1.Rongorongo Taekan te Boki aei - Kiribati New Version Bible
Taekan te Boki aeiTe moan ao te kauoua n Rongorongo bon teuana te boki ae rang ab'ab'aki. A bane n anga rongorongoia ana aomata te Atua mairoun Atam ni karokoa okiia taenikai mai B'aburon n te ririki ae 538 BC ke i m'ain Iesu. Te tia korei taekan booki aikai are e aki ataaki e anai ana rongorongo man taian koroboki n Ebera ao booki ni kawai, ao ni kabonganai rabakauia ni koroboki ni katiteuanai kantaninga nakon teuana te karaki. Ao teuana te rairai n te karaki aei e taekinaki n te moan ao te kauoua n Tamuera ao te moan ao te kauoua n Uea. E katurua ana maroroo te tia korea te boki aei i aoia uea aika Tawita ao Toromon are a kaota aron kakawakin te Tembora i Ierutarem are nukan aroia n taromauri Iteraera. Iango aika kakawaki ni booki aikai uoua aikai b'a e kai bitaki te tai, ma te Uea e teimatoa ni memena irouia ana aomata, ao n tauraoi n tainako ni buokiia aika kakaonimaki. E taekinna te tia korea te boki ae te 1 Rongorongo, b'a e ngae ngke e kan reke 70 te ririki ni kataenikaiaki, ao reitakiia te botannaomata aio ma abaia e bon nene man aki bua. Moan m'akoro aika wanua a kakanoa ni kaotan rinanin araia utu ake a b'aib'ai iroun te Atua mairoun Atam. Te m'akoro 9 e bon reita karinaniia utu akanne ake a oki man te kataenikaiaki mai B'aburon. Nikiran taian m'akoro a bon taekina rongorongon te uea are Tawita, are kaota korakorana b'a te tia tautaeka ngaia, ao ni kabaneaki n rongorongon maten Tawita ao rinean natina are Toromon b'a te uea ae boou.Te kabanea ni kakaawaki n uea ae e taekinaki n te boki ae 1 Rongorongo bon Tawita. Boni ngaia are e karika Ierutarem b'a te tabo n taromauri i bukin te UEA ae te Atua ao are e taraia naba b'a e na taromauriaki te UEA ni kawaina ni koaua. E karineaki naba Tawita n atongaki b'a te tia iangoa moan katean te Tembora, e ngae ngke bon natina te m'aane are Toromon are e boni karaoa te Tembora.Angiin m'akoron 1 Rongorongo e kaonaki n taian kateiriki mairoun ana kariki Atam ni karokoa ana tai te uea are Tauro (M'akoro 1—9). I mwiin taekinakina b'a e a mate Tauro (10) ao nikiran te boki (11—29) a kaineti taian rongorongo i aon te uea are Tawita, ao a konaa m'akoro aikai ni bwenaaki nakon aua te m'akoro. Te moani m'akoro (11—12) e taekinaki iai aron Tawita ngke e riki ni uea ma arona ni karika Ierutarem b'a ana kaawa n tautaeka. A reke naba i nanon te moani m'akoro aei rongorongoia ana taani buaka Tawita ma a na aobitia. Te kauoua ni m'akoro (13—16) e kab'arab'araaki iai aron Tawita ngke e kam'ainga te Atiniberita nakon mwengana ae e boou i Ierutarem. Te katenua ni m'akoro (17—20) a reke iai taekan b'aai aika a riki i nanon ana tai n tautaeka, ao te kabanea ni m'akoro (21—29) e kab'arab'araaki iai aron te katauraoi i m'aain karaoan Ana Tembora te UEA ma ana reirei nakon natina are Toromon i bukin aron taromaurian te UEA ae e eti.N te boki ae 1 Rongorongo, ao e kamanenaaki te uea are Tawita b'a te b'ai ni kakairi nako ia ake a kakaonimaki n taromauriia ao n ongotaeka iroun te UEA. N tokin ana tautaeka Tawita, e neboa te UEA i mataia aomata nako i aon Iteraera ao e taku:I taromauriiko n aki toki te UEA! E korakora m'aakam, ao e nooraki mimitongim n taabo nako i karawa ao i aonnaba. Boni Ngkoe uean te aonnaba ni kabane, ao Ko tautaeka ma te korakora ao te m'aaka.”Oi n iango i aon te boki aeiAna Kariki Atam ni karokoa te Uea are Tauro (1.1—9.44)Maten Tauro ma Natina Mm'ane (10.1-14)Rikin Tawita B'a Uean Iteraera ao Tauan Ierutarem Irouna (11.1-9)Ana Taani Buaka Tawita (11.10—12.40)Kam'aingan Te Atiniberita Nako Ierutarem (13.1—16.43)Iangoan Karaoan Te Tembora Iroun Toromon (21.1—28.21)Tokanikain Ana Taanga ni Buaka Tawita (18.1—20.8)Ana Katauraoi Tawita I bukin Karaoan Te Tembora (21.1—28.21)Aia B'aintangira Aomata I bukin Karaoan Te Tembora (29.1-20)Katokaan Ana Baunuea Toromon (29.21-25)Maten Tawita (29.26-30)
