Taian Areru 137 - Kiribati New Version Bible

Aia Anene Iteraera Ngke a Tauaki B'a Taenikai

1Ti tekateka i rarikini karaanga i B'aburon,

ao ti tang ngke ti uringa Tion.

2Ti katikui n aki kani katang

ara b'ai ni katangitang.

3Ti tuangaki irouia ake ti taenikai irouia b'a ti na anene:

A tangirira b'a ti na kakukureia n ara anene:

a kaangai, “Anenea nakoira te kuna teuana i bukin Tion.”

4Ti na kanga n anenea kunara nakon te UEA

n te aba ae tiaki abara?

5N na aki kona ni manga katanga au b'ai

ni katangitang ngkana I m'aninga taekam, Ierutarem!

6N na aki kona ni manga anene

ngkana I aki uringko,

ngkana I aki iangoiko b'a kakukureiau ae bati ngkoe!

7Te UEA, uringa te baere a karaoia tibun Etom

n te tai are ekakinako iai Ierutarem.

Uringa aia taeka ngke a kaangai,

“Urua, urubekebekea!”

8B'aburon, ko nang uruaki.

E a kab'aia ane kaboa nakoim mwin

am bure are ko karaoia nakoira:

9Ane e anaia am merimeri

ni boi ketaia i aon te b'a.