2.Tamuera 2 - Kiribati New Version Bible

E riki Tawita b'a Uean Iuta

1Tabeua te tai i mwiina, e titirakina te UEA Tawita ni kaangai, “E na riai b'a N na nako nakon kaawan Iuta?”

Ao E kaeka te UEA ni kaangai, “Eng, Ko riai.”

Ao e titiraki Tawita ni kaangai, “Ao te kaawa raa ae N na nako iai?”

Ao E kaeka te UEA ni kaangai, “Naako Eberon.”

2Ao e nako Eberon Tawita ma buuna ake uoman, ake Nei Ainoam ao Nei Abikaira. Ainoam boni kaain Ietireera, ao Nei Abikaira bon kaain Karemera.

3Ao e kairiia naba ana m'aane ma aia utu Tawita b'a a na maeka n taiani kaawa aika a uarereke ake i rarikin Eberon.

4Ao a kaaitibo kaain Iuta ma Tawita i Eberon ao a kab'aroa b'aan te oriwa i aon atuuna ni kaotia b'a aia uea ae e boou. Ao i mwiina, e tuangiia Tawita ni kaangai, “Kaain Iabeti i aon Kireata, kam na tauna rab'atan Tauro.”

5Ao e kanakoa te tia uarongorongo Tawita b'a e na tuangiia ni kaangai:

E na kakab'aiaingkami te UEA! Kam rangi ni karaoa ae e raoiroi ngkai kam tauna rab'atan Tauro ae ami tia tautaeka,

6ao I tataro b'a E na akoingkami ma ni kakaonimaki te UEA nakoimi. N na riki b'a raoraomi i bukin te b'ai ae kam a tia ni karaoia.

7E a mate Tauro, ma a tia barongan Iuta ni karikai b'a aia uea. Ma ngaia are, kam na korakora ao kam na ninikoria.

Rikin Itiboteta B'a Uean Iteraera

8Abenera are natin Nera te m'aane bon ana tia kairiiri temanna Tauro ngaia n te taanga ni buaka. E uota natin Tauro te m'aane are Itiboteta ri aon te karaanga are te Ioretan nako Maanaim

9ao e karikia b'a te uea i aon Iteraera, Ietireera, Eberaim, ao Beniamin.

10Ai abwi ana ririki ni maiu Itiboteta n te tai anne, ao e tautaeka i nanon uoua te ririki. Ma kaain Iuta a karika Tawita b'a aia uea,

11ao e tautaeka mai Eberon i nanon itiua ma te iterana ana ririki.

Te Buaka Imarenan Tawita ma Itiboteta

12N te bong teuana, ao a m'ananga nako Abenera ma ana taanga ni buaka Itiboteta

13Ao i nanon te tai anne, e kairiia ana taanga ni buaka Tawita, ao a kaaini kaaitibo koraki aikai n te nei are i Kibeon. A tekateka Abenera ma ana rorobuaka n iteran te nei are teuana, ao Ioaba ma ana rorobuaka a tekateka ni iterana are teuana.

14Ao e takaarua Ioaba ni kaangai, “Ti a rineia ara tautia aika a bane aroia b'a a na bo!

Ao e kariaia Ioaba,

15ao a teirake tengaun ma uoman man te baronga are Beniamin b'a a na buaka ma tengaun ma uoman rorobuaka mairoun Tawita.

16A kaai ni buriti iran atuuia ao a ewariia n aia biti. A bane ni mate ikekei! Ao bon anne bukina are e aranaki iai te tabo arei b'a “Katawanangin Te Ewaewa.”

17Ao i mwiin arei e a moanaki te buaka. A kaai ni kakorakoraia ni uaitera, ma a konaa Abenera ma ana tautia Iteraera ana tautia Tawita.

18A mena naba ikekei natin Teruia ake teniman ake: Ioaba, Abitiai, ao Ataera. E rangi ni biri m'aaka Ataera kaanga te ria i nanon te tawaana,

19ao e biri ni kaineta Abenera, n aki rarairaki nakon maingina ke ataina.

20Ao e nooria Abenera ngke e rairaki, ao e taku, “Bon ngkoe anne Ataera?”

Ao e kaeka ni kaangai, “Eng, ngaia anne.”

21Ao e taku Abenera, A m'aiti tautia ikai. Katoka kakioakiu ao un ma temanna mai buakoia! Tiringnga ao anaa ana kunnikai b'a am b'ai.”

Ma e rawa n toki Ataera.

22Ao e taku Abenera, “N na tiringko ngkana ko aki rairaki n oki! Ao N na bon aki manga kaitaraa ma tarim are Ioaba.”

23Ma e bon aki rairaki Ataera, ma ngaia are, e ewaraki birotona iroun Abenera ni bukin ana kainiwai. E ribunako te kainiwai arei ao e otinako mai akuuna. Ao e b'aka ni mate Ataera. Ao a bane n tei ao a aki kakam'akuri aomata ngke a noora Ataera ni wene ni mate.

24Ma a ri mwiin Abenera uaake Ioaba ao Abitiai. Ao n tokina, ngke e a kaani bong, ao a roko n tabukin Amma, e aki rangi n raroa ma Kia i aon te kawai nako Rereuan Kibeon.

25E kairiia rorobuakan Beniamin teuare Abenera n reitaki ma te m'akoro teuana nako aon te tabuki, ao a katauraoi nakon te buaka.

26Ao e takaarua Abenera nakon Ioaba ni kaangai, “Ti na katoka n ningai kakiokioakira i bon iroura? Ko aki ataia b'a ngkana maanra ni karaoa aei bon kakorakoraan riki te kangaanga n tokina? Ko nang tuangiia n ningai am rorobuaka b'a a nang katoka kakioakiia bon oin aia utu?”

27Ao e takaarua Ioaba ni kaangai, “I tuea n aran te Atua ae e maiu, b'a ngke arona b'a ko bon aki taetae, ao a na teimatoa au rorobuaka ni kakioia aia utu ni karokoa te ngaina!”

28Ao e anaa ana bu Ioaba ao e uka te bu are te kanikina nakoia ana tautia b'a a na katoka kaeakiia tautian Iteraera. Ao e toki naba man te tai anne te buaka.

29Ao a m'ananga Ioaba ma ana taanga ni buaka ri nanon te M'arua are te Ioretan ni kangainaa. Ao i mwiina, a ri nanon te karaanga ao a m'aati ni kabanea te moaningabong arei ni karokoa rokoia i Maanaim.

30Ao ni bon te tai are e katoka iai kakioan Abenera teuare Ioaba, e ikotiia ana taanga ni buaka Tawita ao e wareki m'aitiia. Ao bootaia ake a bua mai buakoia i rarikin Ataera bon tengaun ma ruaman.

31A tia ana taanga ni buaka Tawita n tiringiia 360 ana rorobuaka Abenera man te baronga are Beniamin.

32A uotaanako rab'atan Ataera teuare Ioaba ma ana taanga ni buaka nako Betereem ao a taunna n aia ruanimate ana utu. Ao i mwiina, a nakonako ni kangainaa ni karokoa rokoia i Eberon i m'aain otin taai.