1Tabeua te tai i m'aain maten Tawita ao e taetae nakon Toromon:
2Natiu i aoni kawaiu ni mate n aroia aomata nako ma I tangiriko b'a ko na korakora ma n ninikoria.
3Karaoi b'aai ni kabane akana E tuangko te UEA, ao tou mwiin Ana reirei. Ongotaeka ni b'aai ni kabane akana a koreaki n Ana tua Moote. Ane ko na tetekeraoi e aoria ngkana tao tera ae ko karaoia, ke tao ko nakon te tabo teuana.
4Ko riai ni kakaonimaki n taai nako nakon te UEA ngkoe ma am kariki. Ngkana ko karaoa anne, ao ane E na kaawakina te berita aei ae E karaoia ma ngai b'a a na uea n taai nako ara utu i aon Iteraera.
5Toromon, ko na aki m'aninga te b'ai are e a tia ni karaoia Ioaba nako iu ngke e tiringa Abenera are natin Nara te m'aane, ao Amata are natin Ietera te m'aane are, mataniwiin te taanga ni buaka i Iteraera ake uoman. E tiringiia kaanga ai aroia kairiribai n te bo ni buaka, ma e boni karaoa aei n tiaki tain te bo ni bo ni buaka. E bon reke n te bure, ao e bon nakoim katuaaeaia
6n aron am kabanea n tamaroa. Ngkana tao ko iraaniia, ao ko na aki kariaia b'a a na mate ma te rau ni kauia karaia.
7E buokai natin B'aretirai te m'aane are kaain Kireata ngke I birinako mairoun tarim are Abetarom. Ko na akoia, ao kariaia b'a e na am'arake n am taibora.
8Ko na riai ni karaoa te b'ai teuana nakon Timei are natin Kera te m'aane are kaain Baurim are n abaia kaain te baronga are Beniamin. B'a e a tia ni karereantiai, ma ni karawawataai n te bong are I nako Maanaim iai. Ma rimwi, ngke e a manga roko n te karaanga are te Ioretan ao I berita b'a N na aki tiringnga.
9Ma ngaia are ngkai, ko na riai ni katuaea. E a boni m'aane, ma ngkoe, ko a wanawana n ataa arom ni kamatea.
Maten Tawita10E uea Tawita i aon Iteraera i nanon 40 te ririki. E uea i Eberon i nanon itiua te ririki, ao e uea i Ierutarem i nanon 33 te ririki.
11I mwiina, e mate ao e taunaki i Ierutarem.
12E a manga uea natina te m'aane are Toromon ao e a tautaekana abanuean Tawita.
Tiringakin Atoniia13Ao e m'ananga Atoniia n te bong teuana ni kawara Nei B'atateb'a, are tinan Toromon, ao e taku Nei B'atateb'a nakoina, “Tera rokom aei, te iraorao?” Ao e taku,
“Eng.
14I bon roko b'a I kani maroroo ma ngkoe.” Ao e taku neierei, “E tamaroa, ao uotiko.”
15Ao e taku Atoniia, “Ko bon ataia b'a I uea ngkoa i nanon ti tabeua te tai, ao a bane Iteraera ni kariaia b'a N na uea, ma E tangira tariu te Atua b'a e na uea, ao ngkai a bane n tia ni bitaki b'aai ni kabane.
16I butiiko, ko aki konaa ni buokai?” Ao e taku Nei B'atateb'a, “Tera ae ko iangoia?”
17Ao e taku Atoniia, “I butiiko b'a ko na taetae nakon Toromon ni buubutiia b'a e na kariaia b'a N na iein ma Nei Abitiaka b'a e ongongo riki iroum.”
18Ao e taku neierei, “E tamaroa. N na butiia anne.”
19Ao ngke e a nako Nei B'atateb'a ni kawara Toromon, ao e teirake Toromon ngke e roko tinana, ao e boobaraaki nakoina. E tekateka ao e kawaekoa teuana riki te kaintokanuea i bukin tinana b'a e na tekateka i angaataina.
20Ao e tekateka Nei B'atateb'a ao e bubutiia ni kaangai, “Iai au buubutii ae e uarereke?”
Ao e taku Toromon, “Ani bon ti taetae naba b'a I a karaoa naba ane ko taekinna.”
21Ao e taku neierei, “Taiaoka ni kariaia tarim are Atoniia b'a e na iein ma Nei Abitiaka.”
22Ao e taku Toromon:
“Tera, N na kariaia b'a e na iein karimoau ma Nei Abitiaka? Ti te bo ngke ko butiai b'a e na tautaekana te abanuea. E aera ngkai ko aki buubutii i bukiia Abiata ao Ioaba?
23I tuea n aran te UEA b'a e na tiringaki Atoniia i bukina ngkai e buubutii n aron aei. Ao ngkana e aki tiringaki, ao I tataro b'a E na katuaaeai te Atua.
24E kaueaai te UEA n onea mwiin tamau, ao E berita b'a a na uea i aon Iteraera aomata aika man ara utu. Eng, I tuea n aran te UEA b'a e na tiringaki Atoniia n te bong aei.”
25Ao e takaarua Toromon ni kaangai, “Benaia. Naako tiringa Atoniia.” Ao e mate Atoniia.
26Ao e kanaanako wetean Abiata are te ibonga te uea are Toromon, ao e taku:
“Abiata naako okira mwengam i Anaton. Ko riai n tiringaki naba, ma I aki kani karaoia ngkai. Ngke e uea ngkoa tamau are Tawita, ao ko tararuaa ngkoa te Atiniberita, ao ko ri nanon taai aika a kaangaanga n taai aika a bati ngkoe ma tamau.”
27Ao Toromon e kabanea Abiata man te nakoa ni ibonga i bukin te UEA. Ao ikai are e a koro naba iai bukin baike E taekin te Uea i Tiro i bukin te ibonga are Eri ma kanoana.
28E aki buoka Abetarom teuare Ioaba b'a e na riki b'a te uea, ma e buoka Atoniia. Ma ngaia are, ngke e a ataia Ioaba b'a e a tia n tiringaki Atoniia, ao e biri nakon te Um'antabunrianna ma n taui ni kamatoai koonan te baonikarea ake aua.
29Ao ngke e ongo aei Toromon, ao e kanakoa te aomata temanna b'a e na titirakina Ioaba ni kaangai, “E aera ngkai ko biri nakon te baonikarea?”
Ao e kaeka Ioaba ni kaangai, “B'a I maakuko ngaia ae I biri nakon te UEA b'a E na kamanoai.”
30Ao e biri nakon te Um'antabunrianna Benaia ao e takaarua ni kaangai, “Ioaba, e taku te uea b'a ko na otinako mai ikanne.”
Ao e taku Ioaba, “I aki, ma nakomai tiringai ikai.”
Ao e okirikaaki Benaia ao e tuanga Toromon ana taeka Ioaba.
31Ao e taku Toromon: “Karaoa te b'ai ane e taekinna Ioaba. Tiringnga ao taunna, b'a I aonga n aki bukintaeka ma au utu n tiringakin te mataniwi n tautia n ana taanga ni buaka Iteraera are Abenera, ao nakon naba Amata are te kam'aanta n te bootaki n tautia i Iuta.
32E tiringiia m'aane aika akea aia bure n te aro ae e aki ataaki iroun tamau. A raoiroi riki m'aane aikai nakon Ioaba.
33A teimatoa n tekebuaka ana utu Ioaba i bukin ana m'akuri are e a tia ni karaoia, ma E na kakab'aia ana utu Tawita n taainako, ao e na waaki ueana i nanon te rau.”
34Ao e okirikaaki Benaia n tiringa Ioaba. Ao e uotakinako rab'atana n taunaki i rarikin ana auti n te rereua.
35Ao Toromon, e katea Benaia n onea mwiin Ioaba b'a manga te kam'anta n te bootaki n tautia, ao e kateirakea Tatoka b'a te ibonga n onea mwiin Abiata.
36Ao e kanaanako wetean Timei ao e taku nakoina, “Karaoa te auti teuana i Ierutarem ikai ao maeka iai. Ko na aki manga kikitana ara kaawa aei.
37Ko na tiringaki ngkana ko kataia n ri nanon te M'arua are Kiteron ma ni kiitana Ierutarem. Boon am bure anne.”
38Ao e kaeka Timei ni kaangai, “E rangi n raoiroi te uea ae ko karineaki. N na karaoa anne.” Ma ngaia are, e a maekana Ierutarem Timei n te tai ae maan.
39Tao e kaaniia tenua te ririki i mwiina, ao a biri nako naba uoman ana m'aane Timei nakon uean Kate are Akiti. Ao ngke e a atai mwiia Timei ae a mena i Kate,
40ao e a tokara naba ana aati n rimwiia. Ao a reke i rouna ao e kairiia nako Ierutarem.
41Ao e tuangaki Toromon iroun te aomata temanna taekan Timei b'a e a tia n nako Kate ao e a tia ni manga oki.
42E kanaanako weteana Toromon, ao e taku nakoina:
“Timei, ko a tia ni berita n aran te UEA b'a ko na aki kikitana Ierutarem. I a tia ni kauringko b'a ko na boni mate ngkana ko karaoa aei. Ao ko kariaia, ao ko taku b'a e raoiroi. Ngaia anne?
43Ko a tia n ongotaeka irou, ao ko a tia naba n urua am berita are ko karaoia nakon te UEA.
44I taku b'a ko bon atai b'aai aika a buakaka ake ko a tia ni karaoi nakon tamau are Tawita. Ao ngkai E nang katuaaeko te UEA i bukin te b'ai are ko a tia ni karaoia.
45Ma E boni kakab'aiaai te UEA ma ni kakorakoraa abanuean tamau n aki toki.”
46Ao e takaarua Toromon ni kaangai. “Benaia, tiringa Timei!” Ma ngaia are, e a mate Timei.
Ao e a tab'anin raoi ana tautaeka Toromon i aon abanueana n te tai anne.
Who We AreWhat We EelieveWhat We Do
2025 by iamachristian.org,Inc All rights reserved.
