1E kabanea 20 te ririki i bukin katean ana Tembora te UEA ma katean ana bareti Toromon.
2I mwiin anne, ao e a manga tuangiia ana taani m'akuri Toromon b'a a na manga katea taiani kaawa ake e a tia n anganna Uram. Ao i mwiina e a kanakoia Iteraera Toromon b'a a na maeka n taiani kaawa aikai.
3Ao e buakana te kaawa are Amata-Tob'a teuare Toromon ao e taua.
4E kam'akuriia ana taani m'akuri ni karaoa te kaawa are Tatemora n te rereua ao tabeua kaawan te aba are Amata ake e na konaa ni kaawakin iai ana b'ai.
5E manga kamatoa Beta-Oron are ieta ao Beta-Oron are i nano ni manga kauataoi taian o ma ni karaoi taian mataroa ake e na konaa ni kaini.
6E karaoa naba ae aron arei nakon te kaawa are Baarata ao nakon kaawa aika a buubura ake e kaawakin iai ana b'ai, ma ana kanibuaka, ao ana aoti. E tuangiia ana taani m'akuri Toromon b'a a na karaoi b'aai nako ake e tangiri b'a a na karaoaki i Ierutarem, Reb'anon, ao n taabo nako i nanon abanueana.
7E aki rangi ni karawawataia Iteraera Toromon ni m'akuri. Ma ngaia are, e kam'akuriia ana tautia, aobitia, mataniwin te taanga ni buaka, ao te taanga ni buaka ake taan buaka i aoia aoti.
8Ao e karaoia kaain Eta, kaain Amora, kaain Berite, kaain Iwa, ao kaain Iebuti ake a maeka i Iteraera b'a ana toro.
9Aikanne aia kariki taian Ianena ake a aki tiringaki irouia Iteraera, ao a teimatoa n riki b'a aia toro Iteraera.
10Ao e rineia uabubua nimangaun taian aobitia b'a taan tararuaia taani m'akuri.
11Ao buun Toromon are natin uean Aikubita e kitana m'akoron Ierutarem are e atongaki b'a ana Kaawa Tawita nakon ana bareti ae e boou are e a tib'a tia ni karaoia Toromon. A aki riai ni maeka buun Toromon n ana Kaawa Tawita i bukina ngke e tabu b'a e mena iai te Atiniberita.
12E anga karea Toromon nakon te UEA i aon te baonikarea are e a tia ni karaoia i matan te Tembora.
13E iri taian babaaire i aon te angakarea are e anga Moote i bukin taiani karea n te Taabati, te Toa ae Moan Otin Nam'akaina, ma Toan te Kariki ae Aki Karikaki, ao te Toa ae M'anganikaai.
14Ao e anganiia tib'angaia ibonga ao Kanoan Rewi Toromon n te Tembora, ao e ira te kaetieti are e a tia tamana are Tawita n anganna. Ao tabeman kanoan Rewi a na kaira te katangitang ma ni buokiia ibonga n aia m'akuri, ao tabeman a na teiakina mataroan nako oon te Tembora
15ao taian ruu ni b'ai. A iiri raoi taian kaetieti aikai ibonga ma kanoan Rewi.
16A bane raoi b'aai ni kabane ake e iangoi Toromon b'a e na karaoi-ni moa man kawenean aan te Tembora ni karokoa banena.
17Ao e nako Toromon nakon kaawan Etom ake uoua ake, Etion, Kebera ma Erota, n Taari are Uraura.
18E kanakoi taiani kaibuke Iram nakon Toromon ma tabeman ana kaimoa aika a rabakau. A m'ananga nako ma ana kaimoa Toromon nakon te aba are Obira ao a uoti rikaaki e raka i aon 15,000 te kirokuraem te koora nakon Toromon.
Who We AreWhat We EelieveWhat We Do
2025 by iamachristian.org,Inc All rights reserved.
