Taian Areru 88 - Kiribati New Version Bible

(Aia Areru ma aia anene natin Kora; ana b'ai aia Mataniwi taan anene; n te b'ana ae Mahalath Leannoth. Maschil ae ana b'ai Eman ae tibun Etera)Tangiran te Kani Buokaki

1Te UEA ae te Atua, ae au tia kamaiu,

I tang nakoim ni ngaina ao ni bong.

2Ko na ongo au tataro;

ongora n tangiu ni kani buokaki!

3A taonai taian rawaawata aika bati

n te aro ae I a kaani mate iai.

4Ti te bo ngai ma aomata nako aika a kaani mate;

Ai akea korakorau.

5I tiku n aki tabeakinaki i buakoia maate;

Ai aroia akana kamateaki ngai ni wene i nanon ruanimateia,

Ake te koraki ake akea uringaia naba teutana iroum,

Ake akea buokaia n reke mairoum.

6Ko katukai n te tabo ae nano i nanon te ruanimate,

n te tabo ae rotongitong ae e rangi n nano.

7E b'aka n rawaawata unim i aou,

kanga ai aron naao aika b'aroai ni kamanatuaai.

8Ko kararoaia raou mairou;

Ko karaoa ae N na bati n ribaki irouia.

I kainaki ao I aki kona n oti nako;

9A mamara matau n taratara i bukin rawaawatau.

Te UEA, I weteiko ni katoa bong

ao I tabeki rake baiu n tataro nako Im.

10Ko karaoi baika kamimii i bukiia maate?

A teirake maate n neboiko?

11E tataekinaki am Nanoanga i nanon te ruanimate?

Ke am Kakaonimaki i Abaton

12A noraki am M'akuri aika Kamimii n te tabo are roo,

Ke am Raoiroi n te aba are a m'am'anuokaki b'aai iai?

13Te UEA, I weteiko i bukini buokau;

I tataro nakoim ni katoa ingabong.

14Te UEA, bukin tera ngkai Ko ribaai?

Bukin tera ngkai Ko tan nako mairou?

15I titiku ma te rawaawata ae e kaan ae N na mate iai ma ngke te teei ngai;

I taonaki n rawawatani baika kamaamate aika nako mairoum, ao I a aki konai moaia.

16I rawata n unim ae korakora;

I mate n am B'ai ni kakamaaku.

17A otab'aniniai n taai nako kanga ai aron ranin te ieka;

Ao I a katobibiaki irouia.

18Ko kararoaia mairou raoraou aika I rangi n tena ma ngaiia,

Ao ai ti ngai n tiku n te roo.