1-2Kam na katanoata ni katoa koron itiua te ririki ni kaangai, E taku te UEA b'a a na aki kab'araaki taian roun. Ngkana iai te m'ane ae ko rouniia iroun te Iteraera temanna, ao ko na aki manga tangira kab'araana.
3E na ti b'ainaki taian tua aikai n taian roun bon i marenaia Iteraera. Ao taian iruwa a na bon kab'arai mwiin b'aai ake ko karouniia iai.
4-6Bon akea ae na kainano mai buakoia Iteraera. E na anganingkami te aba aei te UEA ae Atuami, ao E a tia ni berita b'a E na katetekeraoingkami, ngkana kam ongotaeka nakon ana Tua ma ana Reirei aika I anganingkami n te bong aei. Kam na anga ami m'ane b'a a na tangoaki irouia botannaomata aika bati, ma kam na aki tangom'ane mairouia. Kam na tautaekaniia botannaomata aika bati, ma a na aki tautaekaningkami.
7I mwiin anganakimi abami n tatabemani ngkami, ao ane e na bon iai naba Iteraera ae maeka n ami kaawa ae na kainano. Ngkana iai ae riki irouia anne, ao kam na aki tauti ke n nanonrang n ami m'ane.
8Ma kam na akoia, ao anganiia te m'aiti ae a kainanoia b'a a na tangoia.
9Kam na taratara raoi b'a kam na aki kaangai i nanomi, Ae a kaan te kaitiua n ririki, ao ae e na aki okirai au m'ane. E na rangi n rawaawata ami bure ngkana kam karaoa anne, ao ngkana kam rangi n nanonrang naba n aki kan anganiia aika kainano buokaia. Bon am koraki, ao ngkana ko rawa ni buokiia, ao e aki ngkoa ao a butia naba te UEA, b'a E na baairei taekami b'a kam bure iai ke kam aki. Ao ane a na tua b'a kam bure.
10Kam na riai ni kukurei n anganiia aika kainano baika a tangiria, b'a i mwiina, ane E na kakatekeraoingkami te UEA ni b'aai ni kabane aika kam karaoi.
11Ane a na bon iai n taai nako tabeman Iteraera aika kainano ma n tangira buokaia. Ao bon anne bukina ngkai I mwiokoingkami b'a kam na tituaraoi nakoia.
Kainaomatakiia Tooro(Te Oti 21.1-11)Ao e taku Moote:12Ngkana iai iroumi ae kabooa Iteraera b'a ana toro, ao kam na kainaomataia i mwiin onoua te ririki.
13Ao kam na aki ti tuangiia b'a a nang nako b'a a inaomata, ma karekei aia b'ai aika a na uoti,
14anganiia taian tiibu ao kooti, ao taian uita ma taian wain aika raoiroi b'a uotaia. Kam na kam'aita anganakiia, n aron kam'aitakin anganakimi naba iroun te UEA.
15I mwiokoingkami b'a kam na ongotaeka iroun te UEA b'a kauringakimi b'a bon tooro ngkoa ngkami i Aikubita i m'aain kainaomataakimi i rouna.
16Ngkana e kaangai temanna ami toro, I tangiriko ma am utu, ao I maiu riki ngkana I tiku iroum. Ma ngaia are, I butiiko b'a ko na aki kanakoai.
17Kaira te toro anne kaaniia nakon mataroan am auti, ao karina te biti ae kakang i reben taningana ni kanimm'a nakon te mataroa. A na riki tooro akanne b'a am toro ni karokoa tokin maiuia, a aoria ngkana m'aane ke aine.
18Kam na aki ngurengure ngkana kam kainaomata te toro. B'a kam a tia ni kabanea onoua te ririki ni kam'akuria n iteran boon te aomata ae kabooaki.Manikawakawa Aika Karimoa(Nak 27.26,27; War 18.15-18)Ao e taku Moote nakoia Iteraera:
19Ngkana te karimoa te m'aane natin te kao ke te tiibu ke te kooti, ao e na riai n anganaki te UEA. Kam na aki anaia karimoa m'aane aika kao b'a ami man ni m'akuri, ke ni koroburaea te karimoa te tiibu ae te m'aane.
20Ma, kam na uoti karimoa m'aane mai buakoia man aika kawakawa aikai nakon te tabo are E a tia n rineia te UEA ae Atuami b'a taabo n taromauri. Kam na kareaniia ma ami utu nakon te UEA, ma ni kanna b'a m'akoron te am'arake are tabu.
21Ma ngkana e m'auku, ke e matakii, ke iai toabuakan b'ain rab'atana teuana, ao kam na aki kareanna nakon te UEA ae Atuami.
22Kam kona n tiringnga ma ni kabooa nako n te tabo are kam maeka iai, ma ni kanna n aron kanakin irikon te ria ke te katere n aron are kam tiringnga ake konami ni kaeman. A kona naba ni kanna aomata akana a kam'araa ao a aki tau nakon te taromauri.
23Ma kam na bon aki kana raraan te man, katinakoa raraana nako aon tano.
Who We AreWhat We EelieveWhat We Do
2025 by iamachristian.org,Inc All rights reserved.
