2.Rongorongo 28 - Kiribati New Version Bible

Uean Iuta are Aati(2 Uea 16.1-4)

1E moana ueana Aati i aon Iuta ngke ai tib'a uabwi ana ririki ni maiu, ao e tautaeka mai Ierutarem i nanon tebwi ma onoua te ririki.

E bon aki katotoonga ana bakatibu are Tawita te uea are Aati. E aki ongotaeka iroun te UEA

2ao ti te bo ana bure ma aia bure uean Iteraera. E karaoi bouanantin Baara,

3ao e anga karea n te M'arua are Innom. Ana bure ae e rangi ni buakaka ngke e anga oin natina te m'aane b'a ana karea, are bon te katei ae moan te buakaka ngkoa irouia te botannaomata ake a kanakoaki iroun te UEA mai aon Iteraera.

4E angakarea, Aati ni baangotan te aba ao ai uana naba ma aon taian tabuki ao nuun taian aroka aika a buubura.

Buakanakin Iuta Irouia Kaain Turia ao Iteraera(2 Uea 16.5,6)

5A bure ao a tannako mairoun te UEA ae te Atua are e taataromauriaki irouia aia bakatibu Aati ma kaain Iuta. Ma ngaia are, e katuuaia te UEA ni kataenikaiia irouia aia kairiribai.

6E buakana Iuta uean Turia ao e anai aomatana aika a bati mai iai nako Tamateko b'a taian taenikai.

Rimwi riki, e kataenikaiia kaain Iuta uean Iteraera are Bika ma n tiringiia tebubua ao uabwi te ngaa mai buakoia ana tautia ake a ninikoria n teuana te bong.

7I nanon tain te buaka anne, ao temanna tautian Iteraera ae arana Tikeri e tiringiia teniman m'anen Iuta aika: Maateia are natin te uea; Atirikam, te mataniwi temanna are e tararua te bareti; ao Erekana, ana kauoman ni mataniwi te uea ae e kakannato.

8A tauia uoua te ngaa aine ma ataei ana taanga ni buaka Iteraera ao a uotiia nako nakon atuun aia tautaeka are Tamaria, ni ikotaki ma aia b'ai aika moan te rawata. A karaoa aei nakoia kaain Iuta, e ngae ngke bon aia koraki.

Kabuakakaakin Iteraera Iroun te Burabeti are Oteta

9E maeka Oteta i Tamaria ao temanna ngaia ana burabeti te UEA. E kaaitibo ma ana taanga ni buaka Iteraera ngke e oki rikaaki mai Iuta ao e taku nakoia:

E katokanikaingkami te UEA i aoia kaain Iuta ti i bukina ngke e un irouia. Ma kam na aki karaoa ae e rangi ni buakaka nakoia!

10Ngkana kam karikiia b'a ami toro kaain Iuta ma Iteraera, ao kam na bure kaakaiaki n ai aroia nakon te UEA.

11Kaokiia ami taenikai aikai nakoni mwengaia—bon ami koraki nako. Ngkana kam aki, ao e na manga katuaaingkami te UEA ni unna.

12Ni bon te tai naba arei, ao a roko ana taani kairiiri Iteraera aika aman. Naakai bon Ataria are natin Ioanan te m'aane, Berekia are natin Metiremota te m'aane, Ieitikia natin Tiarum te m'aane, ao Amata are natin Aterai te m'aane. E boraoi aia iango ma Oteta n ae e kaairua ana taanga ni buaka Iteraera n are a karaoia,

13ao a taku:

Ngkana kam uotiia taenikai aikai nako Tamaria, ao kam a bon kabatia riki iai ara bure iroun te UEA. Ao bon iai naba ara bure i rouna.

14Ma ngaia are, a kaoki aia taenikai te taanga ni buaka arei nako mataia taani kairiiri ma aomata ao taiani b'ai ake a anai i Iuta.

15A anai tabeua taiani kunnikai ake a iraeaki taani kairiiri ake aman akekei, ao a anganiia taenikai ake a kainanoa rabunan rab'ataia. Rimwi riki, a manga anganiia kunnikaiia ao aia kauniwae aika a boou, ao a manga anganiia kanaia ma nimaia, ao a kaitiaki ikoakiia ni b'aan te oriwa. A anga taian aati nakoia ake a mamaara n nakonako, ao a manga kaokiia nako Ieriko, te kaawa ae e tanoata taekana i bukin taian aroka aika baam i aona. Ao a okirikaaki taani kairiiri akekei nako Tamaria.

Ana Buubuti Aati Buokana Nakon Uean Aturia(2 Uea 16.7-9)

16Tabeua te tai i mwiina, ao a manga buakana naba iteran Iuta are mai mainiku kaain Etom ao a uotiia nako aia taenikai.

17Ao ni bon te tai naba arei, kaain Biritia a manga eekinakoi kaawa ake n aaba ake a tabukibuki ake i maeao ao ake Rereuan Maiaki.

18A reke irouia kaawa ake Beta-Temeti, Aiiaron, Keterota, Toko, Timna, ao Kimto, n reitaki ma kaawa aika a uarereke ake i rarikina nako. Ao i mwiina, a m'ananga tabeman kaain Biritia ni maeka n taabo aikai.

E kanakoa ana rongorongo Aati nakon uean Aturia are Tikerata Biretera ni buubutiia buokana.

19Ma e katuaaia kaain Iuta te Atua n taiani kabuanib'ai aikai, i bukina ngke e a tia Aati n aki ongotaeka i rouna ao e aki kan katoka Iuta man karaoan te bure.

20Ma ngaia are, e a roko Tikerata Biretera nako Iuta, ma e aki buokia b'a e a karawaawataa riki.

21E anga Aati taiani b'aintangira nako ina man ana Tembora te UEA ao ana bareti te uea, n reitaki ma b'aai mani mwengaia taani kairiiri mai Iteraera ake tekorakina. E rawa naba uean Aturia ni buoka Aati.

Ana Kabanea Ni Bure Aati ao Matena

22Bon i mwiin rikin kaangaanga aikai nakon Aati, ao e bon manga bure naba nakon te UEA n ae e a rangi ni korakora riki nakon are mai m'aaina.

23E taku i bon i rouna, “A tia ngkai antin Aturia ni buokiia aia uea ni kataenikaiai. Tao ngkana I angakarea nakon taian anti aikai, ao a na bae ni buokai.” Bon anne te bure are e a kab'aka Aati, ao ni karokoa naba uruan Iuta.

24E rikoi b'ain nanon te Tembora ni kabane Aati ao e urui ni kamaenikuni. I mwiina, e kain mataroan nako te Tembora ao e katea te baonikarea i bukiia antiia ianena ni koonan taiani kawai i nanon te kaawa i Ierutarem.

25E karaoi baangotan te aba i bukin taromaurian antiia ianena. E kauna te UEA ae Atuaia ana bakatibu b'aai aikai ni kabane.

26A bane ni koreaki b'aai ni kabane ake e karaoi Aati i nanon ana tai ni uea n Rongorongoia Uean Iuta ao Iteraera.

27E mate Aati ao e taunaki i Ierutarem, ma e aki taunaki n ruanimateia uea. E a manga uea natina te m'aane are Etekia i mwiina.