1Ao I korea te reta nako ia ibonga, burabeti, taani kairiiri irouia aomata, ao nako ia ni kabane ake a uotaki nako b'a taenikai i roun Nebukaneta mai Ierutarem nako B'aburon.
2I koreia i mwiin uotakinakoan te uea are Ieoiakin, ma tinana, mataniwiin te bareti, taani kairiiri i Iuta ma Ierutarem, taani karaob'ai, ao taani m'akuri aika a m'aatai b'a taenikai.
3I anga te reta nakon Erata ao Kemaria, mm'aane ake uoman ake e kanako ia te uea are Tetekia nako Iuta mai B'aburon b'a a na taetae ma Nebukaneta. Ao I korea
4ae te UEA ae Moan te M'aaka ae Atuaia Iteraera i nanon te reta, are E a tia n taekinna ae e kaangai:
I a tia n anaingkami mai Ierutarem nako B'aburon. I tuangkami
5b'a kam na maeka ikekei ma ni katei ami auti. Karaoi taian nne n aroka ao am'arake man b'aai ake kam uniki i nanoia.
6Kam na iein ao karikiia natimi, ao i mwiina kam na buokiia natimi mm'aane ni kakaaeia buuia ao buokiia naba natimi aine ni kakaaeia buuia, b'a a aonga ni karikiia naba natiia. I tangiria b'a e na rikirake m'aitimi, e na aki rikirake ni uarereke.
7Kam na tataro i bukin karekean te rau i B'aburon ao m'akuri korakora i bukin karekeani kab'aiami. Rikiraken nakoraoin te botannaomata bon rikiraken maiuraoimi.
8Bon te UEA Ngai ae Atuaia Iteraera, ae I kauringkami b'a kam na aki kam'aneaki irouia burabeti akana a maeka i buakomi ke naake te koraki ake a taku b'a a konaa n taetae ni burabeti i bukin boong aika a na roko. Kam na bon aki tabe ma miia.
9A taetae ni kewe nako imi n arau. I bon aki nako ia. Bon aei Au taeka Ngai ae te UEA.
10I mwiin rikin B'aburon b'a te kabanea ni korakora ni botannaomata i nanon itibwi te ririki, ao N na manga akoingkami ma ni kaokingkami nako Ierutarem.
11N na kakab'aiaingkami ni boong aika a na roko aika a on te kaantaninga; boong n tokanikai, tiaki boong ni karawaawata.
12Ane kam na oki nako iu ma ni buubutiai buokami, ao N na kaekai ami tataro.
13Ane kam na taromauriai ma nanomi ni koaua, ao N na raraoningkami
14ao N na kariaia ami taromauri. Ao i mwiina, N na bootingkami mairouia botannaomata nako ake I kamaaenakoingkami nako buakoia ngkoa, ao kam na manga okira Ierutarem.
15Kam taku b'a kam mano i bukina ngke kam taku b'a I kanako ia taiani burabeti b'a a na taetae i buku i B'aburon.
16Ongora nakon te b'ai ae e taekinna te UEA ae taekan te uea ake e tautaekana te abanuea are e tautaekanaki ngkoa i roun Tawita, ao taekaia naba kaain te kaawa ae e buubura aei, ake bon ami koraki ake kam kaai n aki uotaki nako ma ngaiia nakon te kataenikaiaki.
17E taku te UEA ae Moan te M'aaka, ‘N na karokoa te buaka, te baki, ao te aoraki i aoia, ao N na karaoia kaanga te biiku aika a rangi ni mori n te aro are a aki konaa ni kanaki.
18N na ririmwiia n taiani buaka, te baki, ao taian aoraki, ao a na bane ni maaku botannaomata n te aonnaba n te b'ai ae a nooria. A na tiaoki ma ni maaku aomata nako ake I kamaaenikuniia nako buakoia n te b'ai are e riki nako ia. Ane a na b'ainingareaki irouia aomata ao a na kamanenaaki araia b'a te kamaraia.
19E na riki aei nako ia i bukina ngke a aki ongotaeka nakon te rongorongo ae I teimatoa ni kanakoa nako ia rinanoia Au taani m'akuri aika burabeti. A rawa n ongo.
20Ngkami ni kabane aika I kanakoingkami nakon te kataenikaiaki i B'aburon, ongora nakon te b'ai ae I taekinna Ngai ae te UEA,’
21E a tia n taetae te UEA ae Atuaia Iteraera, i bukin Aaba are natin Koraia te mm'aane ao Tetekia are natin Maateia te mm'aane, are e taetaekina te kewe nako imi n arau. E a tia n taekinna b'a e na anga ngaiia nakon m'aakan te Uea are Nebukaneta are uean B'aburon, are e na kamateia i matami.
22Ngkana a tangiria ni kamaraiaa temanna aomata ake a uotaki nako b'a taenikai mai Ierutarem nako B'aburon a na taekina ae e kaangai, “Ke e karaoa nakoim te UEA aron are E karaoia naba ngkoa nakon Tetekia ma Aaba, ake e kabuekiia uean B'aburon ngke a bon taratara mataia!”
23Bon aei tokiia i bukina ngke a tia ni karaoa te bure ae e rangini buakaka—a tia ni wenenibure ao a tia n taekin taiani kewe n aran te UEA. E bon kaaitaraa nanon te UEA te aro aei, E ataa te b'ai are a tia ni karaoia, ao E bon riki b'a te tia kakoaua ni kaaitaraia. Bon aei au taeka Ngai te UEA.”
Ana Reta Temaia24E tuangai te UEA ae Moan te M'aaka, ae Atuaia Iteraera te b'ai are e na riki nakon Temaia, are bon ngaia temanna mai buakoia ara aomata i B'aburon.
25I mwiin rokon au reta irouia kaain B'aburon, ao e korea ana reta Temaia nako ia kain Ierutarem, n reitaki ma te ibonga are Teb'ania are natin Maateia te mm'aane, ao ibonga ake tabeman. E taku kanoan te reta nakon Teb'ania:
26I mwiin maten Ieoiata are te ibonga, E rineiko te UEA b'a ko na riki b'a te ibonga are e tararuaia te taanga ni bureitiman i bukin te Tembora. Ko ataia aomata b'a akana a boni baba ma ni bakaaea te riki ni burabeti a riai ni katikaki ma ni kabaeaki n taian tiein ao biiti are kabaean te roroa.
27E bakaaea te riki ni burabeti Ieremia are mai Anatota i aon Ierutarem, ao e aera ngkai ko aki katuaaea?
28Ao e boni korea naba te reta nako ia aomata i B'aburon ikai, ma n taku b'a e na tiku ikai n te tai ae e maan. E tuangiira b'a ti na katei mwengara ma ni katei ara nne n aroka ma n uniki oin kanara.
29Ngke e reke ana reta Temaia i roun Teb'ania, ao e warekia.
30Ao i mwiina, e a manga tuangai te UEA te b'ai ae N na manga koreia n te kauoua n reta
31nako ia kaain Iuta ake a uotaki nako B'aburon. I koreia i nanon te reta aei te b'ai are e taekinna te UEA:
Bon te UEA Ngai ae I aki rinea Temaia b'a e na riki b'a temanna te burabeti, ao e kam'aneingkami ngke e keweingkami n arau.
32E a tia n taetae nako imi b'a kam na aki ongotaeka nako iu. Ma ngaia are, N na katuaaea Temaia. Ngaia ma ana kariki a na kaai n aki noora te b'ai ae e raoiroi ae N na karaoia nako ia Au aomata. Bon aei Au taeka Ngai ae te UEA.
Who We AreWhat We EelieveWhat We Do
2025 by iamachristian.org,Inc All rights reserved.
