Itaia 21 - Kiribati New Version Bible

B'akan B'aburon

1Aio rongorongon te rereua are i rarikin taari:

A na buaka kairiribai

man aia botannaomata kairiribai

kaanga te ukeukenanti

man Rereuan Maiaki.

2Bon te kaotioti ae e kakamaaku

are e kaotaki nako iu

te kaotioti i bukin te kam'aam'ane

ao te urub'ai.

Tuanga Eram ao Miria

b'a a na katobibia

man buakaniia

kaain B'aburon.

E a tia n tuea te UEA b'a na katoka

te karawaawata are a karikia.

3E a rangi ni korakora marakiu

kaanga te aine ae e ariri ni bungiia natina.

I tiaoki mani ikoaki korakora

n te aro are I a bonotaninga ke n aki noraaba.

4E minotaki atuu; I a maaku!

N te moan tairiki, a onikaki au tai aika a kukurei

nakon te miibuaka.

5A karaoa aia baka n am'arake

taiani mataniwi aika a rietaata i B'aburon.

A am'arake ma ni mooi,

ngke e a ti takaarua naba temanna ni kaangai,

Mataniwi, kaei ami tabo!

Kurii otangami.”

6E taku te UEA nako iu,

“Kanakoia taan tei

b'a a na kakaaea

b'a tera ae e a riki.

7Ngkana a nooria te taanga ni buaka aika taan toka i aoia aoti

ao te koraki n tautia aika a boorein

man toka i aoia aati ma kaamero,

ao tuangiia b'a a na tauraoi.”

8Ao a taku taan tei

“I a tia n tei n te ngaina ma te bong

i aon te taua n taratara aei, te UEA.

9Ao ngkai I a nooriia taanga n tautia teuana ma teuana

aika boorein aika taan toka i aoia aoti.”

Ao e takaarua temanna ni kaangai,

“E a b'aka B'aburon!

a bane ni wene n uruaki taiani bouannanti

i aon tano ni uruaki.”

10Ao i mwiina, I a kaangai, “Au aomata,

kam a tia n rangi n rawaawata,

ma iai au rongorongo nakoimi

mai roun te UEA ae Moan te M'aaka,

ae Atuan Iteraera.”

Ai Ti Maanra Riki?

11Aio te rongorongo i bukin Ruma:

E takaarua temanna nako iu

man te kaawa are Teira

“Taan tei, ai ti maanra riki

ao e a ngaina?”

12Ao I kaeka man te boua are au tabo n tei ni kaangai,

“E na waekoa n roko te ngaina,

ma e na manga oki naba te tairiki.

Ngkana ko kan ataia riki,

ao ko a manga oki riki rimwi.”

13Aio te rongorongo i bukiia kaain Arabia

ake a maeka n te rereua are e mate

are n aonon Tetan:

Ko riai ni kaoiia am kaa ni m'ananga

14b'a a na uota te ran i bukiia

aika a bora n taka.

Ngkami aika kaain Tema

kam na riai ni uoti taian am'arake

i bukiia taan rawei maiuia aika a bora ni baki.

15A kua ma ni kainano

i mwiin kakioakiia irouia aia kairiribai

ma taian kabaang ao taiani kainikatebe.

16E taku te UEA nako iu:

A nang toki mimitongiia kaain Keta man te ririki aei, kaanga aron banen ana tai te tia m'akuri i mwiin teuana te ririki.

17A na ti tabeman nikiraia aia taani buaka ma aia kainikatebe ao aia kanoa nikatebe. Bon te berita te b'ai aei ae I a tia ni karaoia Ngai ae te UEA ae Atuan Iteraera.