Etekiera 32 - Kiribati New Version Bible

Te Anene Ni Mate I bukin Aikubita

1Tebwi ma uoua te ririki i mwiin kairakin te Uea are Ieoiakin ma nikiraia ara koraki b'a taenikai nako B'aburon, ao E taetae te UEA nako iu ni moanibongin te katebwi ma uoua n nam'akaina. E taku:

2Etekiera ae natin te aomata, ko na kabuakaka uean Aikubita ao tuangnga te b'ai ae I taekinna:

Ko karaoa aron te raian

n aiwaa ni m'aninga nako n te aonnaba;

ma bon akea manenam n ai

aron te korokorotaire i nanon te karaanga,

n rairairaki i nanon te bokaboka

ma waem.

3Uean Aikubita ko na ongora irou. Bon te UEA Ngai ae te Atua, ae N na m'aneiko n au karaun ao N na karaoia te koraki n ianena b'a a na uaakiniko nako mataniwiin taari.

4N na karenakoko nako nanon te tawaana ae e mataata, ike a na roko mannikiba ao maan nako ni kana rab'atam.

5N na kamaaenikuna rab'atam ngkana e a buakaka i aon taiani maunga ao i nanon m'arua,

6ao e na raanga nako rab'atam i aon te aba ma ni kaon taian raanga n ran.

7N na kaona karawa ni kabutaa ma taian itoi n taian nang aika a matenten, b'a a aonga n toki ootan taai ma nam'akaina.

8E na riki n roroo taiani karawa, ma ni karootongitonga abami. Bon aei au taeka Ngai ae te UEA.

9A na tiaoki ianena aika ko tuai man ongongo taekaia ngkana I taekinna nakoia aron kamaunakim Irou.

10Ane a na maaku, ao ngkana I karaaitia au kabaang n tokanikai n te bong are ko na mate iai, ao e na ruru ni maaku aia uea n te b'ai ae e nang riki nakoia.

11E na roko uean B'aburon ni buakaniko, ngkoe uean Aikubita!

12A na tiringaki am tautia irouia te taanga ni buaka aika taani iowawa n te aonnaba, ao a na bane ni kamanatuaaki b'aai nako ake ko karekei n te baabakanikawai.

13N na tiring ami nanai ni kao aika a am'arake i rarikin te karaanga, ao bon akea te aomata ke taian man aika a na tiku ni kamantoaa ranna.

14E na itiaki te ran, ao a na rau taian raanga n ran. Bon aei au taeka Ngai ae te UEA ae te Atua.

15E na riki Aikubita b'a te aba ae akea kain aona ae akea manenana, ao bon akea te b'ai teuana ae e maiu ae e na konaa ni manga maiu ikekei. Ao ane ko na ataia ma am aomata b'a bon te UEA Ngai.

16Bon anne te kauring nakoim, ao e na kamanenaaki b'a te anene ni mate irouia aine ianena i bukin te b'aeb'aeti i bukiia am aomata. Bon aei au taeka Ngai ae te UEA ae te Atua.

Tokin Aikubita Ae E Kananokawaki

17E taku te UEA ni katebwi ma nimauan te nam'akaina naba anne:

18Etekiera ae natin te aomata, ko na tanginiwenei i bukiia kaain Aikubita ao kabuakakaia nakon aia aonnaba maate, ike a na taunaki iai i rarikiia aomata mani botannaomata ake tabeua ake a korakora.

19Ko na kaangai nakoia:

Ko na bae n tamaroa riki

nakoia aomatan

botannaomata ake tabeua,

ma ko na bon mate naba

ma n raoniia koraki ake akea atuaia

n te aonnaba are inano.

20Ko aki konaa ni birinako! E tauraoi aia kabaang kairiribai n tiringingkami ni kabane.

21A na rangi ni kukurei ni butim'aiko ma taan raoniko n te buaka taan kairiiri aika a ninikoria ake a mate i nanon te buaka nako abaia maate.

22Ake a mena naba ikekei Aturia, ma taian ruanimate ni katobibia. A na bane n tiringaki n te buaka,

23ao a mena ruanimateia ni m'akoron abaia maate are e rangi n nano. A na bane ni b'aka ana tautia ni kabane n te buaka, ao e na katobibiaki n ruanimatena are n te nangananga ni b'aa. Bon taan kakamaakuia ngkoa aomata ngaiia n abaia ake a maiu.

24“E mena ikekei Aram, ma ana tautia ni katobibia. A bane ni mate n te buaka, ao a b'aka rikaaki, n aki korotabonim'aneaki, nakon abaia maate. Ngke a mena ngkoa n te maiu a kabutanakoa te maaku, ma ngkai a wene ni mate ma ni kab'ainrangaki.

25E wene Eram i rarikiia ake a mate n te buaka, ao e katobibiaki n ruanimateia ana tautia. A bane n tuai korotabonimm'aaneaki, a bane ni mate n te buaka. A kabutanakoa te maaku ngke a maiu ngkoa, ma ngkai a wene ni mate ma ni kab'ainrangaki, ma n uataboa katauaia koraki ake a mate n te buaka.

26A mena ikekei ruanimateia tautia mai Meteka ao Tubara.

27E aki reke nakoia te taunaki ae e riai n aroia koraki aika a kakannato ni bong ake ngkoa, ake a taunaki ma aia kabaang i aan atuuia ma aia otanga i aon rab'ataia. Aikai aomata aika a kakannato ake a karekea te biu irouia aia kairiribai.

28Kam na konaaki buaka kaain Aikubita ao kam na taunaki i rarikiia tautia aika akea atuaia ake a mate n te buaka.

29A mena ikekei ruanimateia uea ma taani kairiiri mai Etom. A korakora n aia tai. Ngkai a taunaki i abaia maate i rarikiia tautia ake akea atuaia ake a mate n buaka.

30A mena ikekei ruanimateia taan tautaeka mai meaang, ao ai uana naba ma kaain Titon. A kakamaaku ngkoa aia taanga ni buaka ae e korakora. Ma ngkai a wene n taunaki i abaia maate, ike a kab'ainrangaki iai n ai aroia tautia ake tabem'aang ake a mate n te buaka.

31Boni Ngai ae te UEA ae te Atua ae I taekina ae e kaangai:

Ngkana e noori ruanimate aikai ni kabane ami uea are uean Aikubita, ao e na kukurei ma ana tautia b'a tiaki ti ngaiia n rawaawata.

32I kanakoa nakoia aomata aika a kakamaaku ni kabutaa te aonnaba. Ma a na tiringaki ma tautia ma n taunaki i rarikiia tautia ake akea atuaia i abaia maate. Bon aei au taeka Ngai ae te UEA ae te Atua.