Ieremia 2 - Kiribati New Version Bible

Aia Aki Kakaonimaki Kaain Iteraera

1E tuangai te UEA b'a

2n na nako Ierutarem ma n tuangiia aomata nako te b'ai are E a tia n taekinna:

Kam tangirai ngkoa ngke

kam moan riki b'a au kabae

ao kam irai

i nanon te rereua ae akea kaina.

3Bon ti ngkami au b'ai,

kaanga moan m'akoron te tai,

ao I rangi ni katuaaia

koraki aika a karaoa ae e aki raoiroi nako imi.

4Ongora irou Iteraera,

5ao N na taetae Ngai ae te UEA.

I aki roko n te karaoa ae e buakaka

nako ia ami bakatibu,

ma a kiitanai

ao a riki n aki manena

ngke a iriia bouananti aika akea manenaia.

6A rawa ami bakatibu

ni buubutiai buokaia,

e ngae ngke I a tia i kamaiuia

mai Aikubita

ma ni kairiia i nanon

te rereua ae e kamaamate ae akea kain aona,

ike akea ae maeka iai

ke ni kataia ni m'ananga i nanona.

7I uotingkami nako ikai nako abau,

ike e tiraua te am'arake iai,

ma kam kabuakaka te aba

n ami bure.

8A aki kan ataai taian ibonga

ake a reireiniia aomata au tua nako.

A kakaitaraai ami taani kairiiri;

ao ami burabeti

a tataekina ana taeka B'aara

ao a taromauriia atua ni kewe.

E Bukiniia Ana Aomata Te UEA

9N na kateingkami n te boowi

ao ni bukiningkami

ma ami kariki

10n te bure ae akea te botannaomata teuana

ae e a tia ni karaoia mangkoa.

Kam na ti titirakiniia aomata nako, n taabo nako,

man rereuan nako mainiku

nakon taian abam'akoro ake i maeao.

11ao ane kam na nooria b'a bon akea te botannaomata

ae e a tia ni kiitana antina

e ngae ngke tiaki atua ni koaua.

Bon ti Ngai te Atua ni koaua ae E mimitong,

ao kam a tia ni katinanikuai

i bukin taromaurian taian bouananti.

12Kam na tuangiia taiani karawa

b'a a na ruru ni maaku!

13Kam a tia ni bure ngkami aika au aomata

ni b'aai aika uoua

kam a tia ni katinanikuai, Ngai ae

Nen te ran ni kamaiu

ao kam kataia n itiia ami ran

n taian ni ne n ran aika tabwenaua aika a raran

aika a kekenaki i nanon te tano.

14Kaain Iteraera,

kam aki bungiaki b'a tooro ngkami;

ma kam a anaaki b'a taenikai.

15A bekorara ami kairiribai kaanga raian

ao a urua te aba;

a wene n urarake kaawa ma akea kaaia.

16A a tia tautian kaawan Aikubita

ma Membiti ao Tabaneti

n urua tab'anoum.

17Bon am bure!

Ko katoka iriiraku,

Ngai ae te UEA ae te Atua,

18kam onimakina m'aakan

Aikubita ao Aturia.

19Ane a na katuaeko am bure,

b'a bon te bure ae moan te buakaka

b'a kam kiitanai

ao kam aki roko n te maaka te rekenikai.

Bon aei Au taeka

Ngai ae te UEA ae Moan te M'aaka.

20Kam kiitanai n taai ake ngkoa

ao kam urui taiani kabae ni kabane ake i marenara,

kam rawa n riki b'a Au taani m'akuri.

Ao ngkai kam a taromaurii anti tabem'aang

n aromi ni wene ni bure

i aon taian tabuki ke i aan nuuni

kaai aika a korakora.

21Bon te kureebe ngkoa ngkami aika kam rineaki,

ma ngkai a akea te b'ai ae e na reke iroumi

ma ai ti taian kureebe aika a uarereke aika a buakaka.

E Bareka Iteraera N Te Bure

22E taku te UEA:

Kaain Iteraera,

kam a barekareka n te bure,

ao akea te toobu ke te b'ai ni kanakomemea

ae e konaa ni kanakoa.

23Kam kakewei ami bure

ao kam taku, “Ti itiaki.

ti aki taromauria B'aara.”

Ma kam na iangoa te b'ai ae kam karaoia

n te M'arua are Innom.

Ao kam biriaitua kaanga

kaamero aika ataei,

ni kawaekoaingkami n taromauria te bouananti teuana

i mwiin teuana.

24Bon te aati te aine ngkami

are e ikeikena angin te rereua,

are e tangiria ni wene ni bure

ma temanna n aki akaaka.

Kam rangi ni kai reke!

25A a mangaingai ami kauniwae,

e a m'autakataka buami

man te biriaitua n aki akaaka

i bukin taromauriakiia antiia aika ianena.

Ao I takaarua ni kaangai, “Katokia!”

ma kam kaeka ni kaangai, “Ti aki!

Ti rangi n tangiri taian anti aikai.”

26Kam rangi ni kamaamaaeaki riki

ngkami ma ami taani kairiiri

nako ia aomata aika a kimoatoo

kam taromauri bouananti aika atiibu

ao boua aika a tabu

27ngkoe ma am uea,

am ibonga ma am burabeti

b'a kaanga ai aron ae ngaiia ngkoa aika a karikingkami

ma n anganingkami te maiu.

Kam katinanikuai

ma ngkana kam reke n te kangaanga,

ao kam tang nako iu i bukin buokami.

28Naako taang nakon antimi ake kam karaoi!

Tao a bon tau m'aitiia

ni kamaiungkami,

b'a are a rangi n rawa antin Iuta

n ai aron m'aitin kaawana nako.

Kaaitaraan Te UEA

Iroun Iteraera

29E taku te UEA:

Kam kabuakakaai n taku b'a I aki kamaiungkami,

ao kam aki noora aromi ni kakaitaraai.

30I kataia ni katuaaingkami,

ma kam rawa

n oki nako iu,

ao kam tiringiia au burabeti

kanga aroia raian aika a tiritiri.

31Ao ngkai kam na ongo nakon te b'ai ae I taekinna!

Iai te tai ae I kiitaningkami iai i nanon te rereua

ke I katobibingkami n te rootongitong?

Bon au aomata ngkami,

ao i rarikin anne kam a tia ni kaangai nako iu,

“Ti na karaoa te b'ai ae ti tangiria,

ao ti rawa

n taromauriko!”

32E aki konaa n ae na m'aninga

ni katoka i aona te b'ai ni katikiraoi

ngkana e na nako ni mare te aine ae na mareaki,

ma ngkami kam a tia ni m'aninga taekau

n te bong teuana ma teuana.

33Kam rangi ni wanawana

ngkana kam kakaaia ami tangira

n te aro are kam konaa n anga ami reirei

nakon te aine ae ainen matawa.

34Kam tiringiia aomata aika akea aia bure

n akea bukina raoi.

Ao e ngae ngke a konaa n nooraki raraaia

i aon ami kunnikai,

35Kam taku b'a akea ami bure,

ao kam tangiria b'a

N na aki un iroumi.

Ma ngaia are, N na kateingkami n te kabowi,

ao ti a nooria b'a antai ae e eti.

36Ngke a kab'akaingkami kaain Aturia,

ao kam biri nako Aikubita,

ma e aki reke buokami ikekei,

37ao kam na katukaki

ma te nanokawaki ae moan te korakora.

N na aki karekea buokam

mairouia aika ko onimakiniia.