1Aio te rongorongo mairoun te UEA i bukin Iteraera:
Bon te UEA Ngai! I arora nako taiani karawa; I kaaki te aonnaba i aon aana ao I anga te ikeike ni maiu nakoia aomata.
2I a tia ni iangoia b'a e na riki Ierutarem b'a te boora ni wain ae e na kamangingia botannaomata nako akana i rarikina. Ao ngkana e roko buakanakin Ierutarem, e na buakanaki naba Iuta.
3Ma N na onika Ierutarem nakon te atiibu ae e rawaawata ae e na kamanatuaia aomata nako i aon te aonnaba aika a katobibia Ierutarem,
4N na kakamaakuia aoti ni kabane ao a na mangaongao taan toka i aoia aoti. Ma, N na taratara Iuta n te tai naba anne.
5Ao ane a na ataia te baronga are Iuta ae bon Atuaia Ngai ae te UEA ae Moan te M'aaka, ao boni Ngai oin korakoraia.
6N na kariaia te baronga are Iuta n te tai anne b'a e na riki b'a te ai ae e mronron n te b'ariko ni kai ke te tooti ae e ura ni b'ariko n uteute aika a baaireaki raoi. Ao i mwiina, e na kaurarakei botannaomata ake a katobibia Iuta. Ao e na manga waekoa n okira arona te kaawa are Ierutarem n onrake n te aomata.
7N na anga te tokanikai nakon Iuta, ma ngaia are, e na aki manga kakannato riki abanuean Tawita ma mimitongin te kaawa are Ierutarem ni kabane nakon Iuta n ti ngaia.
8N na kaawakina Ierutarem Ngai ae te Atua. E na bon korakora naba te aomata ae te kabanea ni mamaara ikekei n ai aron Tawita, ao e na tautaeka abanuean Tawita b'a kaanga bon Au anera ae e riki b'a ana tia kairiiri.
9I a tia ni iangoia b'a N na kamaunaia botannaomata nako ake a buakana Ierutarem.
Te Tanginiwenei I bukin Are E Ewaraki N Te Kainiwai10Boni Ngai ae te UEA ae N na karaoa ana kariki Tawita ma kaain Ierutarem b'a a na rangi n nanokawaki ao a na tataro ngkana a noora te aomata are e ewaraki n te kainiwai. A na tang ma n tanginiwenei i bukina, kaanga kaaro aika a tang i bukin maten natiia te rikitemanna ke aia karimoa.
11A na tang kaain Ierutarem n te bong arei kaanga m'aitin are a karaoia aomata nako i bukin Atata Rimmon n aaba ake a aoraoi i rarikin Mekito.
12A na bane kaain utu n tatabeua nako i aon te aba n tang, ao m'aane ana tang ni kaokoroia mairouia aine. A raonaki irouia ake man ana utu Tawita, ao ana utu Natan,
13Rewi, Timei,
14ao ai uana naba ma utu ni kabane ake tabeua.
Who We AreWhat We EelieveWhat We Do
2025 by iamachristian.org,Inc All rights reserved.
