1Te UEA, Ko na ongo au tataro!
Te Atua ae Ko raoiroi ma ni kakaonimaki,
Ko na ongora n au bubuti!
2Tai motika taekan am toro ni kabuakaka;
b'a akea te aomata ae maiu ae e raoiroi i matam.
3E kaeai te tia ribaai,
ao I rawata ni b'ainikirinaki i rouna.
E katukai n te tabo ae roo, ao I riki
n ai aroia ake a kamani mate.
4Ma ngaia ae e mamara nanou,
ao ai akea te bae I kona ni karaoia.
5I uringi boong aika nako;
I iaiangoi am m'akuri ma b'aai ni kabane ake Ko karaoi,
ao i kaaki n au iango am m'akuri ni kabane.
6I tabeki rake baiu n tataro nakoim;
e kai nanou n tangiram, kanga ai aron te tano ae m'auteretere ni kainanoa te ran.
7Te UEA, Ko na ongo ngkai irou!
Akea au kaantaninga.
Tai karabako mairou,
b'a I kaawa n riki b'a temanna i buakoia ake a tia ni mate.
8Ko na kaururingai ni katoa ingaabong n taekan am Tangira ae Teimatoa,
B'a I onimakiniko.
I tataro nakoim;
kaota te kawai ae N na toua.
9Te UEA, N na kamanoai iroum;
Ko na kamaiuai mairouia aiau.
10Bon Atuau Ngkoe;
reireiai karaoan nanom.
E na kairiirai Tamneim ae e raoiroi n te kawai ae aoraoi.
11Te UEA, Ko na kamaiuai, n ai aron am Taeka.
Te Atua ae Ko raoiroi, Ko na buokai n rawaawatau!
12Ngkai Ko tangirai, ao tiringiia aiau
ma akana b'ainikirinai ni kabaneia;
B'a am toro ngai.
Who We AreWhat We EelieveWhat We Do
2025 by iamachristian.org,Inc All rights reserved.
