Itaia 2 - Kiribati New Version Bible

Te Rau Ae Akea Tokina(Mika 4.1-3)

1Aio te rongorongo mai roun te Atua ae anganaki Itaia are natin Amoti i bukin Iuta ao Ierutarem:

2E na riki b'a te kabanea n rietaata

te maunga are e tei iai ana Tembora te UEA

ni boong aika a na roko.

E na bura i aon taian tabuki nako;

ao a na uarurung botannaomata nako iai.

3A na m'aiti aomata ake a na roko ao a na kaangai,

“Ti a nakon ana Maunga

te UEA ae Atuan Iakob'a

ma n taromauri n ana Tembora.”

E na reireiniira te UEA ana Tua

mai Ierutarem,

ao ti na ongotaeka i rouna.

4E na katoki taiani ngurengure

imarenaia botannaomata.

Ane a na urui aia kabaang

ma aia kainiwai

ni manga kariki b'a taian reeke ma tiabora;

ane a na aki manga karika te buaka

ke ni buakaniia i marenaia.

5Kaain Iteraera, ti na maiu

n ootan te UEA.

Irakin Katei Aika A Bure

6Ara UEA, ko a tia ni kiitaniia

am Aomata aika Iteraera,

i bukina ngke a katotoongi kateia

botannaomata ake mai mainiku.

A taromauriia antiia kaain Biritia

ao a rangi ni iraorao

ma taian ianena.

7Bon iai kaub'aia aika akea tokiia

aika tirewa ma taiani koora;

iai naba aia aoti ma aia kaanibuaka

aika a aki konaa ni warekaki.

8A taromaurii taiani bouannanti

aika a tia ni karaoi

n taabo nako i nanon te kaawa.

9Ma ngaia are, a na bane

ni mamaa ma ni b'ainrang.

Tai buokiia!

Te Bong Ni Motikitaeka

10Kam na nako ni karabaingkami i buakon taiani b'a

ao i aan te tano

ngkami ni kabane,

b'a e kakamaaku,

e kamimii, ao e mimitong te UEA.

11Ngkana e roko te UEA,

ao a na kananorinanoaki

aomata ngkoa ake a kamoamoa,

ao e na neboaki te UEA n ti ngaia.

12E a tia te UEA ae Moan te M'aaka

n rinea te bong

are a na b'aka iai

aomata ake a kamoamoa

ao a kainikatonga.

13A na mate

tiiran Reb'anon

ake a rangi n rietaata

ao ai aron naba taian kai ake oken Batian,

14ma taian maunga ma tabuki ni kabane ake a rietaata,

15taian nono aika a matoatoa.

16kaibuke ni m'am'ananga i taari,

ao booti ni kabane aika a tamaroa.

17Ngkana e roko te bong anne,

ao a na bane aika a kamoamoa

ni kab'akaaki.

Bon ti te UEA ae e na neboaki.

18A na nako taiani bouannanti i bukin karaoan te raoiroi.

19E raoiroi riki ngke kam karabaingkami i nanon taian nangananga ni b'aa ma taiani b'angab'anga

e na kakamaaku te UEA,

ma n tamaroa, ao ni mimitong

ngkana e roko ni ioioa te aonnaba.

20Ao n te bong arei ao a na karenakoi

aia bouannanti aomata ni kabane,

aia bouannanti ake a karaoaki n te tirewa ma te koora

i bukin te taromauri.

21E na kakamaaku te UEA,

man tamaroa, ao ni mimitong

ngkana e roko ni kakamaakuia

kaain aonnaba

ane a na karabaia i nanoni b'angab'angan taiani b'a

ao i aon taian tabuki.

22Katoka onimakinan

m'aakaia aomata.

A na boni bane ni manga mate,

ao a na kangaa ni buokingkami?