Te Tua-Kaua 22 - Kiribati New Version Bible

Te Buobuoki Nakoia Tabem'aangAo e taku Moote nakoia Iteraera:

1Ngkana ko noora te kao ke te tiibu ae m'arua, ao kam na uotarikaaki te man anne nakon te aomata are ana man.

2Ao ngkana e rangi n raroa nako te aomata are ana man, ke ngkana kam aki ataia b'a antai ana man, ao kaira te man anne nakon am auti ao kawakinna. Ngkana e roko te aomata are ana man ni kakaea ao ko na anganna.

3Bon anne te b'ai ae kam na karaoia ngkana kam noora ana b'ai temanna. Karaoa ami kabanea ni kona ni buobuoki ngkana tao kam kunea te man ae bua b'a tao te kao, te tiibu, te aati, ke taiani kunnikai.

4N tabetai a na kona naba n turanako taian kao ke taian aati i aan uotaia aika rawaawata ma n aki kona ni manga teirake. Ma ngaia are, ngkana kam nakonako n te kawai, ao buokiia aomata akana a kataia ni kateirakeia ana kao, ke ana aati.

Tai Binabinaine Ke Ni Binabinam'aaneAo e taku Moote nakoia Iteraera:

5A na riai aine ni kataia n aki riki b'a taiani m'aane, ao m'aane ana aki kataia naba n riki b'a taian aine. E rangi n ribaia aomata aika karaoi baikanne te UEA ae Atuami.

Te Tina Ni MannikibaAo e taku Moote nakoia Iteraera:

6-7Ngkana kam nakonako n te kawai n te taina, ao kam noora te mannikiba ni ngaona i aon te aroka ke te tano. Ao ngkana e mena te tina ni mannikiba ma bunimoana, ke e mena i rarikiia natina aika uarereke i aon ngaoia, ao kam kariaiakaki n anai mannikiba akana ataei, ke taiani bunimoa, ma kam na aki ananaa te tina. Kam na kainaomata, ao E na kakab'aiaingkami ma ni kananaui maiumi iai te UEA ao ni katekeraoi maiumi n taai nako.

Te O Ni Katobibia Taubukin Te Auti Ae Boraoi Taubukina

8Ngkana kam karaoai ami auti, ao kam na riai ni kakoaua b'a iai te o ni katobibia taubukin ami auti are boraoi taubukina. B'a ngkana iai ae b'aka mai taubukin te auti, ao akea am bure iai.

Tuua I bukin Renganan B'aai Aika KakaokoroAo e taku Moote nakoia Iteraera:

9Ngkana kam uniki taian kureebe, ao kam na aki manga uniki riki aroka tabeua i rarikiia. B'a ngkana kam uniki aroka riki tabeua ikanne, ao kam na bane ni uoti uaan tai man te nne ni kureebe anne nakon te tabo n taromauri.

10Kam na tai ikota te kao ma te aati n te tai ae ti teuana ni kabaeia ma te b'ai ni b'araua.

11Ngkana kam raranga te kunnikai, ao kam kona ni kamanena te karai are karaoaki iai te riinen ke buraen te tiibu, ma kam na aki booti.

12Ao ngkana kam waea te kooti, ao kam na kanim taian buraerae ni koonana ake aua.

Bukinakin Te Ainenum'aAo e taku Moote nakoia Iteraera:

13Ngkana arona b'a e a manga tabe n riba buuna te m'aane temanna n te tai ae aki maan i mwiin mareia.

14Tao e taekin taeka n aki akaaka i bukin buuna, ma ni kaangai, I a tia ni mare ma te aine aei, ma ngke I a wene ma ngaia, ao I a kunea b'a ngaia tiaki te ataein aine.

15Ngkana arona b'a e riki anne, ao a na nako ana karo te aine anne nako mataroan te kaawa ni kaotia nakoia taan kairiiri te kakoaua b'a e bon roko n ataei natiia anne iroun buuna.

16E na kaangai tamana, I kariaia natiu b'a e na mare ma te m'aane aei, ma e a manga ribaia

17ma n taku b'a e aki roko n ataei. Ma e bon kaairua, b'a aikai kakoauaana b'a e bon roko n ataei. Ao a na kaota kunnikain te kainiwene are a wene iai n tairikin te bong are a bootaki iai.

18Ao a na kataerea te m'aane taani kairiiri n te kaawa n te kainikataere

19i bukina b'a e a tia ni kabuakaka buuna n taku b'a e aki roko n ataei. E na angan taman buuna tebubua te m'akoro n tirewa, ao e na aki kariaiakaki ni karaoa te buuraure.

20Ma ngkana e koaua ana taeka te m'aane, ao akea te b'ai ni kakoaua i bukin rokona n ataei iroun buuna,

21ao e na kairaki te ainenum'a anne nako mataroan ana auti tamana ao e na karebanaaki n taian atiibu ni karokoa matena.

E a tia ni karokoa te m'akuri ae kammaira i nanon te kaawa ngke e wenenibure ma te m'aane temanna i m'aain marena, ao kam na riai n kamaunaa te m'akuri ae buakaka aei n tiringa te aine anne.

Tuua I bukin Taian WenenibureAo e taku Moote:

22Kaain Iteraera, ngkana e reke te m'aane temanna ni wenenibure ma buun temanna, ao kam na tiringiia ni kauoman. B'a ngkana kam karaoa anne, ao kam bon kamaunanakoa iai te m'akuri ae buakaka ae a tia ni karaoia i nanon Iteraera.

23-24Ngkana e reke ni wenenibure te m'aane temanna i nanon ami kaawa ma te aine ae kabae ao e aki takaarua ni kakaea buokana neiere te aine, ao a na kaai ni tiringaki ni kauoman. E bure te m'aane ni wenenibure ma te aine ae a tia ni mare. Ao e bure naba te aine i bukina ngke e aki takaarua ni kakaea buokana, e ngae ngke e mena i nanon te kaawa ao a kaan aomata i rarikina. Kairiia ni kauoman nako mataroan te kaawa ao karebanaia ni karokoa mateia. Kam na kamaunaa te m'akuri ae buakaka are a tia ni karokoa i aon ami kaawa.

25Ao ngkana e tauaki te aine ae kabae n te tabo ae akea kaaina ao e na ti tiringaki te m'aane.

26Kam na bon aki katuaaea te aine naba teutana. Bon akea ana bure, ao bon akea bukina b'a e na tiringaki. Bon ti te bo te bure aei ma te tiriaomata,

27i bukina b'a akea raon te aine are kabae n te tabo are akea kaaina ngke e a ti roko naba te m'aane arei n taua. E takaarua ma bon akea ae kona ni buokia.

28Ngkana arona b'a e tuai ni kabae te aine, ao e roko te m'aane n tuangnga b'a e na matu ma ngaia. Ao ngkana a kauiaaki,

29ao a na riai n kairoroaki b'a a na mare. E na angan taman te aine te m'akoro n tirewa b'a boon te aine ao e na aki kariaiakaki ana buuraure ma te aine anne.

30E na aki mare te m'aane ma buun tamana ni kawai. E na bon riki aei b'a karawawataan tamana.