1Bon Atuami te UEA, ma ngaia are, kam riai n tangiria n taai nako ma n ongotaeka nakon ana Tua ao Ana reirei.
2Kam na uringa arona ngke E boaingkami, ao E aki boaiia ami ataei. Boni ngkami ake kam noora te UEA ngke E kamanenaa m'akana
3ni karaoi taiani kakai i Aikubita, ma ni karaoi b'aai aika kakamaaku nakon te uea ma ana Aomata ni kabane.
4Ao ngke a kakioingkami kaain Aikubita n aia kaanibuaka, ao kam noora te UEA ngke E kab'ab'aia n Taari are Uraura, ao a bon teimatoa naba ni maraki ni konaakiia arei.
5Kam noori baika E karaoi te UEA i bukimi ngke kam mena n te rereua, ni karokoa te tai are kam roko iai ikai.
6Ao kam noora naba aron te UEA ngke E kauka te tano i nuukan ara tabo are ti kateimaeka iai i aan ana autinrianna Ratan, ao Abiram, ake a kab'autaki ma aia utu, aia man aika kawakawa, ao aia autinrianna.
7Kam bon noori ni matami korakoran m'aakan te UEA ni karaoi baikai ni kabane.
8Ae kam nang ri nanon te Karaanga are te Ioretan n te tai ae aki maan, ao ngkana kam ongotaeka nakon taian tua ma reirei aika I anganingkami n te bong aei, ao kam na bon anganaki te korakora i bukin tauan te aba
9are E a tia ni berita iai te UEA nakoia ami bakatibu, ma kanoaia. E rawata iai te miriki ao ana karewe te manibeeru, ao kam na maeka ikekei ma ni kukurei iai n te tai ae maan.
10Bon te aba ae e raoiroi riki nakon are kam maeka iai i Aikubita, ike kam m'akuri korakora iai, e ngae ngkana kam ti teboki aroka.
11Ma a tetebokaki taian tabuki ma maunga ake n te aba ni berita n te karau mai karawa,
12i bukina b'a E teimatoa te UEA n taratara aon te aba aei, ao ma ni kakawakinna i nanon te ririki ae b'anin.
13E mwiokoingkami te UEA ae Atuami b'a kam na tangiria ma ni m'akuri i bukina ma nanomi ao tamneimi ni kabane. Ngkana kam ongotaeka nakoina,
14-15ao E na karokoa te karau ni bon tain te karau, ma ngaia are, a na reke kanami, ma ami wain, ao b'aan te oriwa aika m'aiti, ao a na m'aiti naba taiani uteute i bukiia ami nanai ni man.
16Ma kam na tarataraingkami man te kariri b'a e na aki katannakoingkami mairoun te UEA. Ao ngkana kam taromauriia atua riki tabeman,
17ao ane na un te UEA, ao E na aki karokoa te karau. Ao ane a na akea te b'ai ae na riki n ami katawanang, ao kam na maunanako man te aba ae e raoiroi ae a tia n anganingkami te UEA.
18Kamatenikunai tuua aikai, ao iangoi n taai nako. Koroi taekaia ao kabaei i aoni baimi ao i aon naba ram'ami b'a kam aonga n teimatoa n ongotaeka nakon iai.
19Reireiniia ami ataei iai. Taetaekinna nakoia ni katoa tai--ngkana tao kam nakonako i aon te kawai ke ngkana kam nang matu i aon kiemi n te tairiki, ke ngkana kam uti n te ingabong.
20Koroi i aon kain mataroan ami auti, ao i aon mataroan naba te kawai n rin.
21Ao ane e na anaanau iai maiuia kanoami n te aba are E a tia n anga te UEA nakoia ami bakatibu. A na maiu ikekei ami utu ni karokoa tokin aonnaba.
22Kam na tangira te UEA ae Atuami ao ongotaeka n ana Tua ma ana Reirei aika I anganingkami n te bong aei. Ngkana kam maiuna nanon te UEA,
23ao E na buokingkami ngkana kam taua te aba. E ngae ngkana iai taian botannaomata aika korakora riki nakoimi, ma E na kanakoia te UEA ngkana kam buakaniia.
24Kam na taui aaba n taabo nako ike kam nako iai, ni moa man Rereuan Maiaki, ni karokoa Maungan Reb'anon, ao man te Karaanga are Iuberetiti ni karokoa Taari are te Mereterenian.
25Bon akea ae na kona ni kaaitaraingkami. E na karaoia aomata ni kabane te UEA b'a a na maakuingkami, n aron are E a tia ni berita iai.
26Kam na rinea nanomi—Kam tangiria b'a E na kakab'aiaingkami te UEA, ke kam tangiria b'a E na katekebuakaingkami?
27I anganingkami ana Tua n te bong aei, ao ngkana kam ongotaeka nakoina, ao E na kakab'aiaingkami.
28Ma ngkana kam aki ongotaeka nakoina ma n taromauri taian atua aikai aika akea te b'ai ae a kona ni karaoia i bukimi, ao E na katekebuakaingkami te UEA.
29Ngkana E tia te UEA ae Atuami ni buokingkami n taua te aba, ao kam na karaoa te bootaki ike kam na katanoata iai Ana kakab'aia te UEA man te Maunga are Keritim, ao Ana kamaraia man te maunga are Eeb'ara.
30Kam bon ataia b'a a mena maunga aika uoua aikai i maeaon te Karaanga are te Ioretan n te aba are e mena irouia kaain Kanaan ake a maeka ni M'aruan te Karaanga are te Ioretan. A mena maunga aikanne i maeaon te kawai i rarikin arokan More are tabu n iteran Kirekara are teuana.
31Kam na ri nanon te Karaanga are te Ioretan n te tai ae aki maan ma n taua te aba are a tia n anganingkami te UEA. Ao ngkana kam a tekateka raoi ikekei,
32ao kam na kakaonimaki n ongotaeka nakon ana Tua ma ana Reirei aika I anganingkami n te bong aei.
Who We AreWhat We EelieveWhat We Do
2025 by iamachristian.org,Inc All rights reserved.
