1I mwiin tabeua te tai, ao e taetae te Atua nakon Ataria are natin Obeta te m'aane.
2Ao e nako Ataria n te tai ae e waekoa ni kawara Ata ao e taku:
Ko na ongora irou, ngkoe te uea ae Ata ao ngkami aika kaain Iuta ao Beniamin. E na memena te UEA iroumi ma ni buokingkami, ngkana kam teimatoa n ongotaeka ma n taataromauriia. Ma ngkana kam aki ongotaeka i rouna, ao e na bon kiitaningkami.
3E rangi ni maan te tai ae a aki taataromauriia iai te Atua ni koaua Iteraera ke ni kakauongo nakoia taiani ibonga ake a konaa n reireiniia taekan te Atua. Ma a rawa n ongotaeka nakon ana tua te Atua.
4Ma n taai ni kabane are e roko iai te kaangaanga, ao a rairaki Iteraera nakon te UEA ae Atuaia ma n taromauriia.
5A bon m'aiti taian kamangaongao ni boong akekei are e aki tau iai te m'am'ananga nakon taabo nako i aon Iteraera.
6A bon itiritiri botannaomata i bon irouia, ao a ikamaamate te kaawa teuana nakon te kaawa teuana, i bukina b'a E bon kariki taian kangaanga ma kiriwe te Atua n taabo ni kabane.
7Ma ngaia ae ko na ninikoria. Ko na aki b'ara n nano! E na karineko te Atua i bukin ongotaekam i rouna.
8Ao Ata, ngke e ongo naba ngkekei ana taeka Ataria are te burabeti, ao e anga ana taeka i bukin taian bouannanti ni kabane ake i Iuta ao Beniamin b'a a na uruakaki, n ikotaki ma ake n te kaawa ake a tia n reke i rouna n te aba are Eberaim. E bon manga onob'aia naba ana baonikarea te UEA are e mena i matan kamanin te Tembora.
9Ao e weteia kaain Iuta ma Beniamin Ata, ao ai uana naba ma kaain te aba are Eberaim, Manate Maeao, ao Timeon ake a maeka i Iuta. Angiia aomata aikai a kakaonimaki nakon Ata, i bukina ngke a tia n nooria b'a e meemena te UEA i rouna.
10N te katenua n nam'akaina n ana katebwi ma nimaua n ririki Ata n tautaeka, ao a bane ni kaaitibo i Ierutarem.
11Ni bon te bong naba anne, a anai itibubua taiani kaom'aane ao itiua te ngaa te tiibu ao te kooti man b'aai ake a uoti rikaaki mai Kerara ao a anga b'a aia karea nakon te UEA.
12A karaoa te berita ae e matoa b'a a na taromauriia te UEA ae te Atua are e a tia n tataromauriaki irouia aia bakatibu,
13ao n tiringiia ake a rawa n ongotaeka nakon te UEA.
14A kariaia aomata b'a a na kaawakina aia berita nakon te UEA, ao a bukamaruia n takaarua ao ni katangi taian bu ma taiani konete.
15A bane ni kukurei aomata nako i bukina ngke a tia ni karaoa te berita ae e matoa aei, ao ni kabooani mwiin anne, E kakab'aiaia te UEA n anganiia te rau mairouia aia kairiribai.
16E a tia tibun Ata te unaine are Nei Maaka ni karaoa te bouannanti ae e rangi n ribaaki are Nei Atera, ma ngaia are, e koroia ni kab'aka, ao e kamaerikirikia, ao e kabuokia n te M'arua are Kiteron. Ao i mwiina, e kam'ainga Nei Maaka mani nnena are te tina ni ueanaine.
17E kakaonimaki Ata nakon te UEA ni kabane bongini maiuna, e ngae ngke e aki uruaki baangotan te aba i Iteraera.
18E kaaki i nanon te Tembora b'aai aika a koora ao tirewa ni kabane ake e a tia boni ngaia ao tamana ni katabui b'a ana b'ai te Atua.
19E teimatoa te rau i aon Iuta ni karokoa ana katenibwi ma nimaua n ririki ni uea Ata n tautaeka.
Who We AreWhat We EelieveWhat We Do
2025 by iamachristian.org,Inc All rights reserved.
