Ieremia 48 - Kiribati New Version Bible

Ana Taeka Te UEA

I bukin Moaba

1E tuangai te UEA ae Moan te M'aaka ae Atuaia Iteraera, b'a N na kaangai nako ia kaain Moaba:

Ko a reke n te kangaanga te kaawa ae Nebo;

E na tauaki Kiriataim

ao e na kab'ainrangaki,

ao a na bon uruakaki nonona

ao e na tiku n uruaki.

2Akea ae e na karineko, Moaba.

Ana iangoa aron tiringakim

kairiribai i Etibon.

E na ti katuka te aki kakarongoa Au kabaang

n oin ami kaawa are e aranaki b'a “Aki Karongoaa.”

3Ane a na tangira buokaia

kaain Oronaim,

ngkana e a buakanaki aia kaawa

ma n uruanaki.

4Ane e na maaenako Moaba!

A na maikeike ami ataei

5ao a na tang i aoni kawaia ni waerake

nakon te kaawa are Ruita;

A na tuangaki taekan taiani kabuanib'ai

i aon te kawai nako Oronaim.

6Biiri n rawei maiumi!

Kaineta te rereua

kaanga te aati ae e aki manana.

7Tao kam taku b'a kam konaa ni mano

ni m'aakami ao kaub'aimi,

ma ane kam na tauaki

n reitaki ma antimi are Kemoti,

ma ana ibonga, ao ana mataniwi nako.

8Bon akea mai buakon ami kaawa

aika a na konaa ni biri nako man te urub'ai.

I a tia n tuangiia ami kairiribai ni kaangai,

“Kamaunai taiani m'arua

ao aaba aika a aoraoi i Moaba.

9Kab'akai taian taoro i aon te tano

n tiringi arokan te tawaana.

Katikui kaawana b'a a na tiku n uruaki,

ao akea ae e na maeka ikekei.

10I tangiria n tiringiia kaain Moaba,

ao ngkana kam kabiri nako ia,

N na bon kamaraiaingkami.”

11Moaba, ti te bo ngkoe ma te wain

ae e tiku n arona n aki kumekumeaki,

n aki kaakab'aroaki man te tiaeki teuana nakon te tiaeki teuana.

12Ma ngkai, N na kanako ia kairiribai

b'a a na kab'aroa te wain

ma n urui taian tiaeki!

13Ao i mwiina, kam na mamaa

i bukina ngke e aki konaa ni kamaiungkami

antimi are Kemoti,

n aron Betaera ae e aki konaa ni buokiia

Iteraera.

14Ko taekinna b'a

a korakora ma n ninikoria am tautia.

15Ma bon te UEA Ngai,

ae Moan te M'aaka,

ao I berita b'a a na karanganakoi

ami kaawa nako kairiribai.

Ao a na bon mate naba

ami taani buaka aika a bane aroia n te buaka.

16N na bon aki baenikai ngkai

e na orea Moaba te kabuanib'ai!

17N na tuangiia botannaomata aika a kaan

b'a a na tanginiwenei i bukimi ao a na kaangai,

E koaua b'a e bon aki kananokawaki? E tautaekaniia tabem'aang ngkoa Moaba,

ma ngkai e a tia ni maaenako

m'aakana are e mimitong.”

18Kaain te kaawa ae Ribon,

kam na aki manga oki ni karineaki,

ma ngaia ae, kam na tekateka i buakon te baareka.

Ane a na raeuaakaki oon ami kaawa

ngkana a roko ami kairiribai ni buakaningkami.

19Ngkami aika kaain Aroera,

tataninga i rarikin te kawai,

ao ngkana a biri i rarikimi taan rawei maiuia,

ao kam na titirakiniia ni kaangai, “Tera ae e riki?”

20Ane a na kaeka ni kaangai,

“E a tia Moaba n taenikai!

Kam na kaai n tang ma ngaira ma te mamaa.

Tuangiia aomata ni kabane n te Karaanga are Arenon

b'a e a uruaki Moaba.”

21N na katuaai ni kabane

kaawan Moaba:

ai moara ra riki Oron,

Iata, Meb'ata,

22Ribon, Nebo,

Beta Riberataim,

23Kiriataim,

Beta Kamura, Beta Meon,

24Keriota, Botira, ao kaawan te aba are Moaba ni kabane.

25E a moti Au babaaire

a na kamanatuaaki ami taanga ni buaka,

ao e na uruaki m'aakam.

26Kaain Moaba, kam taku b'a

kam korakora riki nako iu.

Ma N na tuangiia botannaomata tabeua

b'a a na kamangingkami

ao a na ngareakiningkami ngkana kam b'aka n rukurukumaki

i nanon mumutami.

27Kam b'ainingareia Au aomata

ao kam karaoia b'a kaanga buure

aika a reke ni karaoa te m'akuri.

28Ao n te tai aei kam na kiitana ami kaawa

ao kam na maeka kaanga te taobe

ae e kamanoa n te aba ae e katati

ke tabwenani b'aa aika a rietaata.

29I ataa ami kamoamoa,

ma aromi ao tikatikami n nakonako ma ni kainikatonga.

30Ma I bon ataia naba ae e aki konaa

ni kamaiungkami te kainikatonga.

31Ma ngaia are, N na tang ma n tanginiwenei

i bukin Moaba

ao kaawana are Kira Ereti.

32Kaain Tibema,

ti te bo ngkami ma te nne n aroka ni kureebe

ae e tine amwiin uaan te kureebe,

ma m'aanga aika a roota

meaang nakon te kaawa are Iatera

ao ni wairio nakon Taari are Mate.

Ma kam a tia n uruakaki,

ma ngaia are, N na tang i bukim,

n ai aroia kaain Iatera ngkai a tang

i bukin aia nne n aroka ni kureebe.

33A a nako boong ni bukamaru i bukin

taian nne n aroka ma taabo n ununiki

i Moaba.

Bon akea riki manga te takaarua ni kukurei

mairouia aomata aika taan karaoa te wain.

34E na ongo te aba te tang mai Etibon

ae e roota

Ereare ao Iaati;

e na ongo te aba te tang mai Toa

i Oronaim

ao Ekera Teritiia.

Ao e na m'auteretere Karaangan Nimrim ae e uarereke.

35N na karaoi taekaia aomata ni kabane

ake a kaakabuoka te b'ai ni kaboiarara

nakon antiia kaain Moaba

ke n anga taiani karea

i aon aia baangota nako.

Bon aei Au taeka Ngai ae te UEA.

36I tang inanou i bukin Moaba

kaanga ai aron te tanginimate

ae e aneneaki n te kaib'ab'aa.

I tang i bukiia kaain

te kaawa are Kira Ereti,

i bukina b'a a nako kaub'aia.

37A bane n tia ni koromaraia ma ni korobuai. A a bane n tia ni korokoroi aon baiia, ao a bane ni kunnikaiia ni kunnikai n aki akaaka.

38Akea te b'ai ae e karaoaki i aon taubukin autin Moaba ni kabane ao ni katawanangin nuukan te kaawa b'a ti te tang, i bukina ngke I a tia n urua Moaba kaanga te tiaeki are akea ae e tangiria.

39E a wene n uruaki Moaba!

Kakauongo nakon kaaina aika a tang

ngkai a rairaki nako ma te mamaa.

A a maaku botannaomata aika tabeua

n te b'ai are e riki,

ma a bon ngare naba.

40Moaba, e kiba rikaaki te kairiribai

kaanga te ikare ae e taakin baina

i aon abami.

41A na tauaki ami kaawa aika a buubura

ma ami nono,

ao a na tauaki ni korakoran te maaku

ami taan buaka.

42E a roko n tokina am botannaomata,

i bukina ngke ko a tia ni kataia ni kaaitaraai,

Ngai ae te UEA.

43A tataningaiko

te maaku, taiani m'aruarua, ao taiani b'ainikam'ane.

44Ngkana kam maaku ma ni biri,

ao kam na b'aka i nanon te m'aruarua;

ngkana kam kawakawa n otinako man te m'aruarua,

kam na manga reke n te b'ainikam'ane.

E a roko te tai are

kam nang katuaaeaki iai.

45A na tei i rarikin te kaawa are Etibon

are e tautaeka iai ngkoa Taion,

taan rawei maiuia i aan nuun

te urarake

man aia kaawa ae e buubura are e urarake.

N te tai ae e aki maan, a na manga buburake

taiani kaawa ake i aon tabuki ake tabeua,

ike a maeka iai aomata aika a kakani buaka aikai.

46Kaain Moaba, kam taromauria ngkoa

Kemoti, are antimi,

ma ngkai kam a reke n te kaangaanga,

ao a na riki natimi b'a taenikai

i abaia ianena.

47Ma n te bong teuana, N na kairiia

ami aomata n okirii mwengaia.

Bon aei Au taeka Ngai ae te UEA.