Taian Areru 77 - Kiribati New Version Bible

(Ana b'ai aia Mataniwi taan anene; i bukin Ierutun; ana Areru Ataba)E mena te Atua irouia ana Aomata n tain te kanganga

1I kanenea b'anaau ni wetea te Atua;

I tang n takaarua, ao E ongo irou.

2I tataro nakon te UEA n tain te kaangaanga;

I tabeki baiu n tataro n te tairiki koraki,

ma e aki reke kabebeteau.

3Ngke I iangoa te Atua,

ao I rawaawata ma ni b'ara nanou;

4E kamatu tarataraai n te tairiki ni karokoa e ngaina;

I rangi n raraoma n te aro are I aki kona n taetae iai.

5I iangoi boong ake a b'aka nako,

Ao I uring ririki ake ngkoa.

6I kabanea aoan te tairiki n iaiango

Ngke I iaiango, ao aio te titiraki ae rio i nanou:

7E na teimatoa n ribaira te Uea ke E na aki?

E nang aki manga kukurei iroura?

8E a toki tangirara i rouna?

E na kakoro bukin ana taeka n akoi nakoira ke E na aki?

9E m'anuoka arona n akoi te Atua ke E aki?

E toki n nanoanga ngkana E un ke E aki?

10Ao I taku, “Aio te b'ai ae e rawaawata nanou iai

b'a E a toki ana kona te Atua are Moan te M'aaka ni buokira.”

11Te UEA, N na aki m'aninga taekani baike Ko a tia ni karaoi;

N na ururing baike a kamimii ake Ko karaoi ngkoa.

12N na iaiangoi baike Ko a tia ni karaoi,

ake am M'akuri ake a kamimii ni kabane.

13Te Atua, a bane b'aai aika Ko raoi n raoiroi.

Akea te atua ae kakannato n ai arom.

14Bon te Atua Ngkoe ae Ko kakaraoi b'aai ni kamimii;

Ko kaota korakoram i buakoia botannaomata.

15Ko kamaiua am Botannaomata ni m'aakam,

ake kanoan Iakob'a ma Ioteb'a.

16Te Atua, ngke a noriko taian ran, ao a maaku;

Ao a ruru nanoni marawa, kanga ai aron te aomata ae maaku.

17A nurakina te karau naang;

E rebwe te baa mai karawa,

Ao e itiiti n taabo nako.

18E ongo te aba rebwen am Baa n te ukeukenanti;

Ao e kaota aonnaba ootan te iti;

E ruru aon te aba ao e m'aeiei.

19Ko nakonako ri buakon naao;

Ko ri nuukani kabini marawa,

Ao a aki noraki m'anekam.

20Ko kairiia am Botannaomata irouni

Moote ma Aaron, kanga ai aron te

tia kawakin-tiibu ngkana e kaira te

nanai n tiibu.