Etita 4 - Kiribati New Version Bible

E Bubuti Moretekai Ana Buobuoki Nei Etita

1Ao ngke e a atai b'aai aika a karaoaki Moretekai, ao e raeuai kunnikaina i bukin rawawatana, ao e karin kunnikai aika a mangaingai, ao e tauna atuna n te mannang, ao e nakonako i nuukan te kaawa are e buubura arei n tangi n takaarua n te b'anaa ae e kananoanga,

2ni karokoa rokona ni mataroan te bareti. E bon aki rinnako n ana bareti b'a e tabuaki te rinnako ma kunnikai aika a mangaingai.

3Ao a bane n tang taian I-Iutaia n taabo nako ike e katanoataaki iai ana rongorongo te uea arei. Ao a aki mamatam, ao a tanginiwenei, ao angiia a karin kunnikai aika a mangaingai, ao a wene i buakon taiani mannang.

4Ao a na toro Nei Etita ake aine ma tooro naba ake tabeman a tuangnga te b'ai are e karaoia Moretekai, ao e aki rau nanona iai. Ao e anganako kunnikain Moretekai tabeua b'a e na karin i aona n onei mwiin kunnikaina ake a mangaingai, ma e rawa iai Moretekai.

5Ao i mwiin arei, ao Nei Etita e a wetea Ataka are temanna te iunaki n te bareti, are bon ana tia m'akuri, ao e tuangnga b'a e na kawara Moretekai ma n ongora i rouna b'a tera ae e riki, ao bukin tera?

6Ao e nako Ataka ni kawara Moretekai i nuukan te kaawa i mataroan te bareti.

7Ao e tuangnga Moretekai b'aai ni kabane, ma m'aitin te m'aane are e berita Aaman b'a e na anga nakon nnen kaub'ain te uea, ngkana a bane n tiringaki taian I-Iutaia.

8Ao e angan Ataka katotongan te katanoata are e taekinaki i Tutian, are e anga te kariaia i bukin tiringaia taian I-Iutaia. Ao e butia te toro arei Moretekai, b'a e na kab'arab'araa raoi te b'ai arei nakon Nei Etita, ma ni butia te uea ma n ononiia b'a e na nanoangaia ana botannaomata.

9Ao e karaoa arei Ataka,

10ao e a manga anga ana rongorongo Nei Etita nakoina b'a e na manga uotia nakon Moretekai ae e kaangai:

11Ngkana iai te m'aane ke te aine ae e rin ni m'aneaban ana bareti te uea, ao e aki weteaki iroun te uea, ao e na tiringaki te aomata anne. Bon anne te tua ae e bane n ataaki mairoun te uea ma ana taani iango, ao kaain aaba nako. Ma bon ti teuana te kawai are e kona ni karaoaki iai anne b'a ti ngkana e arora ana kai are te koora te uea nakon te aomata anne, ao e na aki tiringaki. Ao ai te nam'akaina tabun ngkai au tai n aki weweteaki iroun te uea mai mwiin moani weteau i rouna.

12Ao ngke e reke ana rongorongo Nei Etita iroun Moretekai,

13ao e kanakoa ana taeka ni kauring nakoina ae e kaangai, Tai taku b'a ko a kab'aia riki nakoia raom ni I-Iutaia tabem'aang, i bukina ngke ko a mena n te bareti.

14Ngkana ko aki kakarongoa n te aekaki n tai aei, ao ane e na roko te buoka mai karawa nakoia taian I-Iutaia, ao ane a na kamaiuaki, ma ane ko na mate ngkoe ma ana utu tamam, ma ni kamaunaaki. Antai ae e ataia, ao tao ko boni karikaki b'a te ueanaine i bukin te tai aei.

15Ao e a manga kaoka te taeka Nei Etita nakon Moretekai ae e kaangai,

16Naako botiia I-Iutaia ni kabane i Tutian, ao karaoa te aki mamatam, ao te tataro i buku. Kam na aki kana te b'ai teuana ma ni mooi teutana i nanon tenibong. Ao ti na karaoa naba ae ai aron anne ma au toro aine. Ao i mwiin anne, ao N na nako ni kawara te uea, e ngae ngkana e tabuaki n te tua. Ngkana arona b'a N na mate ni karaoan aei, ao N na boni mate.

17Ao i mwiin arei, ao e a nako Moretekai ma ni karaoi b'aai ni kabane ake e a tia n tuangnga Nei Etita.