1E a bon kara Tawita ngke e rinea natina te m'aane are Toromon b'a e na uea i aon Iteraera.
2Tabeua te tai i mwiina, ao e weteia taani kairiiri Tawita mai aon Iteraera, ma ibonga, ao kanoan Rewi.
3E wareki m'aitiia m'anen Rewi ake kakatenibwi rake aia ririki ni maiu, ao bootaia bon 38,000.
4Ao e taku, “Ana tabeakina te Tembora kanoan Rewi akana 24,000, ao akana 6,000 a na riki b'a mataniwi i nanon te Tembora ao a na riki naba b'a taani moti,
5akana 4,000 a na riki b'a taan tei n te Tembora, ao 4,000 a na neboa te UEA ni katang taiani b'ai ni katangitang ake I a tia n anganiia.”
6Ao i mwiina, e bwenauaia kanoan Rewi Tawita nakon tenikoraki n aron aia kaainga nako natin Rewi m'aane ake Kerition, Koata, ao Merari.
7Bon iai natin Kerition m'aane aika uoman: Ratan ao Timei.
8Ratan bon tamaia Ieiera, Tetam, ao Ioera.
9Bon taani kairiiri ngaiia ni kabane i buakoia ana kariki nako tamaia. Timei bon tamaia Teremota, Atiera, ao Aran.
10Rimwi, a manga reke riki natin Timei aika aman m'aane aika a bungiaki n aron aei man te karimoa nakon te karimwi:
11Iaata, Tita, Ieuti, ao Beria. Ma akea natiia Ieuti ma Beria, ma ngaia are, a warekaki kanoaia b'a ti teuana n utu.
12Bon iai natin Koata aika aman m'aane: Amram, Itiia, Eberon, ao Utiera.
13Amram bon tamaia Aaron ma Moote. A rineaki Aaron ma ana kariki b'a taani kaawakin b'aai aika a tabu. Aia m'akuri iroun te UEA bon te anga karea nakoina ao kakab'aiakiia aomata n arana.
14Moote are ana aomata te Atua bon tamaia Keritiom ao Erietera,
15ao a atongaki aia kariki b'a kanoan Rewi.
16Natin Keritiom are te karimoa te m'aane bon Tebuera.
17A m'aiti natin Reabia are bon ti natin Erietera te m'aane.
18Ana kauoman n nati te m'aane Koata bon Itiia, ao a na karimoa te m'aane bon Teromota.
19Eberon, are ana kateniman n nati te m'aane Koata, bon tamaia Ieria, Amaria, Iaatiera, ao Iekameam.
20Natin Koata are te bina te m'aane are Utiera, bon tamaia Mika ao Itiia.
21Bon iai natin Merari aika uoman m'aane: Mari ao Muti. Mari bon tamaia Ereata ma Kiti.
22Bon akea natin Ereata m'aane, ma ti natina aine aika a mare ma natin tarin tamaia.
23Ao Muti are natin Merari te m'aane are te kauoman, bon tamaia Mari, Etera, ao Ieremota.
24Bon aikai taiani kaainga ao utu man te baronga are Rewi. Aikai koraki ake uabwi ni waerake aia ririki ni maiu ake a anganaki tib'angaia b'a te m'akuri n ana Tembora te UEA.
25Ao e taku Tawita:
E a tia te UEA ae Atuan Iteraera n anga te rau nako ia ana aomata, ao E na maeka i Ierutarem n aki toki.
26Ma ngaia are, a aki tangiria kanoan Rewi ni kam'ainga te Um'antabunrianna ao b'aai aika a kakabonganaaki n te taromauri man te tabo teuana nakon te tabo teuana.
27Ni moa man te tai aei, ao kanoan Rewi ni kabane akana man uabwi rake aia ririki ni maiu
28ana m'akuri i bukin te UEA ni buokiia ana kariki Aaron ni m'akuri n te Tembora, ni kaitiaki katawanangin nako te Tembora ao ruun naba te Tembora, ao taan tararuaia naba b'a a na bane ni itiaki b'aai nako aika a kabonganaaki i bukin te taromauri.
29Bon tabeia naba tararuaakin te kariki are e tabu, ao te buraawa are b'ain te karea are te uita, taian kariki are a mmani, ao karea ni kabane ake a umunaki, ao te buraawa are e renganaki ma b'aan te oriwa. Bon kanoan Rewi aikai ake a na baairei rawaawatan ma m'aitin taiani karea.
30A na katoa ingabong ao tairiki kanoan Rewi n anganga aia kaaitau nakon te UEA ao n anene nebonebo nakoina.
31A na riai naba n anga aia kaaitau ao n anene n nebonebo ngkana e tabe ni waaki te angakarea ni katoa Taabati, ao ai uana naba ni katoa te Toa ae Moan Otin Nam'akaina ao bootakin riki te aro ake tabeua. A na riai n tau m'aitiia n taai nako kanoan Rewi aika a na m'akuri n te Tembora ni karaoi baika a tangiraki ni katiaaki.
32Bon tabeia ngkoa kaawakinan te Um'antabunrianna, ma ngkai ai manga tabeia tararuaakin te Tembora ao buokakiia ana kariki Aaron.
Who We AreWhat We EelieveWhat We Do
2025 by iamachristian.org,Inc All rights reserved.
