Warekaia Iteraera 27 - Kiribati New Version Bible

Anganakiia Natin Terobeata Aine Abaia

1Terobeata bon kaain te baronga are Manate, ao boni iai natina aine aika niiman, aika Nei M'ara, Nei Nooa, Nei Okera, Nei Mireka, ao Nei Tireta.

2Ao a nakon te Um'antabunrianna natin Terobeata aikai n te tai teuana, ao a kaaitibo ma Moote, Ereata, ao tabeman taani kairiri irouia Iteraera, ao a kaaitibo naba ma aia bootaki Iteraera ae korakora, ao a taku aine aikai:

3Kam bon ataia b'a e mate tamara n te rereua. Ma e boni mate i bukin te b'ai teuana are e karaoia, ma tiaki i bukin raonakin Kora ngke e kamangao nakon te UEA.

Bon akea natin tamara te mm'aane i mwiina

4are e na kateimatoa aran ana utu. Ma e aera ngkai e nang kamaunaaki arana i bukina ngkai akea natina te mm'aane? Kam na anganiira naba abara n ai aroia ara koraki tabem'aang i nanon ara kaainga, b'a e aonga n teimatoa ni maiu aran tamara.

5Ao e bubuti Moote nakon te UEA b'a tera ae na karaoia,

6ao E kaeka te UEA, ao E taku:

7A eti natin Terobeata aine. A bon riai n anganaki n tatabemaniia te m'akoro n aba are e riai n reke iroun tamaia ngke arona b'a e maiu.

8Tuangiia Iteraera ni kabane b'a ngkana e mate te mm'aane ao akea natina te mm'aane, ao a na b'aib'ai n abana natina aine.

9Ao ngkana akea natina aine, ao a nang b'aina abana tarina.

10Ma ngkana akea naba tarina, ao e na b'aina abana tarin tamana.

11Ao ngkana akea naba tarin tamana, ao e na kanakoaki te aba nakoia ana koraki ni kaan i nanon ana kaainga. Bon aei Au tua, ao a riai n ira nanona Iteraera.

Rineakin Iotua B'a Te Tia Kairiri Irouia Iteraera(Te Tua 31.1-8)

12Ao E taku te UEA nakoni Moote, “Ko na nako n tam'arakea te Maunga are Abarim n te bongi teuana, ao mai ikekei, ko na noora te aba are N na anganiia Iteraera.

13Ao i mwiin norana, ko na mate n aron tarim are Aaron,

14i bukina b'a kam uaia n aki ongotaeka i Rou i Merib'a i rarikin te kaawa are Kateti n te Rereua are Tin. Kam aki onimakina M'aakau ae Tabu ngke a karaoa te b'ai ae aki raoiroi nako Iu aomata ikekei.”

15Ao e kaeka Moote, ao e taku,

16“Bon te UEA Ngkoe ae te Atua, ao ko atai b'aai ni kabane ake i nanoia aomata. Ma ngaia are, I a butiiko b'a Ko na rinea te tia kairiri irouia Iteraera.

17A kainanoa te aomata temanna Iteraera are e na kairiia nakon te buaka, b'a a kaawa n riki b'a tiibu aika m'aninga nako b'a akea te tia kaawakiniia.”

18Ao E taku te UEA, “E kona ni karaoa te m'akuri anne Iotua are natin Nun. Katoka baim i aona ni kaotia b'a boni ngaia are e na onomwi.

19Ao naako ma ngaia n tei i matan Ereata are aia ibonga Iteraera. Ao n rinea Iotua b'a te tia kairiri ae boou,

20ao tuangiia b'a a na riai ngkai n ongotaeka irouna, n ai aroia ngkoa n ongotaeka i roum.

21Ma e na riai Iotua ni mwiokoa Ereata i bukin kakaaean te b'ai ae I tangiria b'a e na karaoia ngkana e na kairiia Iteraera nakon te buaka.”

22Ao Moote, e karaoa nanon Ana kaetieti te UEA, ao e kaira Iotua nakon Ereata ma aomata,

23ao e katoka baina i aon Iotua, ao e katabua b'a te tia kairiri irouia Iteraera.