Neemia 8 - Kiribati New Version Bible

Warekan Ana Boki N Tua Te Atua Iroun Etira Nakoia Aomata

1Ni moanibongin te kaitiua n nam'akaina, ao a bootaki aomata n te tabo ae e kamataata i matan te Mataroa are te Ran.

2Ao i mwiina, a titirakina Etira, are bon te tia reirei n ana Tua Moote, b'a e na wareka nakoia kanoan te Tua anne are e a tia n anga te UEA nakoia ana aomata. Ao e roko Etira ma te Tua ao e tei i mataia te koraki ni m'aane, aine ao ataei akekei aika a boni konaa n ataa nanon te b'ai are e warekaki.

3Ao e wareka ana Tua Moote nakoia man te moaningabong ni karokoa te tawanou, ao a bane ni kakauongo raoi.

4E tei Etira i aon te kaintoka ae e rietaata ae te kai ae e a tia ni karaoaki i bukin te bootaki anne. A tei Matitia, Tema, Anaia, Uria, Irekia, ao Maateia i angaatain Etira, ao a tei mai angamaingina Betaia, Mitiaera, Marikiia, Atum, Ati-Batana, Tekaria, ao Meturam.

5E mena Etira i aon te kaintoka ae e rietaata, ike e konaa n nooraki iai irouia aomata nako, ao ngke e kauka te boki, ao a bane n teirake.

6Ao e neboa te UEA ae te Atua Etira, ao a takaarua aomata ni kaangai, “Amen! Amen!” Ao i mwiina, a boobaraaki nako aontano ao a taromauriia te UEA.

7Ao i mwiin anne, ao a nako Kanoan Rewi, Ietua, Bani, Terebia, Iamin, Akuba, Tiabetai, Oria, Maateia, Kerita, Ataria, Iotabata, Anan,

8ao Beraia i buakoia aomata ni kab'arab'araa nanon te b'ai are e warekia Etira.

9Ao a tang aomata ngke e a warekaki ana Tua te Atua nakoia. Ao i mwiina, e taku Neemia are te koowana, Etira are te ibonga ao te tia reirei, ao kanoan Rewi ake a tia n reireiniia aomata, “Bon aio te bong ae e kaokoro i bukin ami UEA ae Atuami. Ma ngaia ae kam na aki nanokawaki ao kam na aki tang!”

10Ao e taku Neemia nakoia aomata, “Kam na kukurei ni kang kanami ao n nim nimami aika a raraoi ao ni i buokanib'ai iai ma raomi aika akea uotaia. Kam na aki nanokawaki! Bon ana bong te UEA ae e kaokoro te bong aei, ao E na bon kakukureingkami ma ni korakoraingkami.”

11Ao a kakorakoraia aomata kanoan Rewi ni kaangai, “Bon te bong ae e tabu te bong aei, ma ngaia ae, kam na aki raraoma ke n tang!”

12Ao ngke a oki aomata nakon mwengaia, ao a kukurei n am'arake ao n tib'ai kanaia ma raoia aika a tangira buokaia, i bukina ngke a ataa nanon te b'ai are e a tia ni warekaki nakoia.

Te Toa ae M'anganikaai

13A bootaki taani kairiiri man m'akoron taiani utu ni kabane ma taiani ibonga ao kanoan Rewi ni kauabongin te kaitiua n nam'akaina, b'a e aonga ni konaa Etira n reireiniia te Tua

14are e a tia te UEA n angan Moote. A ataia man te Tua ae a na riai aomatan Iteraera ni maeka i aani m'anganikaai ngkana a bukamarua te toa n te kaitiua n nam'akaina n te ririki.

15A tib'a ataia naba ae a na riai n nako buakonikai ma ni karekei m'anganikaai ma aroka aika a m'aiti baaia n aron oriwa, motere, ao taiani baam i bukin taiani katantan.

16Ma ngaia are, a booboti m'anganikaai aomata ao a karekea b'a te katantan i aon taubukin aia auti aika a booraoi aoia, ma katawanangin aia auti, ao katawanangin te tembora, ao te tabo ae e uki i rarikin te Mataroa are Ran ao te Mataroa are Eberaim.

17A bane ni karaoi katanaia aomata ni kabane ake a oki mai B'aburon. A maeka iai ma ni kukurei ni kauringa aia moan tai ni karaoa te Toa ae M'anganikaai mai i mwiin ana bong Iotua are natin Nun te m'aane.

18Ni katoa itiua te bong n te Toa, ao e aki toki n wareware Etira man ana Tua te Atua. Ao n te kawani bong, ao a bootaki aomata n taromauri, n aron are e taekinna te Tua b'a a na bon riai ni karaoia.