Iotua 17 - Kiribati New Version Bible

Manate maeao

1Mai buakon aaba ake i maeaon te Ioretan a bon anganaki tabeman man utuun nako ana kariki ana karimoa Ioteb'a te m'aane are Manate. Makira, are taman Kireata, ao bon ngaia temanna mai i buakoia tautia aika a rangin ninikoria, ngaia are e anganaki Kireata ao Batian, ake i mainikun te karaanga are te Ioretan b'a abana.

2Ao aaba ake i maeaon te karaanga are te Ioretan a bane n nakoia nikiran utuun te baronga are Manate: Abietera, Ereka, Atiriera, Tekem, Ebera, ao Temita. Bon aikai kanoan Manate are natin Ioteb'a, ao bon mataniwiin naba aia utu.

3Terobeata, are natin Ebera are natin Kireata, are natin Makira, are natin Manate, bon akea natina te m'aane, ma ti taian aine. Araia bon Mara, Nooa, Okera, Mireka, ao Tireta.

4A m'ananga n te taina natin Terobeata ake aine ni kawara Ereata are te ibonga, ma Iotua are natin Nuun, ma taan kairiri, ao a taku, “E taku ngkoa te UEA nakon Moote b'a ko na anganiira abara n ai aroia ara utu m'aane.” Ma ngaia are e kakoroa nanon ana taeka te UEA Iotua anne ao e karekei abaia natin Terobeata ake aine n ai aroia aia utu ake m'aane.

5Ao bon anne bukina ngkai tebwina aban te baronga are Manate n reitaki ma are i Kireata ao Batian i maeaon te karaanga are te Ioretan,

6e ngae ngke kanoana aika aine ma kanoana aika m'aane anganaki abaia. Te aba ae Kireata a bane n anganaki nako ia nikiran te baronga are Manate.

7Tian abaia te baronga are Manate mai Atera nako Mikemetata, mainikun te kaawa are Tekem. Ao te tia e a manga biri nako aiaki ni kariniia iai aomatan En-tabua.

8E ti b'aina te kaawa ae Tabua te baronga are Eberaim ma e b'aina te aba are i tinanikun Tabua ni kabane te baronga are Manate.

9E a manga biri rikaaki te tia nakon te karaanga are Kana. A b'ainaki kaawa ake a buubura ake i maiakin te karaanga i roun te baronga are Eberaim, e ngae ngke a reke ni m'akoron abaia te baronga are Manate. E biri ri meangin te karaanga tian te baronga are Manate ao e toki n taari are te Mereterenian.

10Te baronga are Eberaim mai maiaki ao te baronga are Manate mai meang, ao a uaia ni wairio n toki n taari are te Mereterenian. Tian te baronga are Manate mai meang maeao bon te baronga are Atera, ao mai meang mainiku bon te baronga are Itakara.

11Ao e b'aini naba kaawa aika buubura te baronga are Manate ake i nanon m'akoron te baronga are Itakara ao te baronga are Atera, aika kaawa aika: Beta-tean, ao Ibeream ma kaawa naba aika a uarereke ake i rarikiia, ao ni ikotaki naba ma te kaawa are Tora (te kaawa are i rarikin taari), Entora, Taanaka, Mekito, ao kaawa ake i rarikiia nako.

12Ma a aki konaa te baronga are Manate ni kataenikai kaawa aikai, ma ngaia are a bon tiku naba ni maeka aomatan Kanaan iai.

13Ma ngke e a korakora te botannaomata ae Iteraera rimwi riki, ao a bon teimatoa naba n aki kakioia nako aomatan Kanaan ni kabane ma a kam'akuriia b'a kaanga tooro.

Tangiran riki abaia baronga aika Eberaim ao Manate maeao

14A kaangai ana kariki Ioteb'a nakon Iotua, “Bukin tera ngkai ko anganiira abara ae ti teuana te m'akoro n aba? Ao nooria, E kakab'aiaira te Atua ao E kabatiai ara kariki, ma e rangi ni uarereke abara ae ko anganiira.”

15Ao e kaekaia Iotua ni kaangai, “Ngkana arona b'a kam a rangi ni m'aiti n aomata ao e aki tau nakoimi te aba are tabukibuki are i Eberaim, ao kam na nako ni kaitiaka buakonikain abaia I-Beritaite ma taian Rebaim b'a abami.”

16Ao a manga kaeka ni kaangai, “Eng, e bon aki tau abara ake n aaba ake a tabukibuki b'a a maekana te tabo ae aoraoi I-Kanaan, ao a m'aiti aia kaa ni buaka aika biiti, ao ai aroia naba ake a maeka i Beta-tean, ao kaawa naba ake i rarikiia, ma ake a maekana te m'arua are Ietireera.”

17Ao e taku Iotua nakoia te baronga are Eberaim ao Manate maeao, “E bon koaua b'a a bon rangi ni m'aiti ami koraki, ao kam korakora, ao e na bon riai n reke riki abami.

18A na riki aaba ake a tabukibuki ni kabane b'a abami, e aoria ngke te buakonikai ma ko na kaitiakia ao ko na abanna mai tabona nako tabona. Ao i bukiia ngkanne aomatan Kanaan, kam na kakioia nako mai ikanne, e ngae ngkana a korakora ao a m'aiti aia kaa aika biiti.