Itaia 43 - Kiribati New Version Bible

E A Tia te UEA Ni Kamaiuia Ana Aomata

1Kanoan Iakob'a,

Boni Ngai, ae I karikiko

ma ni boboota ami botannaomata.

Iteraera, ko na aki maaku.

I a tia ni kamaiuko.

I a tia ni weteiko n aram;

ao ngkai ai au aomata ngkoe.

2Ngkana ko ri nanon te iabuti,

ao I memena iroum,

ao ko na aki b'ab'a.

Ngkana ko ri buakon te ai,

ko na aki bue

ke ni maraki ni kabuebuena.

3Ngai te Uea, ae Atuam.

I anga Aikubita, Itiobia,

ao aonon Tieba

b'a oneani mwiim.

4Ko rangi n tangiraki irou,

Ao bon anne bukina ngke I kaaki taekaia botannaomata

ma taian aomata i bukin kamaiuam.

5Ko na aki maaku b'a I raoniko.

N na ikotingkami

mai mainiku ao maeao.

6N na kaangai nakon meang

ao maiaki,

“Kainaomataia natiu m'aane ma natiu aine!

kaokiia

man aaba aika a raroa.

7Bon au aomata

I karikiia n tatabemaniia nako

b'a a na karineai.”

Bon Ti Te UEA Te AtuaAo e taku te UEA:

8Ikotiia au aomata.

Bon iai mataia ao taningaia,

ma a aki konaa n ongo ke n noraaba.

9Tuangiia botannaomata ni kabane

b'a a na ikotaki.

Bon akea mai buakoia ae e konaa n taetae ni kaangai,

“Antai ae e tuangingkami!”

Ngkana iai ae e ongo b'a a taekina te baei,

ao tuangiira taekana n te tai aei.

10au Aomata bon au taani kakoaua ngkami

ao taani m'akuri aika kam rineaki.

I tangiringkami b'a kam na ataai,

n onimakinai, ao n ataia

b'a bon ti Ngai te Atua.

Bon te Atua Ngai mangkoa;

ao bon akea riki temanna i rarikiu.

11Bon ti te Atua Ngai;

bon ti Ngai ae I konaa ni kamaiuko.

12I berita b'a N na kamaiungkami,

ao I kaawakina au berita.

Bon au taani kakoaua ngkami

b'a bon akea riki te anti temanna ae a tia ni karaoa aei.

Bon aei au taeka Ngai ae te UEA.

13Bon te Atua Ngai ngkai ao n aki toki.

Bon akea ae e konaa n rawei ngkami mai irou.

ke n te tei i m'aain kawaiu.

E Na Katauraoa Te Kawai Te UEA

14Bon Ngai ae te UEA ae N na kamaiungkami!

Bon Atuan Iteraera ae e tabu Ngai,

N na kanakoa te taanga ni buaka

nako B'aburon i bukimi

b'a e na uaakiniia nako aomatana,

ao a na tang ngke e tabe n nako.

15Bon Atuam Ngai ae e tabu,

Ana tia karikib'ai Iteraera ao ana Uea.

16Boni Ngai are I katabwena te kawai

i nanon te marawa ae korakora.

17I kanakoa te taanga ni buaka b'a e na kakioko

n taian kaanibuaka ao taian aoti;

ao ngkai a wene ni mate,

a aki konaa ni kakam'akuri.

A riki b'a kaanga te taura te b'aa

are e a tiringaki.

M'aninga Taekan Boong Aika A Tia N Nako

18M'aninga b'aai aika a tia n nako n taai aika a nako!

Kam na aki ururinga te tai ae e a tia n nako.

19I a karika te b'ai ae e boou.

Bon arei! Kam nooria?

I a tia ni karaoi taiani kawai i nanon taian rereua,

ma taiani karaanga n aaba aika a m'auteretere.

20A bane maan aika a aki manana ni karineai,

ao ni karokoa naba taian tiakaore ao taian aure. I katauraoa te ran n taian rereua

taian karaanga n ran n aaba aika a m'autakataka

i bukiia au aomata aika a rineaki.

21I karikiia b'a oin au botannaomata,

b'a a aonga n neboai.

22I taku Ngai ae te UEA nakon Iteraera:

Ko a rangi ni kua,

ma ko aki kua i bukin taromauriau.

23Ko a tia n aki karineai

ni karean taian tiibu

ma maan riki tabeua.

Ao I tuai ni karawaawatako

n tangiri taian karea

ke taiani b'ai ni kaboiarara.

24Kam tuai man uoti

taian b'ai ni kaboiarara aika a raraoi i buku

ke n anganai raraoin m'akoron

ami man ake taian karea.

Ma n onea mwiin anne, kam karawaawataai

n ami bure aika a rangi ni buakaka.

25Ma I kamaunai ami bure

i bukina Ngke Ngai ae boni Ngai.

Ma ngaia are, I m'aninga

taiani kairua ake kam a tia ni karaoi.

26I a kaitibo ma ngkami n te kaboowi!

Kaota ami tangitang

ao kaota te kakoaua

b'a kam bon eti.

27A kakaitaraai

ami moani bakatibu

ma ami taani kairiiri

28Ao bon anne bukina ngkai I aki kariaia

ami ibonga b'a a na m'akuri ibuku;

E na kamaunaaki Iteraera

ao a na kamaamaaeaki ami aomata.