Te Minita 8 - Kiribati New Version Bible

1Antai ae e tim'aati

ni konaa ni kab'arab'arai b'aai ni kabane?

E kaungaa nanom te wanawana

ao e anganiko te matangare.

Ongotaeka Iroun te Uea

2Ngkana ko berita nakon te Atua b'a ko na kakaonimaki nakon te uea, ao I tuangko b'a ko na riai ni kakoroa raoi nanon am berita.

3Ko na tai waetata ni kaaitaraa te uea ke ni kauntaeka ma ngaia, ngkana e karaoa ana babaaire.

4Bon te tua ana taeka te Uea. Akea ae e konaa n titirakinna ni kaangai, “E aera ngkai ko karaoa aei?”

5Ko na aki reereke n te kaangaanga ngkana ko ongotaeka iroun te uea. Ma ngaia are, ko na tim'aati, ao reireiniko arom ae ko riai ni karaoia, ao karaoia.

6E matoatoa te maiu, ma bon iai tain ao nnen b'aai ni kabane,

7e ngae ngke bon akea ae e konaa n taekin kanoani boong aika a na roko.

8Ti aki konaa n tautaekana te ang ke ni baairea ara bong ni mate. Bon akea ae e konaa ni biri nako mani boong ni buaka, ao akea naba ae e konaa ni karabaa i akuun te buakaka.

9I noori baikai ni kabane ao I karawaawata iangoaia b'a ai tera ae e riki n te aonnaba aei. E aera ngkai iai tem'angina aika iai m'aakaia ni kaikoakia tem'angina?

Antai Ae E Konaa N Atai Ana Kawai Te Atua?

10I noora te aomata ae e buakaka ae e taunaki ma te karineaki, ma a kiitana te kaawa ae e tabu ana Aomata te Atua, ao e m'aninga te aba taekaia. Bon akea nanon b'aai aikai ni kabane.

11Ngkana ti nooriia aomata aika buure ma buakaka b'a a teimatoa ni kaakaraoa te bure ao a aki katuaaeaki, ao e na kairiira b'a ti na kani kaakaraoa naba te bure.

12A karaoi buure aika tebubua m'aitiia, ao a maiu ni karokoa karaia, ao a aki reke n te taeka n rabakau are e kaangai:

A na teetekeraoi aomata nako

aika a maiuakina te raoiroi

ao a karinea te Atua,

13ma bon akea ae e bure

man tannako mairoun te Atua

ae e na teetekeraoi ke n anaanau maiuna.

14Bon iai te b'ai teuana ae akea nanona irou. Kaain te aba aika raraoi a karaoaki b'a kaanga buure ma buakaka, ao buure ma buakaka a karineaki b'a kaanga kaain te aba aika a raoiroi.

15Ma ngaia are, I iangoia b'a ti na karekei ara b'ai man te maiu n aron are ti konaa ni karekei. Bon akea riki te b'ai ae e raoiroi nakon ae te kakukureira ni kanara ao nimara ao reken te tai ae e raoiroi. Ao n te aro anne, ti na konaa iai n ri nanon kangaangan te maiu, n aron are e a tia n anganiira te Atua n te aonnaba aei.

16I aki mamatu ni bong ao ni ngaina, b'a I kan ataia b'a tera ae e riki ngkai n te aonnaba aei.

17I noori b'aai ni kabane aika e karaoi te Atua, ao I a ataia b'a bon akea temanna ae e konaa n atai aroia. Ti konaa n rangi ni wanawana, ma bon akea boonganana b'a tao m'aitira ara tai ni kataia, ke n taekinna b'a ti ataia, ma ti bon aki atai b'aai n aroia ni kabane.