Iona 4 - Kiribati New Version Bible

Rawawatan Nanon Iona n Ana Nanoanga te Atua.

1Bon moan te rawawata nanon Iona, ao e un.

2Ao e tataro, “Te UEA, tiaki b'a bon aei te b'ai ae I kaman tuangko i m'aain kitanan mwengau b'a ko na bon karaoia? Ao bon anne bukina are I karaoa iai au kabanea n raoiroi ni biri nako Tibein! B'a I ataia b'a bon te Atua n Tangira ao n Akoi ngkoe. Ko aki kakaiun, Ko nanoanga, man tauraoi ni bita nanom, man aki karekekai.

3Ma ngaia are, te UEA, kariaia b'a N na mate, e raoiroi riki mateu nakon maiu.”

4E kaeka te UEA, “E riai unim?”

5Ao e otinako Iona ni waerakea mainikun te kaawa are e buubura arei, ao e tekateka. E karaoa katanana ao e tekateka i aan nuuna, ma n tataninga te b'ai ae e na riki nakon Ninewe.

6Ao te UEA ae te Atua E kamaiuia te aroka ao ni karikirakea b'a e aonga n nuu ma ni mwengaraoi iai Iona. E rangi ni kukurei Iona n te aroka arei.

7Ngke e a karangaina n te bong are i mwiina, ao N ana babaaire te Atua, e tiringa te aroka arei te m'ata, ao e mate te aroka.

8I mwiin otin taai ao te Atua E kanakoa te ang mainiku ae e kabuebue, ao e rootaki Iona ao e kuri n tong ni kabuebuen taai ngke e b'akaria. Ma ngaia are, e bon bubuti bon i bukina b'a e na mate, ao e kaangai, “E raoiroi riki mateu nakon maiu.”

9Ao E taku te Atua nakon Iona “E riai unim i bukin te aroka?”

E kaeka Iona, “E bon riai uniu n ua mateu!”

10Ao E taku te UEA nakoina “E maiu te aroka arei ti teuana te tairiki, ao e mauna nako n are i mwiina, ao bon akea te b'ai ae ko karaoia nako iai; ko aki karikirakea, ao ko a rangi n nanoangaia ngkai e a mate.

11Tiaki e riai b'a N na nanoangaea riki Ninewe are te kaawa ae e rangi ni buubura arei, are a maeka iai aomata aika a m'aiti riki ae nakon 120,000 aika ataei aika akea aia bure, ao a m'aiti naba maan iai!”