Iobi 6 - Kiribati New Version Bible

Ana Kaeka Iobi nakon EribatiE boni kanganga

1Ao e taku Iobi,

2Moan te kanganga b'a n na katinea

au kangaanga ma rawawatau!

3ao a na bon rawawata riki

nakon tanon taari,

ma ngaia ae I a tia n taetae

ma te aki iango moa.

4E a tia te Atua ni katebeai n taian kainikatebe,

ao e buta i nanon rab'atau boitinna.

E katauraoa buakanakiu te Atua.

5E rauaki te aati ngkana e am'arake,

ao e aki kakarongoa te kao ngkana e am'arake n te uteute.

6Ma antai ae kona ni kana te am'arake ae akea kangkangina, ao e aki taoro?

Tera kangkangin marain te bunimoa?

7Bon akea kukurein nanou n te aekaki n am'arake anne,

ao I a aoraki ni b'aai ni kabane ake I kang.

8E aera ngkai E aki anganai te Atua te b'ai ae I butiia?

E aera ngkai E aki kaeka au tataro?

9Tera ngke E tiringai ngkai!

10Ngkana I ataia b'a E na karaoa aei, ao N na bon kibakibarake ni kukurei,

I aki tabe ma korakoran marakiu.

I ataia b'a E tabu te Atua;

I bon tuai man kakaitarai Ana babaire.

11Tera korakorau ae N na kona ni kateimatoa iai maiu?

E aera ngkai I teimatoa ni maiu ngkai akea au kantaninga?

12Ai raon ae e karaoaki rab'atau man te atiibu,

ke te biti?

13Bon akea riki nikiran korakorau are N na kamaiua iai rab'atau;

bon akea te tabo riki teuana are N na kona n rairakiia i bukin buokakiu.

Raoraou, Ai Bon Akea Au Kantaninga.

14I tangiriia raao ni koaua i nanon te kangaanga n aron aei,

e aoria ngkana I kiitana te Atua ke I aki.

15Ma ngkami raoraou, kam kam'aneai kaanga taian karaanga n ran

aika b'atakataka ngkana e aki b'ab'aka te karau.

16A rabunaki taian karaanga n ran

n te tinoo ma te aiti,

17ma a mauna nako n te kabuebue,

ao e a tangenge kabin te karaanga ni m'autakataka.

18A b'ara nanoia taan m'ananga i aon kamero i bukin kakaaean te ran;

a tiotio nako ni mate i nanon te rereua.

19A kakaea te ran taani m'am'ananga i aoia kamero mai Teba, Tema,

20ma e a toki aia kantaninga i rarikin taian karaanga n ran aika m'autakataka.

21Kaanga ai aroia taian karaanga n ran aikai ngkami nako Iu;

kam noora te b'ai ae riki nako Iu, ma kam kararoai ngkami.

22I a tia ni butingkami b'a kam na anganai te kaniwanga,

ke ni butingkami b'a kam na kamaraa aton temanna i buku,

23ke ni butingkami kamaiuau mairouia kairiribai tabem'aang,

ke taan karawawata te aba?

24E raoiroi, reireiai, tuangai au kairua.

N na aki kakarongoa, ao N na kakauongo nako imi.

25Taetae aika koaua a nang anainano,

ma kam taetae n nanobaba.

26Tao kam taku b'a I taetae n akea nanona kaanga te ang,

ao tera bukina ngkai kam kaekai au taetae ni b'aeb'aeti?

27Ane kam na karaoa te katekeraoi i aoia ataei aika akea aia karo i bukin anaakia b'a ami toro,

ao kam na karekea kaub'aimi mairouia raoraomi ni koaua!

28Tara raoi matau,

I bon aki kewe.

29Kam a rangi n tibanako. An tai manga taekini taeka aika aki raoiroi.

Tai kabuakakaai, b'a I bon tei n te eti.

30Ma kam taku b'a I kewe

kam taku b'a I aki kona n taekina te eti man te kaairua.