Itaia 19 - Kiribati New Version Bible

Katuaaean Aikubita

1Aio rongorongon Aikubita:

E roko te UEA mai Aikubita,

n toka i aon te nang.

A aki konab'ai aomata i bukin maakuia.

A rurubenebene aia bouannanti

ngke e roko man taku,

2“N na katuaaea Aikubita

n taiani buaka n nanoaa

ane a na buaka i bon irouia aaba ma ake i rarikiia, kaawa ma kaawa, ao taian abanuea n tatabeua nako.

3“E na anaaki ninikorian Aikubita

ngkana I kamangaoi aia babaaire nako.

Ane a na kataia n titirakiniia aia bouannanti

b'a tera ae a riai ni karaoia,

ao mairouia tamneia ake a tia ni mate,

ao mairouia naba taani kaiwa.

4N na kaakiia kaain Aikubita i aani m'aakan te uea

ae e iowawa ae akea ana Tangira.

I a tia ni berita n aei

Ngai ae te UEA ae Moan te M'aaka.”

Te kangaanga N Te Karaanga Are Te Naire

5Ane e na m'autakataka te Karaanga are te Naire

ao e na riki b'a te aba ae e mate te tano.

6Ane a na m'aung karaangana ake a uarereke,

E na akea te ran i Aikubita,

ao ane a na rai

taiani maunei ma tain uteute ake a ab'ab'aki.

7Ane a na rereua taian tawaana ni kabane

ake i mataniwiin te Naire;

ao a na bane ni mauna nako taian aroka.

8Ane a na b'ara nanoia

akana a akawa i nanon te Naire

ao a na tang.

9A na aki ataa te b'ai ae a na karaoia

taani karaokunnikai

ao a na rai mataia.

10Ane a na mangaongao taan raranga kunnikai;

ane a na nanokawaki man tang

taani m'akuri ake a kabooaki.

Taani Kairiiri Mai Aikubita Aika Akea Manenaia

11Burababaia i bon irouia

ana mataniwi uean Toan

ma aia taeka n reirei aika a nanobaba.

A na kangaa ni kaangai nakoina.

“Ti rangi ni wanawana,

ao a oki rikaaki nakoia uea

ara utu ni boong ake ngkoa?”

12A ngaa ngkai m'aane aika a rabakau aikai?

ngkana a konaa, ao ke a taekinna

b'a tera ae e iangoia te UEA ae Moan te M'aaka

i bukin Aikubita.

13A burababa ao a kam'aam'ane ana

mataniwi te uea i Toan

ao i Membiti.

A tia n anga aia kaetieti aika a buakaka

nakoia botannaomata

taani kairiiri n tautaeka nako.

14E a tia te UEA ni kamangaongaoa Aikubita;

a tia taani kairiiri ni karaai waena

ao ni kamumutaa kaanga te koro ni manging.

15Bon akea temanna mai Aikubita ae e konaa ni karaoa te b'ai teuana,

e aoria ngke antai ngaiia.

16Ngkana e katuaaea Aikubita te UEA ae Moan te M'aaka ni baina ae e korakora, ao a na bon rangi ni mamaara kaain Aikubita ao a na ruru ni maaku.

17A na rangi ni maaku i Iuta n te aro are a rootaki naba n te maaku ti ngkana a ongo arana. E na riki i bukin te b'ai are e na karaoia te UEA ni kaaitaraa Aikubita.

E Na Kakab'aia Aikubita, Aturia, ao Iteraera Te UEA

18E a roko te tai are e na taetae te aba iai n Ebera ni kaawan Aikubita ake nimaua, ao a na riki kaaina b'a taan onimakina te UEA. E na aranaki kaawana teuana b'a kaawan Taai.

19E na kateaki te baonikarea i bukin te UEA i nuukan Aikubita; ao e na kateaki te baangota i bukin karineana i aon tian te aba.

20Aio are e na kauringiia kaain Aikubita ae e meemena irouia te UEA ae Moan te M'aaka. Ao a na buubutiia buokaia ngkana a reke n te kaangaanga, ao e na kanakoa temanna b'a e na kamaiuia mairouia aia kairiribai.

21E na kaotia te UEA nakoia kaain Aikubita b'a antai Ngaia, ao ane a na ataia ao a na taromauriia te UEA. Ane a na uoti aia karea ma taian angab'ai nakoina, ao ane a na kakoroa nanon aia berita nakoina.

22Ane a na rairaki aomata nakoina, ngkana e a tia te UEA ni katuaaea Aikubita. Ao i mwiina, e na kaekaa aia tataro, ao a na kamaiuaki kaain Aikubita.

23Ane e na iai te kawai ae e raoiroi ae e biri mai Aikubita nako Aturia. Ane a na m'am'ananga iai kaain Aikubita ma kaain Aturia mai Aikubita nako Aturia, ao a na kaai n taromauri.

24E na ikotaki Iteraera ma aaba aika uoua aikai. Ane a na riki b'a b'aai ni kakab'aia nakoia kaain aonnaba ni kabane,

25Ao i mwiina anne, e na kakab'aiaia te UEA ae Moan te M'aaka ni kaangai,

“Bon au aomata kaain Aikubita.

I karikiia kaain Aturia

ao I rineia Iteraera.”