1I noora te UEA b'a E tei i rarikin te bao ni karea. Ao E anga Ana taeka ae kaangai, “Kakorakoraa orean taberan bouan te tembora b'a e aonga ni m'aeiei te aana are i nano. Urui ni kamaerikirikii b'a aonga ni b'akari atuuia aomata. N na bon tiringiia aomata n te buaka; akea ae na biri nako, akea ae na rawea maiuna.
2E ngae ngkana a kena kawaia n ruo rikaaki nako abaia maate, ao a na bon reke naba i Rou. E ngae ngkana a tam'arakea karawa, N na bon ukoriia naba.
3Ngkana a karabaia i aon te maunga are Karemera, N na bon ukoriia naba ma n raweia. Ngkana a karabaia mai rou i aan taari, ao N na tuangiia ika ni kaakang b'a a na kaniia.
4Ngkana a kairaki nako b'a taenikai irouia aia kairiribai, ao N na tua b'a a na bane n tiringaki. I a tia ni motika nanou b'a N na tiringiia, ao N na bon aki manga buokiia.”
5E riinga aonnaba te UEA ae m'aaka,
ao e ruru aonnaba.
Ao a bane n tang ake a maiu.
E a iabuti rake ma ni manga ora nako aonnaba, n ai aron te karaanga are te Naire.
6E karaoa mwengana te UEA i karawa,
ao aon te aba b'a te aana.
E wetei raan mai i aan taari
ao E kab'aroi i aon te aba.
Bon te UEA arana!
7E taku te UEA, “Ngkami aika Iteraera, I aki kaokoroa are I karaoia nakoimi ma are I karaoia nakoia I-Tiobia. I kaotinakoia I-Biritia mai Kabetora, ao I-Tuuria mai Kira, n ai aromi ngke I kaotinakoi ngkami mai Aikubita.
8Boni Ngai te UEA ae rietaata ae I aki toki n nonorii aia m'akuri aika a bure aomatan te aba ni uea ae Iteraera, ao N na bon kamaunaia mai aon te aba. Ma N na bon aki kabaneia ni kamaunaia kanoan Iakob'a.
9“N na anga Au taeka, ao N na ioia aomatan Iteraera n ai aron te uita ae e ioaki n te b'ai n i uita. N na ioia n raumeaia ni kanakoia aika a buakaka.
10A na bane ni mate taani bure aikai i buakoia Au aomata n te buaka, ma ai moaraara riki aomata ake a kaangai, ‘E na bon aki karokoa te kamamate te Atua i rarikira.’ ”
Manga kamaiuan Iteraera nakon taai aika a na roko.11E taku te UEA, “E na roko te bong are N na manga kaoka iai uean Tawita b'a kaanga ai aron te bata ae b'aka n uruaki, ao N na manga katei oona ma b'aina nako. N na kateia ni kaoka arona are rimoa,
12b'a a na manga rawea nikiran aban Etom aomatan Iteraera b'a abaia, ao a na tautaekaniia botannaomata b'a Au aomata. Bon Ana taeka te UEA ae E na karaoi baikai.
13“A roko boong”, bon Ana taeka te UEA,
“ae a na aki bane iai uita ao a na kauia manga tain te tai are i mwiina,
a na aki bane kureebe ao a na kauia manga tain te tai naba are i mwiina.
A na timtim wain aika a karewerewe ma ni maunga.
ao a na raanga nako mai aon tabuki.
14N na kaokiia Au aomata nako abaia.
A na manga karaoa aia kaawa aika urubekebeke ma ni maeka iai;
a na uniki aia kureebe ma ni mooi wain mai iai;
a na karaoi aia oo-n-aroka ma n am'arake mai iai.
15N na unikia Au aomata i aon te aba are I a tia n anganiia,
ao a na aki manga taekaki nako.”
Bon Ana taeka te UEA ae Atuami.
Who We AreWhat We EelieveWhat We Do
2025 by iamachristian.org,Inc All rights reserved.
