Taian Areru 83 - Kiribati New Version Bible

(Te Anene ao Ana Areru Ataba.)Te Tataro B'a A Na Tae Aia Kai Aiaia Iteraera

1Te Atua, Ko na tai kainab'aabu,

ao Ko aoriko n akea te b'ai ae Ko karaoia!

2Taraia am Kairiribai! a kiriwe;

ao a rawa ni kan aantaeka iroum akana ribaiko.

3A kario iango ni karaba aika a na ekianako nako iai am Botannaomata;

A kario iango n ribuaka aika a na kabuanib'ai iai am Aomata ake Ko kakawakiniia.

4A taku, Nako mai; ti na

urua aroia ni botannaomata,

b'a e aonga n aki manga uringaki

taekan Iteraera.

5A bo nanoia n aia iango ao a

botiia aia aomata b'a a na ekiko nako:

6kaain Etom ma kaain ana utu Itimaera;

Kaain Moaaba ma taian Akeraite

7ma kaaini Keeb'ara, ma kaain Ammon,

ma taian Amareka, ma kaain Biritia, ma kaain Turo.

8A raonaki naba irouia kaain Aturia, are te botannaomata ae matoatoa

ae raoraoia I-Ammon ma I-Moaaba, ake a riki mairoun Roota.

9Karaoa nakoia te baere Ko karaoia nakoia I-Mirian,

ma nakon Titera ma Iabin, n te karaanga are Kiton.

10Ko katae aia kai i Entora,

Ao a wene ni mka rab'ataia i aontano.

11Karaoa nakoia aia toka te baere Ko karaoia nakon Orebi ma Teebi;

Katae aia kai aia uea n aron are Ko karaoia nakon Teba ma Taremunna,

12ake a kaangai, “Ti na taua b'a ara

b'ai te aba are ana b'ai te Atua.”

13Atuau, kauamaaeia kanga ai aroni bubun aontano,

ke te maange ae ukaki nako n te ang.

14Aron te ai ni kabuoka te buakonikai

ao ni kaurarakei aoni maunga,

15Ao ai bon arom naba ni kakioia nako

n am Ukeukenanti, ao ni kakamakuia iai.

16Te UEA, Ko na karaoa ae a na rangi ni mamaa iai,

B'a a aonga n rairaki nakoim.

17A na oreaki aia kainikatonga ma ni kakamaakaki n aki toki;

A na mate ma te b'ainrang ae bati.

18A na ataiko b'a Ngkoe ae te UEA,

bon ti Ngkoe ae Moan te Rietaata

i aonnaba ni kabane!