Etekiera Taekan te boki aei - Kiribati New Version Bible

Taekan te boki aeiEtekiera bon te ibonga temanna ao te burabeti naba. E a uotaki nako b'a te taenikai nako B'aburon, ike e kaai ni maeka ma taenikai mai Iuta. E rinea Etekiera b'a ana burabeti te UEA b'a e na kab'arab'ara, tiaki ti nakoia taenikai i B'aburon, ma bon nakoia naba ake a bon maeka i aon Ierutarem. E waakina ana m'akuri Etekiera ni kaaniia te ririki ae 593 BC, i nanon ana kabanea n ririki te abanuea are Iuta, ao e toki ni kaaniia 570 BC, tabeua te ririki i mwiin b'akan Ierutarem (586 BC). E kab'arab'ara Etekiera i m'aain ao i mwiin te kabuanib'ai aei, ao angiin ana rongorongo a taekina te motikitaeka ao tabeua a anga te kaantaninga.E konaa ni bwenauaaki te boki ae Etekiera nakon nimaua te m'akoro. Te moani m'akoro (1—3) e kab'arab'araaki iai miin Etekiera i bukin mimitongin te UEA ae e taekina aron te UEA n rinea Etekiera b'a ana burabeti. Te kauoua ni m'akoro (4—24) a mena iai rongorongon te kauring nakoia kaain Iuta b'a e na waekoa n roko katuaaeaia i bukina ngke a tannako mairoun te UEA. E bane ni karaoi ni kabane taiani kauring aikai Etekiera. Ao te katenua ni m'akoro n te boki (25—32) a taekinaki iai ana motikitaeka te UEA i aoia botannaomata ake i rarikina.Te kaaua ni m'akoro n te boki (33—39) bon ana rongorongo Etekiera i mwiin ongona b'a e a tia n tauaki Ierutarem. Rongorongon kaantaninga aikai, E berita te UEA b'a E na kab'arai aia bure ana aomata ma ni kaokiia nako Iuta ma Ierutarem. Te kabanea, te kanimaua ni m'akoro n te boki (40—48) bon te kaotioti nakon Etekiera n te Tembora i Ierutarem, ana tua i bukin aaro n taromauri ni koaua, ao aron tib'aakin aban Iteraera are e a manga oki i marenaia baronga.Ngke e taetae te UEA nakon Etekiera, e aranna b'a “natin te aomata”. E ngae ngke e kaotaki n te kab'arab'ara aei b'a bon te aomata Etekiera, ma e bon kaotaki naba iai b'a e a tia n rineaki b'a e na kab'arab'ara ana rongorongo te UEA nakoia kaain Iuta ao Ierutarem.Te kibu teuana ae e rangi n ataaki man te boki ae Etekiera bon te kaotioti n te m'arua are e onrake n taian rii. E mataku Etekiera iroun Tamnein te Atua ngke e uka ikeikena nakon taian rab'ata ake a mate akekei, ao e bon nooriia ngke a manga maiu. Ao i mwiina E tuanga Etekiera te UEA ni kaangai:Ti te bo Iteraera ma taian rii aika a m'au. A ngurengure b'a a m'au ao bon akea kaantaningaan boong aika a na roko. Ma ngaia ae ko na kaangai nakoia. “Ngai ae te UEA ae te Atua ae I berita b'a N na kauki taian ruanimate ma ni kainaomataingkami. N na manga kaokingkami nako Iteraera... E na anganingkami te ikeike ni maiu Tamneiu, ao kam na manga maiu.”(37.11,12,14a)Oi n iango i aon te boki aeiNoorakin mimitongin wetean Etekiera (1.1—3.27)

Motikan taekan Iuta ma Ierutarem iroun te Atua (4.1—24.27)

Motikan taekaia botannaomata ake tabeua (25.1—32.32)

Ana berita te UEA nako ia ana aomata (33.1—39.29)

Okin mimitongin te Atua i aon Iuta ao Ierutarem (40.1—48.35)