao Ngai Atuaia, ao boni Ngai ae I kaawakiniia.