Taian Areru 60 - Kiribati New Version Bible

(Ana b'ai te tia kaira te anene: n te b'ana ae Kiebun te Boraraoi. Ana Areru Tawita; te b'ai n reirei; ngke e buakaniia I-Aramnaaraim ma I-Aramtoba, ngke e oki Ioaba, ao e kamateia tebwi ma uoua tengaa I-Etom n te M'arua are Tari.)Ko Kona ni Kantaninga iroun te Atua

1Te Atua, Ko a tia n ribaira, ao Ko uruira;

Ko a tia n un iroura-ma an rairaki nakoira ngkai.

2Ko a tia ni kam'aeieia aon te aba, ao Ko a tia naba ni bwenauaia ni kaukia;

katoka ikoakina ngkai, b'a ae e nang aki reke arona.

3Ko a tia ni karaoa ae a na rangi ni kainano iai am Botannaomata;

Ti bebebebe n ai aron ae ti manging.

4Ko a tia ni kanakoa am Taeka ni Katauraoi nakoia ake iai karineam irouia,

b'a a aonga ni maiu man te kabuanib'ai ngkana e roko.

5Ko na kamaiura ni m'aakam; ao ongo ara bubuti,

b'a a aonga ni kamaiuaki aika tangiraki iroum.

6E a tia n taetae te Atua man ana Tembora are Tabu ni kaangai,

“N te tokanikai ao N na koro-m'akoroa aon Tekem

ao N na tib'aa nako nanon te M'arua are Tukota nakoia au Botannaomata.

7Bon abau Kireata, ao abau naba aban Manate;

otangan atuu Eberaim,

ao Iuta ai aroni m'akau n tautaeka.

8Ai aron au beetin n uati Moaaba,

ao N na tewenakoi au kauniwae i Etom,

b'a kanikinaean ae I b'ainna.

A iangoia kaain Biritia b'a a na takaakaa n tokanikai i aou?”

9Te Atua, Antai ae e na kairai nakon te kaawa are nonoaki?

ke nako Etom?

10Ko a ribaira?

ao Ko a aki kan iria ara taanga nakon te buaka?

11Ko na buokira ngkana ti buakaniia aiara;

b'a akea te aomata ae kona ni buokira.

12Ti na tokanikai ngkana E raoniira te Atua;

E na katae aia kai aiara.