2.Uea 13 - Kiribati New Version Bible

Uean Iteraera are Ieoaati

1E riki ni uea Ieoaati are natin Ieu i aon Iteraera n ana ka 23 n ririki ni uea Ioati i aon Iuta. E tautaeka Ieoati i nanon 17 te ririki mai Taamaria,

2ao e aki ongotaeka iroun te uea ngke e karaoa te m'akuri ae e kaairua. E aki toki ni katotoonga Ieroboam, are e a tia ni kairiia Iteraera nakon te bure.

3E un te UEA irouia Iteraera, ma ngaia are, e karika uean Turia are Ataera ma natina te m'aane are Benatata b'a a na tautaekaniia n te tai ae e maan.

4E tataro Ieoaati nakon te UEA i bukin buokaia, ao e noora kamamaten ana m'akuri Ataera nakoia Iteraera te UEA. Ao e kaeka Ieoaati

5ao e kanakoa te tia kairiiri nakon Iteraera are e na kamaiuia mairouia kaain Turia, ao a manga maeka ma te rau Iteraera n aroia are rimoa.

6Ma e a tia Ataera n urubekei ana b'ai ni buaka Iteraera ngke e kataenikaia n te aro are e tiku Ieoaati ma ti tebwiina ana kaanibuaka, nimangaun tautia ake a toka i aoia aoti, 10,000 tautia aika a bane aroia aika nikiraia ana tautia.

7A teimatoa Iteraera ni buubure ma ni katotongiia ana utu Ieroboam. A aki roko n te urui taiani bouananti ake a tia ni kateaki i Taamaria i bukin taromaurian te anti are Nei Aatera.

8A bane ni koreaki b'aai ni kabane ake e karaoi Ieoaati i nanon ana tai n uea, n reitaki ma ana m'akuri n ninikoria i nanon te boki are Rongorongoia Uean Iteraera.

9E mate Ieoaati ao e taunaki i Taamaria ao e manga uea natina te m'aane are Ieoati.

Uean Iteraera are Ieoati

10E riki b'a te uea Ieoati i aon Iteraera n ana ka 37 n ririki n tautaeka uean Iuta are Ioati, ao e tautaeka i nanon 16 te ririki mai Taamaria.

11E aki ongotaeka nakon te UEA ngke e karaoa naba are e karaoia ngkoa Ieroboam, are e kareketatiia Iteraera n te bure.

12A tauaki rongorongon b'aai ni kabane ake e karaoi Ieoati i nanon ana tai ni uea n reitaki ma buakanakin uean Iuta are Amatia i nanon te boki are Rongorongoia Uean Iteraera.

13E mate Ieoati ao e taunaki i Taamaria i rarikiia uean Iteraera ake tabeman. E a manga uea natina are te m'aane are Ieroboam.

Mate Te Buraabeti Are Eritai

14Tabeua te tai i m'aain maten te uea are Ieoati, ao e a rangi n aoraki te burabeti are Eritai, ao e a kaani mate. Ao e rin Ieoati ma n tei i rarikina ao e tang. Ao e taku, Au toka, tera ngkai ae a nang konaa ni karaoia ana kaanibuaka Iteraera ana taan toka i aoia aoti ngkana ai akea ngkoe?

15Ao e taku Eritai, Anaa te kainikatebe, ao tabeua taiani kanoan ni katebe, ao taui i nanoni baim.

16Ao e katokaa baina Eritai i aoni bain te uea

17ao e taku, Kauka te winto ane e kaaitaraa mainiku. Ao ngke e uki, ao e takaarua Eritai ni kaangai, Ani katebe. Ao e katebenakoa te kainikatebe Ieoati ao e taku Eritai, Te kainikatebe anne bon te kanikina b'a E na buokiko te UEA ni kataenikaiia kaain Turia i Abeki.

18E taku Eritai, Anai kanoanikatebe ao orea iai aontano. Ao e anai kainikatebe Ieoati ao e orea iai aontano tenua te tai, ao e a manga katokia.

19Ao e un Eritai iroun te uea ao e taku, Ngke tao ko orea aontano nimaua ke onoua te tai, ao ko na boni kamaunanakoia kaain Turia. Ma ngkai, ko na ti kataenikaiia ti tenua te tai.

20E mate Eritai ao e taunaki.

A kakatoa ririki kaain Moaaba ni kakanakoia aia taani kurib'ai nako Iteraera.

21N te tai teuana ngke a tabe n tauni aia mate Iteraera, ao a nooria te koraki n aomata aika kaain Moaaba. A kawaekoaia Iteraera akekei n tewenakoa rab'atan aia mate nako nanon ruanimaten Eritai ao a biri nako. Ao ni bon te tai naba are e bo iai rab'atan te m'aane arei ma riin Eritai, ao e a maiu naba te aomata arei, ao e teirake.

Konaakin Turia Iroun Iteraera

22E mena Iteraera i aan ana tautaeka uean Turia are Ataera i nanon ana tai n tautaeka Ieoaati ni kabane.

23Ma E ataataiaomata te UEA nakoia Iteraera ao e kaota te akoi nakoia i bukin ana berita ngkoa nakoia aia bakatibu ake Aberaam, Itaaka, ao Iakob'a. E bon tuai man tannako ke ni kariaia b'a a na kamaunaaki n tiringaki.

24E mate Ataera ao e uea natina te m'aane are Benatata i aon Turia.

25E buakana Turia uean Iteraera are Ieoati, ao e kataenikaia tenua te tai. E kaoka mairoun Bentata kaawa ni kabane ake e taui ngkoa Ataera n te buaka mairoun tamana are Ieoaati.