Itaia 11 - Kiribati New Version Bible

Reken Te Rau

1Kaanga te m'aanga ae e bwebwerake

man te boto,

ao ai aron naba temanna ae e na nako man ana utu Tawita

are e na uea n te bong teuana.

2E na meemena

taamnein te UEA i rouna

n anganna te ataib'ai,

te rabakau, ao te wanawana.

E na korakora,

ao e na ataa te UEA

ma ni karinea.

3E rangi ni kukurei

n ongotaeka iroun te UEA.

E na aki motikitaeka

ti n te b'ai ae e nooria

ke n taian maningongoo.

4E na karaoaki raoi te eti ma te riai

nakoia aomata aika a maiu ni kainano ao a tangira buokaia.

Ana riki ana taeka b'a taian tua

i aon te aba ni kabutaa,

ao a na bane n tiringaki

taani bure.

5Ana niiniira ni uea

bon te raoiroi ma te riai.

6A na kaai ni wene

taian reeb'ari ma taiani kooti,

ao a na kaai ni katoki kuaia taiani kamea anti

ma taian tiibu te teei.

A na kaai n am'arake

taian kao te teei ma taian raian

ao a na kaawakinaki

irouia ataei aika a uarereke.

7A na kaai n am'arake n aia uteute ae ti teuana

taiani kao ma taiani bea;

ao a na kaai ni wene

ni katoki kuaia buniia.

a na kaai ni kana te uteute

taian raian ma taian kao.

8A na takaakaro ataei

i rarikin b'angaia taian naeta.

A na karin baiia i nanon b'angaia taian naeta aika a rangi ni boitin

ao a na aki ikoaki.

9Akea te kabuanib'ai ae e na konaa n riki

i aon ana Maunga ae e tabu te UEA.

Aron te ran ngkai ae kaona taari

ao ai aron naba te aba b'a e na kaonaki

irouia aomata

antai ae e ataa

ma ni karinea te UEA.

A Na Manga Okira Mwengaia Ana Aomata Te Atua

10E na roko te tai are e na anga iai te kanikina nakoia aomatan te botannaomata b'a a na ikotaki. A na iri ana kaetieti, ao a na tanoata taekaia ake bon oin ana botannaomata.

11Ngkana e roko te bong arei, ao e na manga arora baina ae e m'aaka te UEA ni kaokiia ana Aomata nakoni mwengaia ake taian nikira ni maiu mai Aturia, Aikubita, Bateroti, Itiobia, Eeram, Tina. Amata, ao te aba are i mataniwiin taari.

12E na anga ana kanikina nakoia botannaomata akanne, ao e na manga ikotiia taan rawei maiuia mai Iuta, ake a tia ni uamaae nako i aon te aonnaba ni kabutaa.

13E na aki manga bakantang Iteraera iroun Iuta, ao e na aki manga riki Iuta b'a a na kairiribai Iteraera.

14Ma a nang ikoikotaki ni buakana Biritia i maeao. Ao i mwiina, a na kataenikaia kaain Etom, kaain Moaaba, ao kaain Ammon ake i mainiku. A na tautaekaniia aomata aikai ma n anai mairouia b'aai ake a tangiri.

15E na kam'autereterea m'aangan Taari are Uraura te UEA are i rarikin Aikubita, ao e na kanakoa te ang ae e kabuebue b'a e na bwenaua te Karaanga are Iuberetiti nakon itiua m'aangana aika a konaa n nakonako i nuukana aomata.

16Ao e na karekea te kawai ae e tamaroa mai Aturia i bukiia ana aomata ake nikira ni maiu, n aron te kawai naba ae e tamaroa ngkoa i bukiia aia bakatibu ngke a kiitana Aikubita.