1-2Ko kakaewenakoa te Atua ae m'aaka Iobi;
Ko na kab'ara nanom mai iai ngkai, ke ko na kaeka?
3Ao e taku Iobi,
4I taetae ni baba te UEA, tera ae N na kona ni kaeka?
N na bon aki kataia n taekina riki te b'ai teuana.
5E a tia n rianako au taetae ni kawai.
6Ao E a manga taetae riki te Atua nakon Iobi mai buakon te angibuaka.
Te UEA7Teirake ngkai ni kaetiko,
ao kaekai au titiraki.
8Ko kataia ni kakaea te koaua b'a I kakaraoa ae aki eti
ko taekinai b'a I kaairua, ao ngkoe ko eti?
9E boraoi korakoram ma Ngai?
Ko kona ni karebwea b'anaam n ai aron rebwen te baa, kaanga b'anaau?
10Ngkana e koaua, ao teirake kaota karineam ma kakannatom,
ao kunnikaiko n te neboaki ma te mimitong.
11Nooriia aika kamoamoa,
kaota unim nako ia b'a aonga ni kananorinanoia.
12Eng, taraia, ao uotia rikaaki,
kamanatuaia aomata aika buakaka n te tabo are a mena iai.
13Tauniia i nanon te tano,
kabaeia i abaia maate.
14Ao boni Ngai te moan neboiko
ma ni kakoauako b'a ko bon tokanikai n oin korakoram.
15Ko na tara te man ae korakora
ae I karikia, ao I karikiko naba.
E kakana te uteute n ai aron te kao,
16ma ai tera te korakora are n rab'atana,
ma te marurung are i aan rab'atana!
17E tei n etiruru bukina,
ao a marurung iana ake n rangana.
18A korakora riina n ai aron te biti,
ao rangana ai aron te b'a te nari.
19Boni ngaia te kabanea ni kamimii mai buakoia au karikib'ai!
Bon ti teuare E bon karikia ae kona ni kataenikaia.
20A rikirake uteute ake e am'am'arake iai i aon taian tabuki,
ike a memena iai maan aika katam'anti.
21E wene i aan taiani buakoako aika kateketeke,
ao E karaba i buakon uteuten te kaneinei.
22E kanuua i aan nuun kaai
aika kateketeke ma kaai riki tabeua.
23Bon akea maakuna n te karaanga ae korakora airana,
e ngae ngke e namakina korakoran te aira i aon ubuna, ma bon akea naba kubana.
24Antai ae kona ni kamatakiia, ma n taua,
ke antai ae kona n rawea b'airina n te b'ai ni kam'ane?
Who We AreWhat We EelieveWhat We Do
2025 by iamachristian.org,Inc All rights reserved.
