2.Rongorongo 34 - Kiribati New Version Bible

Iotia are Uean Iuta(2 Uea 22.1,2)

1Ai tib'a wanua ana ririki ni maiu Iotia ngke e riki b'a te uea i aon Iuta, ao e tautaeka i nanon tenibwi ma teuana te ririki mai Ierutarem.

2E katotoonga ana bakatibu are Tawita ao e aki toki ni kakaonimaki n ongotaeka iroun te UEA.

Katokaki Taromaurian Antiia Ianena(2 Uea 23.4-20)

3Ngke ai tib'a tebwi ma onoua ana ririki ni maiu Iotia ao e a moana taromaurian te Atua, n aron are e a tia ni karaoia ana bakatibu are Tawita. Aua te ririki i mwiina, e a baaireia b'a e na urui baangotan te aba i Iuta ao i Ierutarem, ao ai uana naba ma taian boua aika a tabu i bukin taromaurian te anti te aine are Nei Atera ao bouanantin antiia ianena.

4E karaua ni matakuakina te baonikarea i bukin taromaurian te anti are Baara ngke a kab'akaaki, ao taian baonikarea i bukin te b'ai ni kaboiarara ake i rarikina ngke a urubekeaki naba. A bane naba n uruakaki bouan Nei Atera, ma ana bouannanti, ao taian atiibu ake taiani banna, ao n raea n aki akaaka m'akorokoroia i aan ruanimateia koraki ake taan taromauriia.

5Ao e anai riia aia ibonga beekan ao e kabuoki i aon taiani baonikarea.

Ma ngaia are, e kamaunaa taromaurian antiia ianena Iotia i Iuta ao i Ierutarem.

6E karaoa naba aei n taiani kaawa ake a uarereke ake a uruaki n aaba are Manate Maeao, Eberaim, ao Timeon, ni karokoa tian Nabetari.

7E urui aia baonikarea beekan Iotia n taabo nako n te abanuea are meang i Iteraera, n reitaki ma bouan Nei Atera, ao e kamaerikirikii ni kamaunai taian bouannanti ao e kamaenikuni taian baonikarea i bukin b'aai ni kaboiarara.

Ao i mwiina, e a okira Ierutarem Iotia.

Kuneakin te Boki are Ana Tua te Atua iroun Irekia(2 Uea 22.3-20)

8N ana katebwi ma wanua n nam'akaina n tautaeka Iotia i aon Iuta, ngke e a tia ni kamaunai b'aai ni kabane aika a buakaka mai aon te aba ao man ana Tembora te UEA, ao e a kanakoia teniman ana mataniwi b'a a na onob'aia ana Tembora te UEA. Aomata aikanne bon Tiaban are natin Ataria te m'aane, te kowana i Ierutarem are Maateia, ao Ioa are natin Ioati te m'aane, are e kaawakini rongorongon te tautaeka.

9A m'ananga m'aane aika teniman aikai nakon Irekia are te ibonga ae rietaata. A anganna te m'ane are a tia n rikoia kanoan Rewi mairouia kaain Manate Maeao, Eberaim, ao nikiraia Iteraera, ai uana naba ma koraki ake a maeka i Iuta, Beniamin, ao i Ierutarem.

10Ao a manga anganaki m'aane ake taan kaira karaoan te onob'ai n te Tembora te m'ane arei. A kabonganai tabeua mai iai ni kabooia taani m'akuri,

11ao a anga nikirana nakoia taiani kabenta ao taani kateitei, ake a kabonganaa ni kabooi iai taian atiibu ao kaai ake a kainanoi i bukin onob'aian kateitei ake tabeua ake a tuai man tararuaaki irouia taian uean i Iuta.

12A kakaonimaki taani m'akuri, ao aia taani kairiiri bon Iaata ao Obaria man kanoan Rewi are te kaainga are Merari, ao Tekaria ao Meturam man kanoan Rewi are kaainga are Koata. Kanoan Rewi ake tekorakina ake taani katangitang aika a rabakau,

13bon ngaia ake a na tabeakina uotakin b'aai ao n tararuaia taani m'akuri. Ao kanoan Rewi ake tekorakina a rineaki b'a taan tei ni katobibia te Tembora.

14Ngke a anganaki te m'ane koraki ake taan tararua te m'akuri, ao e kunea te boki Irekia te boki ae kanoana taian tua ake e anga te UEA nakon Moote.

15E anga te boki Irekia nakon Tiaban are te mataniwi ao e taku, “Noora te b'ai ae I kunea i nanon te Tembora—Bokin ana Tua te Atua.”

16E anaa te boki Tiaban ao e uotia nakon Iotia ao e taku, “A karaoi b'aai ni kabane ake ko tangiri am mataniwi.

17A tia n anaa te m'ane man te Tembora ao a tia n anga nakoia m'aane ake a tararua karaoan te onob'ai.

18Ma iai riki te b'ai teuana, teuae ko karineaki. E anganai te ibonga are Irekia te boki aei.” Ao e warekia Tiaban ni kanenea b'anaana.

19Ao ngke e ongo Iotia b'aai ake a mena i nanon ana Boki n Tua te Atua, ao e raeuai kunnikaina i bukin rawaawatan nanona.

20Ni bon te tai naba arei, ao e weteia Irekia, Tiaban, Aikam are natin Tiaban te m'aane, Abeton are natin Mika te m'aane, ao ana toro are Ataia. Ao e taku,

21“E bae n rangi ni un te UEA irou ao irouia aomata naba ni kabane i Iteraera ao i Iuta, i bukina b'a a tia n aki ongotaeka ara bakatibu nakon taian tua aika m'akoro i nanon te boki aei. Naako kakaaea b'a tera nanon te UEA ae ti na karaoia.”

22Ao a nako Irekia ma m'aane ake aman akekei ao a nako n taetae ma Nei Ureta are te burabeti. Buun neierei bon Tiarum, are bon ngaia are e tararuai kunnikain te uea. E maeka Nei Ureta ni m'akoron Ierutarem are meang, ao ngke a kaaitibo ni mwengana,

23e taku:

Kam kanakoaki iroun te uea are Iotia, ao aio ana taeka te UEA ae Atuan Iteraera nako ina:

24“Iotia, bon te UEA Ngai! I kaantaningaia b'a n na katuaaea te aba aei ao kaaina ni kabane akana iai, n aron ae e taekinaki n te boki aei.

25A tia kaain Iuta ao Iteraera n aki kubarai. A tia n anga karea nakoia antiia ianena ao a tia naba n taromauriia aia bouannanti ake bon aia b'ai. I a bon aki konaa aroia aei. I a rangi n un irouia.

26“Iotia, ongora nakon te b'ai ae n nang karaoia. I noora nanokaawakim ngke ko ongo ae e nang kamaunaaki te aba aei ma kaaina ni kabane.

27Ko bon raeuai naba kunnikaim i bukin rawaawatan nanom ao I ongo tangim.

28Ma ngaia are, i m'aain ae I kamaunaa te tabo aei, ao n na tataninga moa matem ma te rau.”

Ao a nako m'aane akekei ao a taekin b'aai ni kabane ake e taekin Nei Ureta.

Warekan Bokin Ana Tua te Atua Iroun Iotia(2 Uea 23.1-3)

29Ao e weteia taani kairiiri Iotia mai Iuta ao mai Ierutarem.

30Ao i mwiina, e nakon ana Tembora te UEA, n ikotaki ma kaain Iuta ao kaain Ierutarem ni kabane, ao taiani ibonga ao kanoan Rewi.

N tokina, ngke a bane aomata ikekei, e a wareka te Bokin Ana Tua te Atua are e kuneaki n te Tembora ni kanenea b'anaana.

31Ngke e bane ana wareware Iotia, ao e tei n te tabo are nneia uea. E berita n aran te UEA b'a e na kakaonimaki n ongotaeka iroun te UEA ma iri ana tua ao ana reirei ake a koreaki i nanon te boki.

32Ao i mwiina, e titirakiniia kaain Ierutarem ao Beniamin b'a a na karaoa naba aia berita ae ai aron arei ao a na ongotaeka iroun te Atua are a taataromauriia aia bakatibu.

33E kamaunai taian bouannanti ni kabane Iotia n te aba are Iteraera, ao e tuangiia aomata ni kabane i Iteraera b'a a na taromauriia te UEA ae te Atua n ti ngaia. Ao a aki manga tannako aomata mairoun te UEA ae Atuaia aia bakatibu ni kabane n ana tai n tautaeka Iotia ngke e uea.